25-Feb-2026

ବଲାଙ୍ଗିର(ପ୍ରେରଣା ଖବର): ରାଜ୍ୟସଭା ସାଂସଦ ନିରଞ୍ଜନ ବିଶି କେନ୍ଦ୍ର ବସ୍ତ୍ର ମନ୍ତ୍ରୀ ଗିରିରାଜ ସିଂହଙ୍କୁ ବଲାଙ୍ଗିର ଜିଲ୍ଲାର ପାଟଣାଗଡ ଉପଖଣ୍ଡ ରେ ସମ୍ପୂର୍ଣ୍ଣ ଏକୀକୃତ ବସ୍ତ୍ର କାରଖାନା ସ୍ଥାପନ ପାଇଁ ବିଶେଷ ପରିକଳ୍ପନା ପ୍ରସ୍ତୁତ କରିବାକୁ ଅନୁରୋଧ କରିଛନ୍ତି। ସେ କହିଛନ୍ତି ଯେ, ଏହି ପ୍ରକଳ୍ପ ଅଞ୍ଚଳର ଅର୍ଥନୀତି ଓ ବସ୍ତ୍ର ଶିଳ୍ପକୁ ନୂଆ ଦିଗ ଦେଇପାରିବ।
୨୫ ଜୁଲାଇ ୨୦୨୫ ତାରିଖରେ ଲେଖା ଚିଠିରେ ସାଂସଦ ଉଲ୍ଲେଖ କରିଛନ୍ତି ଯେ ବଲାଙ୍ଗିର ଜିଲ୍ଲାରେ ବ୍ୟାପକ ଭାବରେ ଉତ୍କୃଷ୍ଟ ମାନର କପା ଉତ୍ପାଦନ ହେଉଛି। ତେଣୁ ଫାଇବରରୁ ସୁତl, ସୁତlରୁ ବସ୍ତ୍ର ଓ ବସ୍ତ୍ରରୁ ପୋଶାକ ପର୍ଯ୍ୟନ୍ତ ସମ୍ପୂର୍ଣ୍ଣ ମୂଲ୍ୟ ଶୃଙ୍ଖଳାକୁ ଆବର୍ତ୍ତିତ କରିଥିବା ଏକ ବସ୍ତ୍ର କାରଖାନା ସ୍ଥାପନ ହେଲେ ଓଡ଼ିଶା କପା ଆଧାରିତ ଶିଳ୍ପରେ ଅଗ୍ରଣୀ  ହୋଇପାରିବ।
ସେ ଆହୁରି କହିଛନ୍ତି ଯେ, ଏପରି ପ୍ରକଳ୍ପ ରୋଜଗାର ସୃଷ୍ଟି କରିବା ସହିତ ଅନ୍ୟ ରାଜ୍ୟକୁ ଶ୍ରମିକ ଚାଲାଣ ହ୍ରାସ କରିବ ଓ ପଶ୍ଚିମ ଓଡ଼ିଶାର ସାମାଜିକ-ଆର୍ଥିକ ପରିସ୍ଥିତିରେ ସୁଧାର ଆଣିବ। ପ୍ରତ୍ୟେକ ପର୍ଯ୍ୟାୟରେ ମୂଲ୍ୟ ବୃଦ୍ଧି ହେବା ଏବଂ କପା କଚ୍ଚା ମାଳର ମୂଲ୍ୟ ବଢ଼ିବ ଓ ସ୍ଥାନୀୟ ଚାଷୀ, ଯୁବକ ପାଇଁ ବ୍ୟାପକ ଚାକିରି ସୃଷ୍ଟି ହେବ।
ଏକୀକୃତ କାରଖାନା ସ୍ଥାପିତ ହେଲେ ଉଚ୍ଚ ମାନଙ୍କର ଗୁଣନିୟନ୍ତ୍ରଣ ସମ୍ଭବ ହେବ ଏବଂ ଦେଶୀୟ ଓ ଆନ୍ତର୍ଜାତୀୟ ବଜାରରେ ପ୍ରତିସ୍ପର୍ଧା କରିପାରୁଥିବା ଉତ୍ତମ ମାନର ବସ୍ତ୍ର ଉତ୍ପାଦନ ସମ୍ଭବ ହେବ ବୋଲି ସାଂସଦ ଶ୍ରୀ ବିଶି ଉଲ୍ଲେଖ କରିଛନ୍ତି।
ସାଂସଦ ଶ୍ରୀ ବିଶି ରପ୍ତାନି ସମ୍ଭାବନା ଉପରେ ମଧ୍ୟ ଜୋର ଦେଇ କହିଛନ୍ତି ଯେ, ରାଜ୍ୟ ମଧ୍ୟରେ ସମ୍ପୂର୍ଣ୍ଣ ମୂଲ୍ୟ ଶୃଙ୍ଖଳା ରହିଲେ ବିଦେଶୀ କ୍ରେତା ଓ ପୁଞ୍ଜିନିବେଶକମାନେ ଆକୃଷ୍ଟ ହେବେ ଓ ଦେଶର ବୈଦେଶିକ ମୁଦ୍ରା ଆୟ ବୃଦ୍ଧି ପାଇବ।
ପ୍ରସ୍ତାବିତ ପ୍ରକଳ୍ପରେ ପରିବେଶବାନ୍ଧବ ପ୍ରଯୁକ୍ତି, ଅବଶିଷ୍ଟ ପରିଚାଳନା ପ୍ରଣାଳୀ ଓ ନବୀକରଣଯୋଗ୍ୟ ଶକ୍ତି ବ୍ୟବହାରକୁ ଗୁରୁତ୍ୱ ଦେବାକୁ ସେ ସୁପାରିଶ କରିଛନ୍ତି। ଏହା ସହିତ ସୁତl କାଟିବା, ବୁଣିବା , ରଙ୍ଗ କରିବା,ଛପାଇ ଓ ପୋଶାକ ତିଆରି କ୍ଷେତ୍ରରେ କୌଶଳ ବିକାଶ ଓ ପ୍ରଯୁକ୍ତିଗତ ଉନ୍ନତି ସମ୍ଭବ ହେବ ବୋଲି ସାଂସଦ ବିଶି କହିଛନ୍ତି।