11-Mar-2026

ଲୋଇସିଂହା, (ପ୍ରେରଣା ଖବର) ସୂଚନା ରୁ ପ୍ରକାଶ ଯେ ବଲାଙ୍ଗୀର ଜିଲ୍ଲା ଲୋଇସିଂହା ଥାନା ସାହାଜଛାପର ଗ୍ରାମରୁ ଗତବର୍ଷ ଅକ୍ଟୋବର ମାସରେ ଏକ ଟ୍ରାକ୍ଟର ଇଂଜିନ ଚୋରୀ ହୋଇଥିବା ନେଇ ଥାନାରେ ଅଭିଯୋଗ ହୋଇଥିଲା । ପୋଲିସ ଉକ୍ତ ଘଟଣାର ତଦନ୍ତ ଜାରି ରଖିଥିବା ବେଳେ ଚୋରୀ ଟ୍ରାକ୍ଟର ଇଂଜିନ କୁ ଉଦ୍ଧାର କରିବା ସହ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି l ସେମାନେ ହେଲେ ସୋନପୁର ଜିଲ୍ଲା ବିନିକା ଥାନା ବିଶାଲପାଲି ଗ୍ରାମର ରୁଦ୍ର ପେରା(୨୧), ଗଦାଧର ଗ୍ରାମର ସୁନିଲ ବାଙ୍କୀ(୨୩), ପିତେଇପାଲି ଗ୍ରାମର ଦୀପକ ଦୀପ, ଆଖିଦାଦର୍ ଗ୍ରାମର ଜୟ ସାଗର(୩୭) ଓ ବରଗଡ଼ ଜିଲ୍ଲା ଗୋଡଭଗାର ପିଚକୁଲା ଶ୍ରିହରି(୩୮) । ବିଶ୍ଵସ୍ତ ସୂତ୍ରରୁ ଖବର ପାଇ ଲୋଇସିଂହା ଥାନାଧିକାରୀ ଶିପୋରା ସରାୟା ଲୁଗୁନଙ୍କ ନେତୃତ୍ୱରେ ଏଏସଆଇ ଶ୍ରୀନିବାସ ବିଶ୍ଵାଳ, ହାବିଲଦାର ରଜନୀକାନ୍ତ ବଗର୍ତ୍ତି, ମଦନ ମୋହନ ସାହୁ, ବଳରାମ ପୂଜାହାରି, ସୁରେନ୍ଦ୍ର ମିଶ୍ର, ଶଙ୍କର ମାଢି, ମାନସ କବାସି ପ୍ରମୁଖ ଭିନ୍ନଭିନ୍ନ ସ୍ଥାନରେ ଚଢାଉ କରିଥିଲା l ଚଢ଼ାଉ କରି ଅଭିଯୁକ୍ତ ମାନଙ୍କୁ ଗିରଫ କରିବା ସହିତ ଟ୍ରାକ୍ଟର ଇଂଜିନ କୁ ଆନ୍ଧ୍ରରୁ ଉଦ୍ଧାର କରିଥିବା ଜାଣିବାକୁ ମିଳିଛି l ବଲାଙ୍ଗୀର ସଦର ଥାନା ହରିପାଲି ନିବାସୀ ଜମିଦାର ପଧାନ ତାଙ୍କ ଟ୍ରାକ୍ଟର (ଓଡ଼ି ୦୩ ଏବି ୯୬୪୦)କୁ ଚାଷକାମ ପାଇଁ ସାହାଜଛାପର ଗ୍ରାମରେ ରଖିଥିବା ବେଳେ ସେଠାରୁ ଟ୍ରାକ୍ଟରଟି ଚୋରୀ ହୋଇଥିଲା l ଟ୍ରାକ୍ଟର ଚୋରି ହୋଇଥିବା ଜାଣିବାକୁ ପାଇ ଜମିଦାର ସେହି ମୁହୂର୍ତ୍ତ ରେ ଲୋଇସିଂହା ଥାନାର ଦ୍ୱାରସ୍ଥ ହୋଇଥିଲେ l ଗିରଫ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯାଇଥିବା ଲୋଇସିଂହା ଥାନାଧିକାରୀ ସୂଚନା ଦେଇଛନ୍ତି l