03-Feb-2026

କାଲିମେଳା(ସନ୍ତୋଷ କୁମାର ପଣ୍ଡା): ଜିଲ୍ଲାର ସାଂସ୍କୃତିକ ଗଣପର୍ବ ‘ମାଲ୍ୟବନ୍ତ ମହୋତ୍ସବ’ ସମୟରେ ଶାନ୍ତିଶୃଙ୍ଖଳା ରକ୍ଷାକୁ ନେଇ ପୋଲିସ ଓ ପ୍ରଶାସନ ପକ୍ଷରୁ କଡ଼ା ପଦକ୍ଷେପ ଗ୍ରହଣ କରାଯାଇଛି। ମହୋତ୍ସବର ତୃତୀୟ ଦିନରେ ମଦ ବିକ୍ରି ଓ ସରବରାହ ବିରୋଧରେ ଲଗାତାର ଅଭିଯାନ ଚାଲିଛି।ଗତକାଲି ରାତିରେ ଏମଭି–୭୯ ଥାନା ଅଞ୍ଚଳରେ ପୋଲିସ ଚେକିଂ ସମୟରେ ପ୍ରାୟ ୩୫ ଲିଟର ଫରିନ୍ ଲିକର (ଏଫ୍‌ଏଲ୍) ଜବତ କରାଯାଇଛି। ଏହି ଘଟଣାରେ ତାଣ୍ଡାବାଇ ଗାଁର ଏନକା ସୋନ୍ଧି ନାମକ ଜଣେ ଅଭିଯୁକ୍ତକୁ ପୋଲିସ ଗିରଫ କରିଛି। ଏନେଇ କେସ୍ ନମ୍ବର ୨୧/୨୦୨୬ ରେ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।ସୂଚନା ଅନୁଯାୟୀ, ପୋଲିସ ଅଧିକାରୀ ଶ୍ରୀଚନ୍ଦନ ବେହେରାଙ୍କ ନେତୃତ୍ୱରେ ଏକ ଟିମ୍ ତାଣ୍ଡାବାଇ ଅଞ୍ଚଳରେ ଅବୈଧ ମଦ ବିକ୍ରି ସମ୍ବନ୍ଧୀୟ ଗୁପ୍ତ ସୂଚନା ପାଇ ଚଢ଼ାଉ କରିଥିଲେ। ଚଢ଼ାଉ ସମୟରେ ଅଭିଯୁକ୍ତଙ୍କ ହାତରୁ ଅଧିକ ପରିମାଣର ମଦ ଜବତ କରାଯାଇଥିଲା।ଏହା ପୂର୍ବରୁ କାଲିମେଳା ଥାନା ଅଞ୍ଚଳରେ ମଧ୍ୟ ମଦ ଚୋରାଚାଲାଣ ଅଭିଯୋଗରେ ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରିଥିବା ସୂଚନା ମିଳିଛି। ଦୁଇ ଥାନା ଅଞ୍ଚଳରେ ଲଗାତାର ଚାଲିଥିବା ଏହି କାର୍ଯ୍ୟାନୁଷ୍ଠାନ ମହୋତ୍ସବ ସମୟରେ ମଦ ବ୍ୟବସାୟ ଉପରେ ପ୍ରଶାସନର କଡ଼ା ନଜରକୁ ସ୍ପଷ୍ଟ କରୁଛି।ମହୋତ୍ସବକୁ ଦୃଷ୍ଟିରେ ରଖି ଜିଲ୍ଲାପାଳ ସୋମେଶ କୁମାର ଉପାଧ୍ୟାୟଙ୍କ ନିର୍ଦ୍ଦେଶ କ୍ରମେ ଜିଲ୍ଲାର ସମସ୍ତ ଲାଇସେନ୍ସପ୍ରାପ୍ତ ମଦ ଦୋକାନ ଜାନୁଆରୀ ୨୯ ତାରିଖରୁ ଫେବୃଆରୀ ୫ ପର୍ଯ୍ୟନ୍ତ ବନ୍ଦ ରଖାଯାଇଛି। ଏହା ସହ ଜିଲ୍ଲା ସୀମା ବାହାରୁ ମଦ ପ୍ରବେଶ, ସଂଗ୍ରହ ଓ ସରବରାହ ଉପରେ ସମ୍ପୂର୍ଣ୍ଣ ନିଷେଧାଜ୍ଞା ଜାରି କରାଯାଇଛି।ସୂଚନାଯୋଗ୍ୟ ଯେ, ମଦ ବନ୍ଦ ହେବାର ସୂଚନା ପୂର୍ବରୁ ମିଳିଥିବାରୁ କିଛି ଗ୍ରାମାଞ୍ଚଳର ମଦ ବ୍ୟବସାୟୀ ଆଗରୁ ଅଧିକ ପରିମାଣରେ ମଦ କିଣି ମହଜୁଦ ରଖିଥିବା ସୂଚନା ମିଳିଛି। ବର୍ତ୍ତମାନ ସେହି ମଦକୁ ଅଧିକ ଦରରେ ଗୁପ୍ତ ଭାବେ ବିକ୍ରି କରାଯାଉଥିବା ଅଭିଯୋଗ ଉଠିଛି। ଏନେଇ ପୋଲିସ ଆହୁରି କଡ଼ା ଯାଞ୍ଚ କରି ଏପରି ଅବୈଧ କାରବାରକୁ ସମୂଲେ ବନ୍ଦ କରିବା ଆବଶ୍ୟକତା ରହିଛି।ସୂତ୍ରରୁ ପ୍ରକାଶ ଯେ, ମାଲ୍ୟବନ୍ତ ମହୋତ୍ସବ ଫେବୃଆରୀ ୧ ତାରିଖରୁ ୫ ତାରିଖ ପର୍ଯ୍ୟନ୍ତ ଡିଏନକେ ଗ୍ରାଉଣ୍ଡରେ ଅନୁଷ୍ଠିତ ହେଉଛି। ରାଜ୍ୟର ବିଭିନ୍ନ ସ୍ଥାନରୁ କଳାକାର ଓ ଦର୍ଶକଙ୍କ ଭିଡ଼ ଜମୁଥିବାରୁ ପ୍ରଶାସନ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ା କରିଛି।
ଗତ ବର୍ଷ ମହୋତ୍ସବ ସମୟରେ ସୃଷ୍ଟି ହୋଇଥିବା ଅଶାନ୍ତିଜନକ ପରିସ୍ଥିତି, ବିଶେଷକରି ଏମଭି–୨୬ ଗ୍ରାମର ହିଂସାତ୍ମକ ଘଟଣା ପରେ ପ୍ରଶାସନ ଏଥର ଅଧିକ ସତର୍କତା ଅବଲମ୍ବନ କରିଛି।ପୋଲିସ ଓ ଜିଲ୍ଲା ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ମହୋତ୍ସବ ସମୟରେ ମଦ ବିକ୍ରି, ସରବରାହ, ସେବନ କିମ୍ବା ଶାନ୍ତିଶୃଙ୍ଖଳା ଭଙ୍ଗ କରୁଥିବା ବ୍ୟକ୍ତିଙ୍କ ବିରୋଧରେ କଠୋର କାନୁନୀ ପଦକ୍ଷେପ ନିଆଯିବ। ଆବଶ୍ୟକ ହେଲେ ଜାତୀୟ ସୁରକ୍ଷା ଆଇନ (ଏନଏସଏ) ଲାଗୁ କରାଯିବାକୁ ମଧ୍ୟ ଚେତାବନୀ ଦିଆଯାଇଛି।