28-Jan-2026

ବିନିକା(ହିମାଂଶୁ ଶେଖର ପୁଟେଲ)ଧାନ ବିକ୍ରିରେ ଅଚଳାବସ୍ଥା,ଟୋକନ ନ ମିଳିବା,ଧାନ ନ ଉଠିବା,କଟଣି ଛଟଣୀ,ପ୍ରଦୂଷଣ ନାଁରେ ସାଧାରଣ ଲୋକଙ୍କ ଠାରୁ ଜୋରିମାନା ଆଦାୟ,ସ୍ମାର୍ଟ ମିଟର ଲଗାଇ ବିଦ୍ୟୁତ୍ ଉପଭୋକ୍ତାଙ୍କ ଠାରୁ ମୋଟା ଅଙ୍କର ବିଲ ଆଦାୟ,ଚାଷୀ ନେତା ମାନଙ୍କ ଉପରେ ଆକ୍ରମଣ ଆଦି ପ୍ରତିବାଦରେ ନବ ନିର୍ମାଣ କୃଷକ ସଂଗଠନ ତରଫରୁ ରାଜ୍ୟ ବ୍ୟାପୀ ଦିଆଯାଇଥିବା ବନ୍ଦ ଡାକରା ବିନିକା ଅଞ୍ଚଳରେ ସମ୍ପୂର୍ଣ୍ଣ ସଫଳ ହୋଇଛି ।ସକାଳ ୬ଟା ରୁ ଦିନ ୨ଟା ପର୍ଯ୍ୟନ୍ତ ଏହି ବନ୍ଦ ଯୋଗୁଁ ରାସ୍ତାରେ ଅଖ,ଚକ ପୁରାପୁରି ଠପ ହୋଇ ପଡ଼ିଥିଲା ମୁଖ୍ୟ ରାସ୍ତାର ବିଭିନ୍ନ ସ୍ଥାନରେ ଯାନବାହନ ଅଟକି ରହିଥିଲା ।କୃଷକ ସଂଗଠନ ବନ୍ଦ ଡାକରାକୁ ସମର୍ଥନ ଜଣାଇ କଂଗ୍ରେସ କର୍ମୀ ମାନେ ସାମିଲ ହୋଇ ବିନିକା ସହର ପ୍ରମୁଖ ଛକ ମାନଙ୍କରେ ନାରାବାଜି ଦେଇ ବିକ୍ଷୋଭ ପ୍ରଦର୍ଶନ କରିଥିଲେ। ସ୍ୱତ ପ୍ରବୃତ୍ତ ଭାବେ ଲୋକେ ନିଜର ବ୍ୟବସାୟିକ ପ୍ରତିଷ୍ଠାନ ବନ୍ଦ ରଖି ବନ୍ଦ ଡାକରାକୁ ସମର୍ଥନ ଦେଇଥିବା ଦେଖିବାକୁ ମିଳିଥିଲା।କେବଳ ଜରୁରୀ କାଳୀନ ସେବାରେ ନିୟୋଜିତ ଯାନବାହାନ ଚଳାଚଳ କରୁଥିବା ବେଳେ ବାକି ଯାନବାହାନ ସମ୍ପୂର୍ଣ୍ଣ ବନ୍ଦ ରହିଥିଲା ସେହିପରି ବିବାହ,ବ୍ରତ ଆଦି ଥିବାରୁ ବିକ୍ଷୋଭ କାରୀ ଉକ୍ତ ଗାଡିଗୁଡିକ ସମ୍ମାନ ସହ ଛାଡ଼ିଦେଇଥିବା ଦେଖିବାକୁ ମିଳିଥିଲା।ତେବେ ମୋଟାମୋଟି ଭାବରେ ବିନିକା ବ୍ଲକ ଅଞ୍ଚଳର ବିଭିନ୍ନ ଗ୍ରାମରେ ମଧ୍ୟ ଏହି ବନ୍ଦର ପ୍ରଭାବ ପଡ଼ିଥିଲା ଯାହାକି ବିନିକାକୁ ସଂଯୋଗ କରୁଥିବା ଗୋଦଭାଗା,ରାମପୁର,ସୋନପୂର, ଚଡେଇପଙ୍କ ଆଦି ରାସ୍ତା ମଧ୍ୟ ଶୁନଶାନ୍ ହୋଇପଡ଼ିଥିଲା।