10-Jan-2026

ବଲାଙ୍ଗିର(ପ୍ରେରଣା ଖବର)- ଗତ ୨୦୦୫ ମସିହାରେ ଗରୀବଙ୍କୁ କାମଧନ୍ଦା ଯୋଗାଇବାକୁ ୟୁପିଏ ସରକାର କରିଥିବା ମନରେଗା ଯୋଜନାକୁ ବନ୍ଦକରି କେନ୍ଦ୍ରର ମୋଦୀ ସରକାର ବିଭି ଜି ରାମଜୀ ଯୋଜନା କରିଛନ୍ତି । ଏହାକୁ କଂଗ୍ରେସଦଳ ପ୍ରବଳ ବିରୋଧ କରିଛି । ଆଜି ଓଡିଶା ପ୍ରଦେଶ କଂଗ୍ରେସ ସଭାପତି ଭକ୍ତଚରଣ ଦାସଙ୍କ ଆହ୍ୱାନରେ ସାରାରାଜ୍ୟରେ ଜିଲ୍ଲା କଂଗ୍ରେସ କମିଟି ମାନେ ସାମ୍ବାଦିକ ସମ୍ବିଳନୀ କରି କେନ୍ଦ୍ର ଓ ରାଜ୍ୟସରକାରଙ୍କୁ ପ୍ରବଳ ବିରୋଧ କରି ଆଗକୁ ଏକ ବଡ ଆନ୍ଦୋଳନର ଚେତାବନୀ ଦେଇଛନ୍ତି । ମନରେଗା ଯୋଜନା ବନ୍ଦର ପ୍ରତିବାଦ, ଟାଟାପାୱାର ଜରିଆରେ ଓଡିଶାର ବିଦ୍ୟୁତ ଉପଭୋକ୍ତାଙ୍କୁ ଶୋଷଣ ଓ ଠିକ ହିସାବରେ ଧାନ ନକିଣି ଚାଷୀଙ୍କୁ ଶୋଷଣ କରାଯାଉଥିବାର ପ୍ରତିବାଦରେ କଂଗ୍ରେସଦଳ ଆଜି ଗଣମାଧ୍ୟମ ଜରିଆରେ ସରକାରଙ୍କୁ ଚେତାବନୀ ଦେଇଛି । ଆଜି ସ୍ଥାନୀୟ ସାମ୍ବାଦିକ ଭବନଠାରେ ଆୟୋଜିତ ସାମ୍ବାଦିକ ସମ୍ବିଳନୀରେ ଜିଲ୍ଲା କଂଗ୍ରେସ କମିଟିର ସଭାପତି ଅନୀଳ ମେହେର, ପିସିସି ପର୍ଯ୍ୟବେକ୍ଷକ ମୂରଲୀଧର ନାଏକ, ବରିଷ୍ଠ କଂଗ୍ରେସ ନେତା ତଥା ପିସିସି ସଦସ୍ୟ ରାଧାକାନ୍ତ ନାୟକ,ପୂର୍ବତନ ମହିଳା କଂଗ୍ରେସ ସଭାନେତ୍ରୀ ମିଳନୀ ସାହୁ ଓ ପାଟଣାଗଡ ନଗର କଂଗ୍ରେସର ପୂର୍ବତନ ସଭାପତି ବିଦ୍ୟାଧର ମେହେର ପ୍ରମୁଖ ମଞ୍ଚାସୀନ ରହି ଭାଜପାର ଡବଲ ଇଞ୍ଜିନ ସରକାରକୁ ତୀବ୍ର ସମାଲୋଚନା କରିଥିଲେ। ଜିଲ୍ଲା ସଭାପତି ତାଙ୍କ ବକ୍ତବ୍ୟରେ ମନରେଗା ଯୋଜନା ବନ୍ଦ ଫଳରେ ବଲାଙ୍ଗୀର ଭଳି ଜିଲ୍ଲା ଅଧିକ କ୍ଷତିଗ୍ରସ୍ତ ହେବ ବୋଲି କହିଥିଲେ । ଏହା ସହିତ କେନ୍ଦ୍ରର ଭାଜପା ନେତୃତ୍ୱାଧିନ ଏନଡିଏ ସରକାର ଆରଏସଏସ ବିଚାରଧାରାରେ ପରିଚାଳିତ ହୋଇ ମହାତ୍ମାଗାନ୍ଧୀଙ୍କ ନାମକୁ ଲିଭାଇବାକୁ ଚେଷ୍ଟା କରିଛି । କିନ୍ତୁ ମହାତ୍ମାଗାନ୍ଧୀ ସମଗ୍ର ଦେଶବାସୀଙ୍କ ହୃଦୟରେ ରହିଛନ୍ତି । ମହାତ୍ମାଗାନ୍ଧୀଙ୍କ ବିଚାରକୁ ନେଇ ବିଜେପି ସରକାରଙ୍କ ହୀନମନ୍ୟତା ପ୍ରତିବାଦରେ କଂଗ୍ରେସ ରାଜରାସ୍ତାକୁ ଓହ୍ଲାଇବ । ମନରେଗା ଯୋଜନା ବନ୍ଦକରି ଦେଶର ଗରୀବ ଲୋକଙ୍କ ଜୀବନଜୀବିକା ସହିତ ସରକାର ଖେଳ ଖେଳିଛନ୍ତି ବୋଲି କଂଗ୍ରେସ ଅଭିଯୋଗ ଉଠାଇଛି । ମନରେଗା ଯୋଜନାରେ କେନ୍ଦ୍ର ୯୦% ଅନୁଦାନ ଦେଉଥିବା ବେଳେ ନୂତନ ବିଭିରାମଜୀ ଯୋଜନାରେ କେନ୍ଦ୍ର ମାତ୍ର ୬୦% ଅନୁଦାନ ଦେବ। ତେଣୁ ଶ୍ରମନିଯୁକ୍ତିରେ ବିସଙ୍ଗତି ଦେଖାଦେବ ବୋଲି କୁହାଯାଇଛି । ସେହିପରି ସ୍ମାର୍ଟମିଟର ଲଗାଇ ବିଦ୍ୟୁତ ଉପଭୋକ୍ତାଙ୍କୁ ଶୋଷଣ କରାଯାଉଥିବା ସହିତ ନିର୍ବାଚନବେଳେ ୩୦୦ୟୁନିଟ ବିଦ୍ୟୁତ ବିଲ୍ ଛାଡ କଥା କହି ଭାଜପା ମିଥ୍ୟା ପ୍ରତିଶୃତି ଦେଇଥିଲା ବୋଲି ସମାଲୋଚନା କରିଥିଲେ । ରାଜ୍ୟର ଚାଷୀମାନେ ମାତ୍ର ୨% ବିଦ୍ୟୁତ ଉପଯୋଗ କରୁଛନ୍ତି । ତେଣୁ ଚାଷୀଙ୍କର ବିଦ୍ୟୁତ ବିଲ୍ ଛାଡ କରି ମାଗଣାରେ ବିଜୁଳି ଯୋଗାଇ ଦେବା, ଶିଲ୍ପ ମାନଙ୍କୁ ଅଧିକ ଟେକ୍ସ ଲଗାଇବାକୁ ଦାବି କରାଯାଇଛି । ଭାଜପା ସରକାର ଶୀଲ୍ପସଂସ୍ଥାଠାରୁ ଅନୁଗ୍ରହିତ ହୋଇ ସେମାନଙ୍କ ପାଇଁ ବିଦ୍ୟୁତ ବିଲରେ ରିହାତି ଦେଉଥିବା ବେଳେ ଗରୀବ ଚାଷୀ ଓ ସାଧାରଣ ଉପଭୋକ୍ତାଙ୍କୁ ଅଧିକ ବିଲ ଲଗାଉଛନ୍ତି । ଓଡିଶାରେ କୋଇଲା ଉତ୍ପାଦନ ହୋଇ ବିଦ୍ୟୁତ ମଧ୍ୟ ଉତ୍ପାଦନ ହେଉଛି । କିନ୍ତୁ ତଥାପି ଓଡିଶାର ଉପଭୋକ୍ତା ଅଧିକମାତ୍ରାରେ ବିଦ୍ୟୁତବିଲ ଦେବାକୁ ବାଧ୍ୟହେଉଛି ବୋଲି କଂଗ୍ରେସ ନେତା ଅଭିଯୋଗ କରିଛନ୍ତି । ଠିକ ସେହିପରି ଚାଷୀଙ୍କୁ ବୋନସ ବଦଳରେ ଧାନର ଏମଏସପି ଦର ବଢାଇବାକୁ କଂଗ୍ରେସ ବହୁବର୍ଷ ହେଲା ଦାବି କରିଆସୁଛି । କିନ୍ତୁ ସରକାର ସେହି ଦାବିକୁ କର୍ଣ୍ଣପାତ ନକରି ଚାଷୀଙ୍କ ଧାନକୁ ଠିକରେ ନକିଣି ଶୋଷଣ କରୁଛି । ଏହି ସବୁଦାବିକୁ ନେଇ କଂଗ୍ରେସଦଳ ଆଗକୁ ଆନ୍ଦୋଳନକୁ ଓହ୍ଲାଇବ ଓ ମହାତ୍ମା ଗାନ୍ଧୀଙ୍କ ଆଦର୍ଶରେ ଥିବା ଲୋକମାନେ ଆରଏସଏସ ବିଚାରଧାରାରେ ବିଶ୍ୱାସ କରୁଥିବା ବିଜେପି ସରକାରଙ୍କ ବିରୁଦ୍ଧରେ ସ୍ୱରଉତ୍ତୋଳନ କରିବାକୁ ପିସିସି ପର୍ଯ୍ୟବେକ୍ଷକ ମୂରଲୀଧର ନାଏକ ଆହ୍ୱାନ ଦେଇଥିଲେ ।