19-Mar-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗୀର ଜିଲ୍ଲାର ଦୁଇପ୍ରମୁଖ ପ୍ରସଙ୍ଗ ଯଥା ଲୋୟରସୁକତେଲ ଜଳସେଚନପ୍ରକଲ୍ପରେ ଜଳସେଚନ ଓ ବିସ୍ଥାପନସମସ୍ୟା ଏବଂ ଖଣିଖନନ ବିଷୟରେ ଓଡିଶା ବିଧାନସଭାରେ ଆଲୋଚନା ହୋଇଛି । ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ ଜଳସେଚନବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ମୋହନଚରଣ ମାଝୀ ଓ ଖଣି ଓ ଇସ୍ପାତମନ୍ତ୍ରୀ ବିଭୁତିଭୁଷଣ ଜେନାଙ୍କ ପ୍ରଶ୍ନ କରିଛନ୍ତି । ବିଧାୟକ ଶ୍ରୀ ସିଂଦେଓ ପ୍ରଶ୍ନକରିଥିଲେ ଯେ,ଲୋୟରସୁକତେଲ ଜଳସଚେନ ପ୍ରକଲ୍ପରେ ବ୍ୟୟଅଟକଳ କେତେ ବଢିଛି ଓ କେତେ ଜମିକୁ ଜଳସେଚନ ବ୍ୟବସ୍ଥା କରାଯାଇଛି । ଏହା ସହିତ କେତେ ବିସ୍ଥାପିତ ପରିବାରକୁ କ୍ଷତିପୂରଣ ଦେଇ ଥଇଥାନ କରାଯାଇଛି ଓ ଆଉ କେତେ ବାକି ଲୋକଙ୍କୁ ଥଇଥାନ କରିବାର ଅଛି । ଏହାର ଉତ୍ତରରେ ମୁଖ୍ୟମନ୍ତ୍ରୀ ତଥା ଜଳସେଚନ ବିଭାଗ ଦାୟିତ୍ୱରେ ଥିବା ମୋହନଚରଣ ମାଝୀ ଉତ୍ତର ରଖିଛନ୍ତି ଯେ,ଲୋୟରସୁକତେଲ ପ୍ରକଲ୍ପର ମୂଳଅଟକଳ ୨୧୭ କୋଟିରେ ଥିଲା । ତୃତୀୟଥର ପାଇଁ ଏହାର ଅଟକଳ ବଢି ଏବେ ୫୨୬୦ କୋଟି ଟଙ୍କାରେ ପହଞ୍ଚିଛି । ପ୍ରକଲ୍ପକାମ ୯୮% ସରିଛି ଓ ଆସନ୍ତା ୨୦୨୬ ଖରିଫରେ ଜିଲ୍ଲାର ୩୦,୯୬୫ ହେକ୍ଟର ଜମିକୁ ଜଳସେଚିତ କରିବାକୁ ପ୍ରସ୍ତୁତି ହୋଇଛି । ଏହି ପ୍ରକଲ୍ପରେ ମୋଟ୧୩,୬୦୭ ଏକର ଜମି ଅଧିଗ୍ରହଣ କରାଯାଇଛି । ସେଥିରେ ୧୫ଟି ଗ୍ରାମର ୫,୪୪୯ ଏକର ଜମିକୁ  ୧୮୯୪ ଜମିଅଧିଗ୍ରହଣ ଆଇନରେ ଓ ୧୪ ଗ୍ରାମର ୪,୪୪୫ ଏକର ଜମିକୁ ୨୦୧୩ ଜମିଅଧିଗ୍ରହଣ ଆଇନ ଅନୁଯାୟୀ ଅଧିଗ୍ରହଣ କରାଯାଇଛି । ମୋଟ ୨୯ ଖଣ୍ଡ ଗ୍ରାମର ୧୧,୦୨୧ ପରିବାରକୁ ବିସ୍ଥାପିତ କରାଯାଇଛି । ବାକି କୁମିଆଁପାଲି ଗ୍ରାମର ୧୧୮ଟି ଆଦିବାସୀ ପରିବାରକୁ କ୍ଷତିପୂରଣ ଦେଇ ଥଇଥାନ କରାଯିବାକୁ କାର୍ଯ୍ୟଚାଲିଛି ବୋଲି ମୁଖ୍ୟମନ୍ତ୍ରୀ ଉତ୍ତର ରଖିଛନ୍ତି । ସେହିପରି ବଲାଙ୍ଗୀର ଜିଲ୍ଲାରେ ଜଳସେଚନହାର ବଢାଇବାକୁ ୧୬ଟି ବୃହତଉଠାଜଳସେଚନ ପ୍ରକଲ୍ପ ଯାହାକି ୧୭,୯୨୮ ହେକ୍ଟର ଜମିକୁ ଜଳସେଚିତ କରିବ କାମ ଚାଲିଛି । ୧୨୫ଟି କ୍ଷୁଦ୍ରଜଳସେଚନ ପ୍ରକଲ୍ପର ଉନ୍ନୟନକାମ ସହିତ ୫୪୫ ଚେକଡ୍ୟାମ ନିର୍ମାଣ ହୋଇଥିବା ବେଳେ ଆଉ ୬ଟି ଏମଆଇପି ଓ ୬୬ ଚେକଡ୍ୟାମ ନିର୍ମାଣ ଚାଲିଛି । ଏହା ଫଳରେ ମୋଟ ୨୪ ହଜାର ହେକ୍ଟରଜମିକୁ ଜଳସେଚନ କରାଯିବ । ବଲାଙ୍ଗୀର ଜିଲ୍ଲାର ବେଲପଡାରେ ଲୋୟରଲାନ୍ଥ ଡେମ ନିର୍ମାଣକାମ ଆରମ୍ଭ ହୋଇଛି ଯାହାକି ଆଗକୁ ୩୯୯୦ ହେକ୍ଟର ଜମିକୁ ଜଳସେଚିତ କରିବ ବୋଲି ଉତ୍ତର ମିଳିଛି । ଠିକ ସେହିପରି ଖଣିଖନନ ପ୍ରସଙ୍ଗରେ କଳିକେଶ ପଚାରିଥିବା ପ୍ରଶ୍ନର ଉତ୍ତରରେ ଖଣି ଓ ଇସ୍ପାତମନ୍ତ୍ରୀ ବିଭୁତିଭୂଷଣ ଜେନା କହିଛନ୍ତି ଯେ,ବଲାଙ୍ଗୀର ଜିଲ୍ଲାରେ ଏପର୍ଯନ୍ତ କେନ୍ଦ୍ରସରକାର ସାଲେପାଲି ଗ୍ରାଫାଇଟ ବ୍ଲକ,ଭରତବାହାଲ ଗ୍ରାଫାଇଟ ଓ ମାଙ୍ଗାନିଜ ବ୍ଲକ,ଲରମ୍ଭା ଗ୍ରାଫାଇଟ ଓ ମାଙ୍ଗାନିଜବ୍ଲକ,କନାଇଟାଲ ଗ୍ରାଫାଇଟ ଓ ମାଙ୍ଗାନିଜ ବ୍ଲକ ଏବଂ ରାଜ୍ୟସରକାର ତେଲିପଦର ପିପଲମୁଣ୍ଡା ଲୁକାପଡା ଚୁନପଥର ଖଣିକୁ ନିଲାମ କରିଛନ୍ତି ବୋଲି ଉତ୍ତର ରଖିଛନ୍ତି ।  ଏପର୍ଯ୍ୟନ୍ତ ରାଜ୍ୟରେ କେନ୍ଦ୍ର ଓ ରାଜ୍ୟସରକାର ମିଶି ୧୨ଟି ଖଣି ନିଲାମ କରିସାରିଥିବା ବେଳେ ଆଉ ୧୨ଟି ଲଘୁଖଣି ନିଲାମ ପାଇଁ ଗତ ୪.୧୨.୨୦୨୫ରେ ନୋଟିସ ବାହାର କରିଛନ୍ତି । ଠିକ ସେହିପରି ୨୦୨୫-୨୬ରେ ଆଉ ୧୧ଟି ବଡ ଖଣି ନିଲାମ ପାଇଁ ଉଦ୍ୟମ ଚାଲିଛି ବୋଲି ଉତ୍ତର ରଖିଛନ୍ତି । ଲଘୁଖଣିଜ ସମ୍ପଦ ଚୋରୀ ରୋକିବାକୁ ବଲାଙ୍ଗୀର ଜିଲ୍ଲାରେ ୫୫ଟି ପଥରକ୍ୱାରୀ ଓ ସୋନପୁର ଜିଲ୍ଲାର ୪ଟି ପଥରକ୍ୱାରୀରେ ଚଢାଉ କରାଯାଇ ନୋଟିସ କରିବା ସହିତ ଫାଇନ ମଧ୍ୟ ଅଦାୟ କରାଯାଇଛି । ଠିକ ସେହିପରି ଗତ ୨୦୨୪-୨୫ରେ ବଲାଙ୍ଗୀର ସର୍କଲ ପକ୍ଷରୁ ବିଭିନ୍ନ କ୍ରସର ଉପରେ ମଧ୍ୟ ଚଢାଉ କରାଯାଇଛି ବୋଲି ଉତ୍ତର ଦିଆଯାଇଛି ।