01-Apr-2026

ସୁବର୍ଣ୍ଣପୁର, (ମନୋରଞ୍ଜନ ତ୍ରିପାଠୀ )
ସୁବର୍ଣ୍ଣପୁର ଡିଆରସିଏସ୍ ସଂଜୟ କୁମାର ତ୍ରିପାଠୀ ନିଲମ୍ବିତ । କାର୍ଯ୍ୟରେ ଅବହେଳା ଏବଂ ଅନିୟମିତତା କାରଣରୁ ଶ୍ରୀଯୁକ୍ତ ତ୍ରିପାଠୀଙ୍କୁ ରାଜ୍ୟ ସମବାୟ ବିଭାଗ ପକ୍ଷରୁ ଚିଠି ନଂ ୪୨୯୯ ତା. ୩୧/୩/୨୦୨୬ ଅନୁଯାୟୀ ନିଲମ୍ବନ ଆଦେଶନାମା ଜାରି କରାଯାଇଛି । ତାଙ୍କ ନିଲମ୍ବନ ସମୟରେ ଶ୍ରୀଯୁକ୍ତ ତ୍ରିପାଠୀ ସମ୍ବଲପୁର ଡିଆର୍‌ସିଏସ୍ କାର୍ଯ୍ୟାଳରେ ରହିବା ପାଇଁ ନିର୍ଦ୍ଦେଶ ହୋଇଛି । ତେବେ ସୋନପୁର ଏଆରସିଏସ ଭବାନୀଶଙ୍କର ଦାଶଙ୍କୁ ଭାରପ୍ରାପ୍ତ ଡିଆରସିଏସ ଭାବେ ସମବାୟ ବିଭାଗ ପକ୍ଷରୁ ଦାୟିତ୍ଵ ହସ୍ତାନ୍ତର କରାଯାଇଛି । ପ୍ରକାଶ ଥାଉ କି ଯେ, ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ୍ ମରାଡ଼ୁଗୋଛା ପ୍ୟାକ୍ସରେ ନିଯୁକ୍ତି ପ୍ରଦାନରେ ବ୍ୟାପକ ଦୁର୍ନୀତ ଅଭିଯୋଗ ହୋଇଥିଲା । ଜିଲ୍ଲାପାଳ ଡ ନୃପରାଜ ସାହୁ ନିଜେ ପ୍ୟାକ୍ସକୁ ଯାଇ ଘଟଣାର ତଦନ୍ତ କରିବା ସହ ରାଜ୍ୟ ସରକାରଙ୍କୁ ରିପୋର୍ଟ ପ୍ରଦାନ କରିଥିଲେ। ପ୍ୟାକ୍ସ ସମ୍ପାଦକ ତଥା ସିଇଓ ନବୀନ ଦାଶ, ରାତ୍ର ଜଗୁଆଳୀ ମକୁନ୍ଦ ନାଏକ ଓ ପିଅନ ମନୋଜ ଦାସ ନିଜ ପୁଅଙ୍କୁ ନିଯୁକ୍ତ ପ୍ରଦାନ କରିଥିଲେ । ଉପରିସ୍ତ ଅଧିକାରୀ ଶ୍ରୀ ତ୍ରିପାଠୀ ଏଥିରେ ସହଯୋଗ କରିଥିଲେ । ସ୍ବାସ୍ଥ୍ୟଗତ କାରଣ ଦର୍ଶାଇ ନବୀନ, ମକୁନ୍ଦ ଓ ମନୋଜ ସେଚ୍ଛାକୃତ ଅବସର ପାଇଁ ଆବଦେନ କରିଥିଲେ ଏବଂ ପ୍ୟାକ୍ସ ପରିଚାଳନା ପରିଷଦରେ ଏହି ପ୍ରସ୍ତାବ ଗୃହୀତ ହୋଇଥିଲା । ନୂତନ ନିଯୁକ୍ତି ପାଇଁ ରେଜିଷ୍ଟ୍ରାରଙ୍କ ପକ୍ଷରୁ ଅନୁମତି ଅଣା ଯାଇ ନ ଥିଲା । ପ୍ୟାକ୍ସ ପକ୍ଷରୁ ବିଜ୍ଞାପନ ମଧ୍ୟ ପ୍ରକାଶ ପାଇ ନଥିଲା କି ନିଯୁକ୍ତ କମିଟି ଗଠନ ହୋଇ ନଥିଲା । ସରକାରଙ୍କ ନିଯୁକ୍ତି ନିୟମକୁ ଅଣଦେଖା କରି ଡିଆରସିଏସ ଥଇଥାନ ନିଯୁକ୍ତି ପ୍ରସ୍ତାବକୁ ପ୍ରଶାସନିକ ଅନୁମୋଦନ ପ୍ରଦାନ କରିଥିଲେ । ଗତ ଫେବୃଆରୀ ୧୯ ତାରିଖରେ ନବୀନ, ମୁକୁନ୍ଦ ଓ ମନୋଜ ଭିଆରଏସ ନେଇଥିଲେ । ସେହି ଦିନ ହିଁ ସେମାନଙ୍କ ପରିବାର ୪ ଜଣଙ୍କୁ ନିଯୁକ୍ତି ପାଇଥିଲେ । ପ୍ୟାକ୍ସ ସମ୍ପାଦକ ନବୀନ ଙ୍କ ପୁଅ ଅମ୍ବରୀଶଙ୍କୁ ଉକ୍ତ ପ୍ୟାକ୍ସର ଭାରପ୍ରାପ୍ତ ସିଇଓ ତଥା ସମ୍ପାଦକ ଓ ଜ୍ୱାଇଁ ତଥା ବରଗଡ ଜିଲ୍ଲା ବରପାଲି ବ୍ଲକ୍ ରେମେଡ ଗାଁର ଅନିଲ କୁମାର ଦାସଙ୍କୁ ସ‌ହ ସମ୍ପାଦକ ଭାବେ ବେଆଇନ ନିଯୁକ୍ତି ଦିଆଯାଇଥିଲା । ସେହିପରି ପ୍ୟାକ୍ସର ରାତ୍ର ଜଗୁଆଳୀ ଥିବା ମକୁନ୍ଦ ନାଏକଙ୍କ ପୁଅ ଅମିତଙ୍କୁ ରାତ୍ର ଜଗୁଆଳୀ ଓ ପିଅନ ମନୋଜ ଦାସଙ୍କ ପୁଅ ଅଜିତ କୁ ପିଅନ ଭାବେ ନିଯୁକ୍ତି ପାଇଥିଲେ । ଚାଷୀଙ୍କୁ ଅନେକ ଅଭିଯୋଗ ତଥା ଆନ୍ଦୋଳନ ପରେ ଜିଲ୍ଲା ଡ. ନୃପରାଜ ସାହୁ ଏହି ଦିଗରେ ତଦନ୍ତ କରି ଏଭଳି ଦୁର୍ନିତୀ ପ୍ରମାଣ ମିଳିବା ପରେ ଡିଆରସିଏସ ଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ସରକାରଙ୍କୁ ସୁପାରିସ କରିଥିଲେ । ଏହି ଘଟଣାରେ ପୂର୍ବରୁ ମରାଡୁଗୋଛା ପ୍ୟାକ୍ସ ସମ୍ପାଦକ ନବୀନ ଦାଶଙ୍କୁ ନିଲମ୍ବନ କରାଯାଇଥିଲା ।