27-Mar-2026

ବରପାଲି:-(ସୁଦାମ ଦୀପ)ବରଗଡ଼ ଜିଲ୍ଲାର ବରପାଲି ଥାନା ଅନ୍ତର୍ଗତ ମହଦା ରାଣୀ ଜୋର୍ ବ୍ରିଜରେ ବିଳମ୍ବିତ ରାତିରେ ଏକ ଅଭାବନୀୟ ସଡ଼କ ଦୁର୍ଘଟଣା ଘଟିଛି। ବ୍ରିଜ ଉପରୁ ଏକ ଟ୍ରକ ଭାରସାମ୍ୟ ହରାଇ ପ୍ରାୟ ୧୫ରୁ ୨୦ ଫୁଟ୍ ତଳକୁ ଖସି ପଡ଼ିଥିବା ସୂଚନା ମିଳିଛି।ଏହି ଦୁର୍ଘଟଣାଟି ବରଗଡ଼-ବଲାଙ୍ଗିର ଜାତୀୟ ରାସ୍ତାରେ ଘଟିଥିବା ବେଳେ, ଟ୍ରକଟି ବେଦାନ୍ତ କମ୍ପାନୀ ସମ୍ପର୍କିତ ବୋଲି ଜଣାପଡ଼ିଛି। ଗାଡ଼ି ନମ୍ବର RJ19GH5096 ବୋଲି ପୋଲିସ ସୂଚନା ଦେଇଛି। ଘଟଣାଟି ରାତ୍ରି ପ୍ରାୟ ୩ଟାରୁ ୪ଟା ମଧ୍ୟରେ ଘଟିଥିବା ଅନୁମାନ କରାଯାଉଛି, ଯେତେବେଳେ ରାସ୍ତାରେ ଯାତାୟାତ ଅତ୍ୟନ୍ତ କମ୍ ଥାଏ।ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ବ୍ରିଜ ପୂର୍ବରୁ ଥିବା ବୁଲାଣି ରାସ୍ତା ଓ ଗାଡ଼ିର ଅଧିକ ଗତି ହେଉଛି ଏହି ଦୁର୍ଘଟଣାର ପ୍ରମୁଖ କାରଣ। ଡ୍ରାଇଭର ନିୟନ୍ତ୍ରଣ ହରାଇବାରୁ ଟ୍ରକଟି ସିଧା ବ୍ରିଜ ତଳକୁ ପଡ଼ିଯାଇଥିଲା। ତଥାପି ଭଲ ଖବର ହେଉଛି ଯେ, ଏହି ଘଟଣାରେ କାହାରି ମୃତ୍ୟୁ କିମ୍ବା ଗୁରୁତର ଆହତ ଘଟିନାହିଁ। ଡ୍ରାଇଭର ସୁରକ୍ଷିତ ଥିବା ସୂଚନା ମିଳିଛି।ଘଟଣା ପରେ ସ୍ଥାନୀୟ ଲୋକମାନେ ଓ ପୋଲିସ ତୁରନ୍ତ ଘଟଣାସ୍ଥଳକୁ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ବରପାଲି ଥାନା ଅଧିକାରୀ ପ୍ରମୋଦ କୁମାର ସାହୁ କହିଛନ୍ତି ଯେ, ଘଟଣା ସମ୍ପର୍କରେ ବେଦାନ୍ତ କମ୍ପାନୀକୁ ସୂଚିତ କରାଯାଇଛି ଓ ଗାଡ଼ିକୁ ଉଦ୍ଧାର କରିବା ପାଇଁ ପ୍ରୟୋଜନୀୟ ପଦକ୍ଷେପ ନିଆଯାଉଛି।ଏହି ଦୁର୍ଘଟଣା ପୁଣିଥରେ ରାସ୍ତା ସୁରକ୍ଷା ଓ ଅତିରିକ୍ତ ଗତିର ଭୟାବହ ପରିଣାମକୁ ସାମ୍ନାକୁ ଆଣିଛି।ବିଶେଷକରି ବୁଲାଣି ଓ ବ୍ରିଜ ଅଞ୍ଚଳରେ ସତର୍କ ଡ୍ରାଇଭିଂ ଆବଶ୍ୟକ ବୋଲି ପୋଲିସ ପକ୍ଷରୁ ଆହ୍ୱାନ କରାଯାଇଛି। ପୋଲିସ ଘଟଣାର ସଠିକ୍ କାରଣ ଖୋଜିବା ପାଇଁ ତଦନ୍ତ ଜାରିରହିଛି l