25-Feb-2026

(ତ୍ରିନାଥ ବେଶ୍ରା )
  ରାୟଗଡା ଜିଲ୍ଲାର ବିଷମକଟକଠାରେ ଆତ୍ମଶକ୍ତି ଟ୍ରଷ୍ଟ ପକ୍ଷରୁ ଏକ ଐତିହାସିକ ଗ୍ରାମୀଣ ଚର୍ଚା କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଏହି ବୃହତ୍ତ କାର୍ଯ୍ୟକ୍ରମରେ ଦେଶର ୭ ଗୋଟି ରାଜ୍ୟରୁ ଆଗତ ଆଦିବାସୀ ପ୍ରତିନିଧି, ମହିଳା ଶ୍ରମଜିବି ମଞ୍ଚ ଓଡ଼ିଶା ଏବଂ ଓଡ଼ିଶା ଶ୍ରମଜିବି ମଞ୍ଚ ଅଧୀନ ୨୦ ଗୋଟି ଜିଲ୍ଲାର ସ୍ତରୀୟ ସଂଗଠନର କର୍ମକର୍ତ୍ତାମାନେ ଯୋଗଦେଇଥିଲେ।ଏହି ଚର୍ଚାର ମୂଳ ଲକ୍ଷ୍ୟ ଥିଲା ଆଦିବାସୀ ସମ୍ପ୍ରଦାୟର ଲୋପପ୍ରାୟ ପରମ୍ପରା, କୃଷି, ଖାଦ୍ୟାଭ୍ୟାସ ଏବଂ ସ୍ୱାସ୍ଥ୍ୟ ଜ୍ଞାନକୌଶଳର ସୁରକ୍ଷା ଓ ପୁନରୁଦ୍ଧାର। ଗତ ନଭେମ୍ବର ମାସରେ ଆରମ୍ଭ ହୋଇଥିବା 'ପରମ୍ପରା ବିକାଶ ଯାତ୍ରା' ଅନ୍ତର୍ଗତ ଏହି ଜ୍ଞାନକୌଶଳଗୁଡ଼ିକୁ 'ଜ୍ଞାନପେଡ଼ି'ରେ ସଂଗ୍ରହ କରାଯାଇଥିଲା। ଆଜିର ଗ୍ରାମୀଣ ଚର୍ଚାରେ ଏହି ସଂଗୃହୀତ ଜ୍ଞାନକୁ ଦୈନନ୍ଦିନ ଜୀବନରେ ଅଭ୍ୟାସ କରିବା ପାଇଁ ଉପସ୍ଥିତ ସମସ୍ତେ ସାମୁହିକ ଶପଥ ଗ୍ରହଣ କରିଥିଲେ।
ଏହି ଅବସରରେ ମୁଖ୍ୟ ଅତିଥି ଭାବରେ ଆତ୍ମ ଶକ୍ତି ଟ୍ରଷ୍ଟର ଅଧ୍ୟକ୍ଷା ଶ୍ରୀମତୀ ରୁଚି କଶ୍ୟପ, ବିଷମକଟକ ବ୍ଲକ୍ ଉନ୍ନୟନ ଅଧିକାରୀ, ଥାନା ଭାରପ୍ରାପ୍ତ ଅଧିକାରୀ, DIET ର ଅଧ୍ୟକ୍ଷ ପ୍ରମୁଖ ଯୋଗଦେଇ ଆଦିବାସୀ ସଂସ୍କୃତିର ସୁରକ୍ଷା ଉପରେ ଗୁରୁତ୍ୱାରୋପ କରିଥିଲେ।

ବିଭିନ୍ନ ଆଦିବାସୀ ସମ୍ପ୍ରଦାୟର ନେତା ଏବଂ ବହୁ NGO ର ପ୍ରତିନିଧିମାନେ ମଧ୍ୟ ଏଥିରେ ସାମିଲ ହୋଇଥିଲେ।
କାର୍ଯ୍ୟକ୍ରମର ଏକ ଆକର୍ଷଣ ଥିଲା ବିଭିନ୍ନ ଷ୍ଟଲ୍ ମାଧ୍ୟମରେ ଆଦିବାସୀ ସମ୍ପ୍ରଦାୟର ସ୍ୱାସ୍ଥ୍ୟ, କୃଷି, ପାରମ୍ପରିକ ଖାଦ୍ୟ, ବିହନ ସଂରକ୍ଷଣ, ପାରମ୍ପରିକ ଖେଳ ଏବଂ ସାଂସ୍କୃତିକ ବିଷୟବସ୍ତୁର ଜୀବନ୍ତ ପ୍ରଦର୍ଶନ। ଏହି ଷ୍ଟଲ୍ ଗୁଡ଼ିକ ଆଦିବାସୀ ଜୀବନଶୈଳୀର ଏକ ଝଲକ୍ ଦେଖାଇଥିଲା। ଏଥିସହିତ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇ ବିଜେତାମାନଙ୍କୁ ପୁରସ୍କୃତ କରାଯାଇଥିଲା।
ଏହି ତିନିଦିନିଆ କାର୍ଯ୍ୟକ୍ରମର ସଫଳ ପରିଚାଳନା ଓ ଶୃଙ୍ଖଳା ପାଇଁ ବିଷମକଟକ ପୋଲିସ ପ୍ରଶାସନଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ଶାନ୍ତି ଶୃଙ୍ଖଳା ରକ୍ଷା କରିଥିବାରୁ ଆୟୋଜକ ପକ୍ଷରୁ ପୋଲିସ ପ୍ରଶାସନଙ୍କୁ ଧନ୍ୟବାଦ ଅର୍ପଣ କରାଯାଇଥିଲା।
ଏହି ଆଦିବାସୀ ଜ୍ଞାନ ପରମ୍ପରାକୁ ସ୍ୱୟଂଚାଳିତ କରିବା ଏବଂ ଏହାର ପ୍ରସାର ପାଇଁ ୭ ଗୋଟି ରାଜ୍ୟରୁ ୧୯ ଜଣ ଲୋକଙ୍କୁ ନେଇ ଏକ କାର୍ଯ୍ୟକାରୀ କମିଟି ମଧ୍ୟ ଗଠନ କରାଯାଇଛି l 
ଉଲ୍ଲେଖଯୋଗ୍ୟ ଯେ, ରାୟଗଡା ସ୍ଥାନୀୟ ଜନ ଜାଗରଣ ସଂଗଠନ ଦୂରଦୂରାନ୍ତରୁ ଆସିଥିବା ଅତିଥିମାନଙ୍କ ରହିବା, ଖାଇବା ଓ ସମସ୍ତ ପରିଚାଳନା ଦାୟିତ୍ୱ ବହନ କରି କାର୍ଯ୍ୟକ୍ରମକୁ ସଫଳ କରିବାରେ ମୂଖ୍ୟ ଭୂମିକା ତୁଲାଇଥିଲେ।