27-Jan-2026

କୋକସରା(ତ୍ରିନାଥ ବେଶ୍ରା)
କଳାହାଣ୍ଡି ଜିଲ୍ଲାର କୋକସରା ବ୍ଲକ ଅନ୍ତର୍ଗତ ମହିମା ପଞ୍ଚାୟତର ଡେଙ୍ଗାଗୁଡା ଗ୍ରାମସ୍ଥିତ ତେନ୍ତୁଳିପଡ଼ାରେ, ଜୟ ହିନ୍ଦ୍ ୱାରିୟର୍ସ ଯୁବ ସଂଗଠନ ପ୍ରତି ବର୍ଷ ଭଳି ଏବର୍ଷ ମଧ୍ୟ ୭୭ତମ ଗଣତନ୍ତ୍ର ଦିବସ ଉପଲକ୍ଷେ ବିଭିନ୍ନ ପ୍ରତିଯୋଗିତାମୂଳକ କାର୍ଯ୍ୟକ୍ରମ ଆୟୋଜନ କରି ଗ୍ରାମବାସୀ ଏବଂ ମହିମା ପଞ୍ଚାୟତ ଅଞ୍ଚଳର ଲୋକଙ୍କୁ ଗଣତନ୍ତ୍ର ଦିବସର ମହତ୍ତ୍ୱ ବୁଝାଇବା ସହ ଏହାର ବାର୍ତ୍ତା ପ୍ରଚାର କରିଥିଲେ l
ଉକ୍ତ କାର୍ଯ୍ୟକ୍ରମରେ ସାଧାରଣ ଜ୍ଞାନ, ବକ୍ତୃତା, ଗୀତ ଏବଂ ନୃତ୍ୟ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏଥିରେ ୯ଟି ବିଦ୍ୟାଳୟର ଛାତ୍ରଛାତ୍ରୀମାନେ ଭାଗ ନେଇଥିଲେ ଏବଂ ବିଜେତା ଛାତ୍ରଛାତ୍ରୀଙ୍କୁ ପ୍ରମାଣପତ୍ର ସହିତ ଟ୍ରଫି ପ୍ରଦାନ କରାଯାଇଥିଲା।
ଏହି ଉତ୍ସବର ମୁଖ୍ୟ ଉଦ୍ଦେଶ୍ୟ ଥିଲା ଛାତ୍ରଛାତ୍ରୀଙ୍କୁ ପ୍ରତିଯୋଗିତା ମାଧ୍ୟମରେ ଗଣତନ୍ତ୍ର ଓ ସମ୍ବିଧାନର ମୂଲ୍ୟବୋଧର ଗୁରୁତ୍ୱ ବୁଝାଇବା ଏବଂ ଜ୍ଞାନ ଆହରଣ କରିବାର ସୁଯୋଗ ଦେବା; ପୃଷ୍ଠଭୂମିରେ ଉପସ୍ଥିତ ଗ୍ରାମବାସୀ ଓ ଅଭିଭାବକମାନେ ମଧ୍ୟ ଏହି ମୂଲ୍ୟବୋଧ ବୁଝିପାରନ୍ତି। ଜୟ ହିନ୍ଦ୍ ୱାରିୟର୍ସ ସଭାପତି ଦେବାଶିଷ ମେହେର ନିଜ ଅଭିଭାଷଣରେ ଏହି ବିଷୟ ପ୍ରକାଶ କରିଥିଲେ।
ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ କୋକସରା ବ୍ଲକ ଉପାଧ୍ୟକ୍ଷ ଶ୍ରୀଯୁକ୍ତ ରାଜୀବ ଅଗ୍ରୱାଲ ଯୋଗଦାନ କରିଥିଲେ। ସେ କହିଥିଲେ, "ଆଜିକାଲି ବିଭିନ୍ନ ଗ୍ରାମରେ ମନୋରଞ୍ଜନ କାର୍ଯ୍ୟକ୍ରମ ହେଉଛି, କିନ୍ତୁ ଏଭଳି କାର୍ଯ୍ୟକ୍ରମ ଯାହା ପ୍ରତିଯୋଗିତା ଓ ମନୋରଞ୍ଜନ ମାଧ୍ୟମରେ ଗଣତନ୍ତ୍ର ଦିବସ ଓ ସମ୍ବିଧାନର ମହତ୍ତ୍ୱ ପ୍ରଚାର କରେ, ତାହା ନିଆରା। ମହିମା ପଞ୍ଚାୟତ ଅନ୍ତର୍ଗତ ଏଭଳି ଏକ ଛୋଟ ଗ୍ରାମରେ ଏହି ଆୟୋଜନ ଅତ୍ୟନ୍ତ ପ୍ରଶଂସନୀୟ।" ଶ୍ରୀଯୁକ୍ତ ଅଗ୍ରୱାଲ ଜୟ ହିନ୍ଦ୍ ୱାରିୟର୍ସ ଯୁବ ସଂଗଠନକୁ ଭୂୟସୀ ପ୍ରଶଂସା କରିଥିଲେ।

ଏହି କାର୍ଯ୍ୟକ୍ରମରେ ପୂର୍ବତନ ସରପଞ୍ଚ, କୋକସରା ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲ, ମହିମା ସରପଞ୍ଚ ଇଶ୍ଵରାମ କୋଲଥିଆ, ସମିତି ସଭ୍ୟ ଘନଶ୍ୟାମ ନାଏକ, ନାଏବ ସରପଞ୍ଚ ସୁମତି ବାଗ, ଡୁଡୁକାଠେଙ୍ଗା ନାଏବ ସରପଞ୍ଚ ଖଗେଶ୍ଵର ବାଣୁଆ, ମୋଟେର ବିଜେପି ମଣ୍ଡଳ ସଭାପତି ଧର୍ମବ୍ରତ ପଣ୍ଡା, ଆମପାଣି ବିଜେପି ମଣ୍ଡଳ ସଭାପତି ମଧୁବନ ପାତ୍ର, ନକୁଳ ନାଏକ, ମକରନ୍ଦ ବାଗ, ସନାତନ ସୁନାନୀ, ସମାଜ ସେବୀ ରାମସିଂ ମାଝୀ,  ଶମ୍ଭୁଶ୍ଵର ନାଗ ଏବଂ ବିଭିନ୍ନ ବିଦ୍ୟାଳୟର ଶିକ୍ଷକବୃନ୍ଦ ଯୋଗଦାନ କରି ଏଭଳି କାର୍ଯ୍ୟକ୍ରମ ଆୟୋଜନ କରିଥିବାରୁ ଜୟ ହିନ୍ଦ୍ ୱାରିୟର୍ସ ଯୁବ ସଂଗଠନର କର୍ମକର୍ତ୍ତାମାନଙ୍କୁ ପ୍ରଶଂସା ଓ ଧନ୍ୟବାଦ ଜଣାଇଥିଲେ।
ଉକ୍ତ କାର୍ଯ୍ୟକ୍ରମକୁ ଜୟ ହିନ୍ଦ୍ ୱାରିୟର୍ସ ସଭାପତି ଦେବାଶିଷ ମେହେର, ସମ୍ପାଦକ ଉପେନ୍ଦ୍ର ସୁନାନୀ, କାର୍ଯ୍ୟକାରୀ ସଭାପତି ଦୁରାନ୍ତସୁନାନୀ, ପବିତ୍ର ବାଣୁଆ, ଶୋଭା ମେହେର, ମର୍ଦ୍ଦରାଜ ବାଣୁଆ, ସୁବାସ ମେହେର ଆଦି ସହିତ ସଂଗଠନର ସମସ୍ତ ସଦସ୍ୟ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳତାର ସହିତ ସମ୍ପନ୍ନ କରିଥିଲେ।