19-Mar-2026

ସୁବର୍ଣ୍ଣପୁର, (ମନୋରଞ୍ଜନ ତ୍ରିପାଠୀ )
 ସୁବର୍ଣ୍ଣପୁର ଜିଲ୍ଲାପାଳ ଡ. ନୃପରାଜ ସାହୁ ଓ ଏସପି ଶ୍ରୀ ନାରାୟଣ ନାଏକ ସୋନପୁର କଲେଜ ପରିଦର୍ଶନ କରି ଗତକାଲି ପ୍ରଥମ ଥର ପାଇଁ ସୋନପୁର କଲେଜ ରେ ହୋଇଥବା ଭଙ୍ଗାରୁଜା ଘଟଣାର ସ୍ଥିତି ଅନୁଧ୍ୟାନ କରିଥିଲେ । ଓ ଏ ଘଟଣା ନିନ୍ଦନୀୟ ବୋଲି କହିଥିଲେ l ପ୍ରଥମେ ଭଙ୍ଗାରୁଜା ହୋଇଥିବା କଲେଜ୍ ଅଧ୍ୟକ୍ଷ ଙ୍କ ଅଫିସ ଓ କଲେଜ ପରିସରରେ ମଧ୍ୟ ବୁଲି ସ୍ଥିତି ଅନୁଧ୍ୟାନ କରିଥିଲେ । ପରେ କଲେଜର ନୂତନ କୋଠା ର ୧୦୩ ନଂ କକ୍ଷରେ ୧୨୦ ଜଣ ଶିକ୍ଷକ ଏବଂ ଅଣଶିକ୍ଷକ କର୍ମଚାରୀଙ୍କ ଉପସ୍ଥିତିରେ ଜିଲ୍ଲାପାଳ ଡ. ସାହୁ ଓ ଏସପି ଶ୍ରୀ ନାୟକ ଗତକାଲି ଘଟଣା ବିଷୟରେ ସମୀକ୍ଷା କରିଥିଲେ । ଜିଆଇଏ, ବ୍ଲକ୍ ଗ୍ରାଣ୍ଟ, ଏସଏସବି ଓ ମ୍ୟାନେଜମେଣ୍ଟ ଷ୍ଟାଫଙ୍କ ସହିତ ପୃଥକ ଭାବରେ ପରିଚୟ ହୋଇଥିଲେ। ଗତକାଲି ର ଗଣ୍ଡଗୋଳ ବେଳେ ଏତେ ଜଣ କର୍ମଚାରୀ ଉପସ୍ଥିତ ଥାଇ କାହିଁକି ଘଟଣା ଘଟାଇଥିବା ଛାତ୍ରଙ୍କୁ କେହି ପ୍ରତିବାଦ ନ କଲେ ବୋଲି ବିସ୍ମିତ ହୋଇଥିଲେ । ବିଗତ ୩ ବର୍ଷ ଧରି ଚାଲୁଥିବା ଏହି କଲେଜର ପରୀକ୍ଷା ହବ୍ ସେଣ୍ଟର ଦୁଇ ଦିନ  ପୂର୍ବ ରୁ ହଠାତ ବନ୍ଦ ନିର୍ଦ୍ଦେଶ ଆସିବା ଏହା ଆପଣଙ୍କ ସଫଳତା କି ବୋଲି ଜିଲ୍ଲାପାଳ ସମାଲୋଚନା କରିଥିଲେ । ଯେଉଁ ୮/୧୦ ଜଣ କର୍ମଚାରୀ ସୋନପୁର କଲେଜର ଦୁର୍ନିତି ଓ ଗଣ୍ଡଗୋଳର ପ୍ରଚ୍ଛଦ ପଟରେ  ହାତ ଅଛି  ତାହା ବିଭିନ୍ନ ସୂତ୍ର ରୁ ଆମ ପୋଲିସ ପ୍ରଶାସନ ପାଖରେ ସବିଶେଷ ରିପୋର୍ଟ ପହଞ୍ଚିଛି ଓ ଆପଣ ମାନେ ଭାବନ୍ତୁ ନାହିଁ ଯେ ଆମେ ସ୍ଥାୟୀ ଭାବରେ ଏଠାରେ ରହି ଅରାଜକତା କରିବୁ । ପ୍ରତ୍ୟେକ ଗଣ୍ଡଗୋଳ  ଘଟଣାରେ ନିଜର ଅନୁଷ୍ଠାନ ଭିତରେ ହିଁ ଗୃହଶତ୍ରୁ ରହିଥାନ୍ତି  ବୋଲି ସମସ୍ତେ ଜାଣନ୍ତି। ଆଉ ଏ ଅଶାନ୍ତ ପରିବେଶ ପାଇଁ ସେମାନେ ହିଁ ଦାୟୀ ବୋଲି କହିଥିଲେ l ଏବେ ବି ସମୟ ଅଛି ବିଶୃଙ୍ଖଳିତ ଓ ଦୁର୍ନୀତି ଗ୍ରସ୍ତ କର୍ମଚାରୀ ସୁଧୁରି ଯାଅ ବୋଲି ତାଗିଦ କରି ଛାତ୍ରଛାତ୍ରୀଙ୍କ ଭବିଷ୍ୟତ ଗଢ଼ିବାକୁ ପରାମର୍ଶ କରିଥିଲେ । ଏହି ପରିଦର୍ଶନ ତଥା ବୈଠକ ରେ ପରିଚାଳନା କମିଟି ସଭାପତି ସୁବର୍ଣ୍ଣପୁର ଏଡିଏମ (ରାଜସ୍ବ) ରାଜେନ୍ଦ୍ର ମାଝୀ, କଲେଜ ଅଧ୍ୟକ୍ଷ ରାଧାକାନ୍ତ ନାଏକ, ଅଧ୍ୟାପକ ଓ ଆଲୁମିନୀ ସଂଘ ସମ୍ପାଦକ ଭାରତ ଭୂଷଣ ଦାଶ ଙ୍କ ସହିତ କଲେଜ କର୍ମଚାରୀ ପ୍ରମୁଖ ଉପସ୍ଥିତ ଥିଲେ ।