01-Feb-2026

ସମାଧି ମନ୍ଦିର,ପାଦୁକାମନ୍ଦିର, ମ୍ୟୁଜିୟମ,ପାଣ୍ଡୁଲିପି ଦେଖିେଲେ, ଦୀପ ଜାଳିଲେ

ବଲାଙ୍ଗୀର(ପ୍ରେରଣା ଖବର)-ପବିତ୍ର ମାଘମେଳା ଅବସରରେ ସୁବର୍ଣ୍ଣପୁର ଜିଲ୍ଲା ଖଲିଆପାଲି ସ୍ଥିତ ସନ୍ଥକବି ଭୀମଭୋଇଙ୍କ ସାଧନା, ସିଦ୍ଧି ଓ ସମାଧିପୀଠକୁ ଓଡିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗସ୍ତକରି ପରିଦର୍ଶନ କରିଛନ୍ତି ଓ ସୋନପୁର ସୁଭଦ୍ରାମେଳାରେ ପୀଠ ପାଇଁ ୩୫ କୋଟି ଟଙ୍କାର ଅନୁଦାନ ଘୋଷଣା କରିଛନ୍ତି। ଏହାକୁ ନେଇ ସୁବର୍ଣ୍ଣପୁର ଜିଲ୍ଲାବାସୀ ତଥା ମହିମାଭକ୍ତଙ୍କ ମଧ୍ୟରେ ଖୁସିର ଲହର ଖେଳିଯାଇଛି । ଖଲିଆପାଲିର ଏହି ମହିମାପୀଠକୁ ପ୍ରଥମକରି ଜଣେ ମୁଖ୍ୟମନ୍ତ୍ରୀ ଆସିଥିବାରୁ ଲୋକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖାଦେଇଥିଲା ଓ ମହିମାସାଧୁସନ୍ଥଙ୍କ ସହ ପୀଠ ପରିଚାଳନା କରୁଥିବା ଭୀମଭୋଇ ସମାଧିପୀଠ ଟ୍ରଷ୍ଟର କର୍ମକର୍ତ୍ତା ମାନେ ମୁଖ୍ୟମନ୍ତ୍ରୀଙ୍କୁ ଭବ୍ୟସ୍ୱାଗତ କରିଥିଲେ ।

ସମାଧିପୀଠର ପୀଠାଧିଶ ସନ୍ୟାସୀ ବାବା ମୁଖ୍ୟମନ୍ତ୍ରୀଙ୍କୁ ମନ୍ଦିରରେ ବୁଲାଇଥିଲେ । ମୁଖ୍ୟମନ୍ତ୍ରୀ ଶ୍ରୀ ମାଝୀ ପୀଠକୁ ପହଞ୍ଚି ପ୍ରଥମେ ଘୃତଦୀପ ପ୍ରଜ୍ୱଳନ କରି ସମାଧିମନ୍ଦିର, ପାଦୁକା ମନ୍ଦିର, ମ୍ୟୁଜିୟମରେ ଥିବା ଭୀମଭୋଇଙ୍କ ପାଣ୍ଡୁଲିପି,ସନ୍ଥକବି ବ୍ୟବହାର କରୁଥିବା ତୁଳି,ତାଳପତ୍ର ଇତ୍ୟାଦି ଦେଖି ଅଭିଭୁତ ହୋଇଥିଲେ। ଏହାପରେ ସେ ପାଦୁକା ମନ୍ଦିର ସମ୍ମୁଖରେ ଭକ୍ତ ମାନଙ୍କ ଦାନରେ ନବନିର୍ମିତ ୨କ୍ୱିଣ୍ଟାଲ୧୨ କିଲୋ ୯୦୦ ଗ୍ରାମର ର ଏକ ବୃହତ ପିତ୍ତଳ  ଘଣ୍ଟିକୁ ଉଦଘାଟନ କରିଥିଲେ । ଘଣ୍ଟିକୁ ଉଦଘାଟନ କରି ପ୍ରଥମ କରି ପୀଠରେ ଦଉଡିଟାଣି ଘଣ୍ଟି ବଜାଇଥିଲେ। ଅଲେଖ ମହିମାଡାକରେ ଅଞ୍ଚଳ କମ୍ପି ଉଠିଥିଲା । ଏହି ଅବସରରେ ମୁଖ୍ୟମନ୍ତ୍ରୀ ଭୀମଭୋଇ ସମାଧି ପୀଠ ଟ୍ରଷ୍ଟର କର୍ମକର୍ତ୍ତାଙ୍କ ସହିତ ବିଭିନ୍ନ ସମସ୍ୟା ତଥା ଉନ୍ନୟନ ନେଇ ଆଲୋଚନା କରିଥିଲେ। ସମାଧି ପୀଠଟ୍ରଷ୍ଟର ମେନେଜିଂ ଟ୍ରଷ୍ଟି ଛତ୍ରଧାରୀ ଅଗ୍ରୱାଲ, ମାଘମେଳା କମିଟିର ପୂର୍ଣ୍ଣଚନ୍ଦ୍ର ବଗର୍ତ୍ତି,ବରିଷ୍ଠ ସଭ୍ୟ ମହାଦେବ ବଗର୍ତ୍ତି,ସଂପାଦକ ଜନ୍ମେଜୟ ସ୍ୱାଇଁ,ସୁମନ୍ତ ପୁଟେଲ,କାର୍ତ୍ତିକ ଭୋଇ,ପୂର୍ଣ୍ଣଚନ୍ଦ୍ର ପଣ୍ଡା,ସିଦ୍ଧାର୍ଥ

ଅଗ୍ରୱାଲ,ବିଭୁତିଭୂଷଣ ନେଗୀ ପ୍ରମୁଖ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧନା ଦେବା ସହିତ ଏକ ଦାବିପତ୍ର ପ୍ରଦାନ କରିଥିଲେ। ଏହି ଅବସରରେ ସମାଧି ପୀଠର ଫଟୋଚିତ୍ର, ଭୀମଭୋଇ ଗ୍ରନ୍ଥାବଳି, ମହିମାପତ୍ରିକା, ମେମେଣ୍ଟୋ ଓ ଉପଢୌକନ ଦେଇ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧିତ କରାଯାଇ ଥିଲା। ଆଜି ମୁଖ୍ୟମନ୍ତ୍ରୀ ମୋହନଚରଣ ମାଝୀଙ୍କର ଏହି ଗସ୍ତବେଳେବୀରମହାରାଜପୁର ବିଧାୟକ ରଘୁନାଥ ଜଗଦଲା, ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ପ୍ରଶନ୍ନ ଷଢଙ୍ଗୀ, ସୁବର୍ଣ୍ଣପୁର ଜିଲ୍ଲାପାଳ ଡ.ନୃପରାଜ ସାହୁ, ଉତ୍ତରାଞ୍ଚଳ ଆଇଜି ହିମାଂଶୁ ଲାଲ, ସୁବର୍ଣ୍ଣପୁର ଏସପି ନାରାୟଣ ନାୟକ ପ୍ରମୁଖଙ୍କ ସହିତ ଜିଲ୍ଲାସ୍ତରୀୟ ଅଧିକାରୀଗଣ ସାମିଲଥିଲେ। ଆଜି ମାଘପୂର୍ଣ୍ଣମୀ ପାଇଁ ମହିମାପୀଠକୁ ପରିଦର୍ଶନ ପାଇଁ ହଜାର ହଜାର ଭକ୍ତ ଆସିଥିବା ବେଳେ ମୁଖ୍ୟମନ୍ତ୍ରୀଙ୍କ ଗସ୍ତ ପାଇଁ ଜିଲ୍ଲାପ୍ରଶାସନ ପକ୍ଷରୁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା ।