18-Mar-2026

ବିନିକା(ହିମାଂଶୁ ଶେଖର ପୁଟେଲ)ବିନିକା -ଏସ ରାମପୁର ମୁଖ୍ୟ ରାସ୍ତାରେ ଏକ ଟ୍ରକ ଧକ୍କାରେ ଜଣେ ବାଇକ ଆରୋହୀଙ୍କ ମୃତ୍ୟୁ ଘଟିଥିବା ବେଳେ ଆଉ ଜଣେ ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି ।ମିଳିଥିବା ସୂଚନା ମୁତାବକ ବିନିକା ବ୍ଲକ ସିଂହିଜୁବା ଗ୍ରାମର ତ୍ରିପୁରା ବାଗ(୫୫) ଓ ତାଙ୍କର ସାଥୀ ପ୍ରଭାତ ସିଂ ବାଇକ ନଂ OD OS 1288 ଯୋଗେ କୌଣସି କାମରେ ତହସିଲ ଅଫିସରୁ କାମସାରି ବିନିକା - ଏସ ରାମପୁର ମୁଖ୍ୟ ରାସ୍ତାରେ ଫେରୁଥିଲେ।  ଜାମପାଲି ଛକ ସ୍ଥିତ ମା ମାହେଶ୍ୱରୀ କଲେଜ ସମ୍ମୁଖରେ ତାଙ୍କ ପଛ ପଟୁ ଆସୁଥିବା ଟ୍ରକ ନଂ   OD 02 AY 6302 ବାଇକ ଆରୋହୀଙ୍କୁ ଧକ୍କା ଦେଇ ଭାରସାମ୍ୟ ହରାଇ ଚାଷ ଜମି ଭିତରକୁ ଚାଲିଯାଇ ଓଲଟି ପଡିଥିଲା ଫଳରେ ବାଇକରେ ଥିବା ତ୍ରିପୁରା ବାଗ ଓ ପ୍ରଭାତ ସିଂ ଗୁରୁତର ଆହତ ହୋଇ ଛିଟିକି ପଡ଼ିଥିଲେ।ଘଟଣା ପରେ ବିଲରେ କାମ କରୁଥିବା ଲୋକେ ତତକ୍ଷଣାତ ଆହତଙ୍କୁ ଉଦ୍ଧାର କରି ଆମ୍ବୁଲାନ୍ସ ସହାୟତାରେ ଚିକିତ୍ସା ପାଇଁ ଡୁଙ୍ଗୁରିପାଲି ଡ଼ାକ୍ତରଖାନାକୁ ପଠାଇଥିଲେ ।ହେଲେ ଚିକିତ୍ସାଧୀନ ଅବସ୍ଥାରେ ତ୍ରିପୁରାରୀଙ୍କ ମୃତ୍ୟୁ ଘଟିଥିଲା ଅନ୍ୟ ଆହତ ବ୍ୟକ୍ତି ପ୍ରଭାତ ସିଂ ବରପାଲି ଡାକ୍ତରଖାନାରେ ଚିକିତ୍ସିତ ହେଉଛନ୍ତି।ଟ୍ରକଟି ଖୋର୍ଦ୍ଧାରୁ ରାସନ ସାମଗ୍ରୀ ଧରି ଆସୁଥିଲା । ଘଟଣାସ୍ଥଳରେ ବିନିକା ପୋଲିସ ପହଂଚି ଅଧିକ ତଦନ୍ତ ଜାରି ରଖିଥିବା ଜଣାପଡ଼ିଛି ।