30-Nov-2025

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)
ଜାତୀୟ ଯୁବ ଉତ୍ସବ ୨୦୨୬ ପାଳନ ପରିପ୍ରେକ୍ଷୀରେ ଜିଲ୍ଲା ସ୍ତରରୁ ରାଜ୍ୟ ସ୍ତରକୁ ପ୍ରତିଯୋଗୀ ପଠାଇବା ନିମନ୍ତେ ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଅତିରିକ୍ତ ଜିଲ୍ଲାପାଳ(ସାଧାରଣ) ଶ୍ରୀମତୀ ଅଞ୍ଜଳିନା ପ୍ରଧାନଙ୍କ ପୌରାହିତ୍ୟରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ଜିଲ୍ଲାସ୍ତରୀୟ ପ୍ରତିଯୋଗୀତା ଆସନ୍ତା ୦୪.୧୨.୨୦୨୫ ରିଖ ଆୟୋଜନ କରିବା ପାଇଁ ନିଷ୍ପତ୍ତି ନିଆଯାଇଛି। ପ୍ରତିଯୋଗିତାରେ ଭାଗ ନେବା ପାଇଁ ପ୍ରତିଯୋଗୀ ଉକ୍ତ ଦିନ ସକାଳ ୮.୦୦ ରୁ ୧୦.୦୦ ଘଟିକା ମଧ୍ୟରେ ନିଜର ନାମ ପଞ୍ଜିକରଣ କରାଇପାରିବେ। ପ୍ରତିଯୋଗିତାରେ ଅଂଶ ଗ୍ରହଣ ପାଇଁ ଆବଶ୍ୟକୀୟ ବୟସ ୧୫ ରୁ ୨୯ ବର୍ଷ ହୋଇଥିବା ବେଳେ ବ୍ୟକ୍ତି ଗତ ତଥା ଦଳଗତ ବର୍ଗରେ ବିଭିନ୍ନ ସାତ ଗୋଟି ପ୍ରତିଯୋଗିତା ଆୟୋଜିତ କରାଯିବ।  ପ୍ରତିଯୋଗୀତା ବର୍ଗରେ ଦଳଗତ ଲୋକନୃତ୍ୟ : ୬ ରୁ ୧୦ ଜଣ (Live)  ୩ ଜଣ ସହାୟକଙ୍କ ସହ, ସେହିପରି ଦଳଗତ ଲୋକ ସଙ୍ଗୀତ  ବର୍ଗରେ ୬ ରୁ ୧୦ ଜଣ ( ୩ ଜଣ ସହାୟକ),ବ୍ୟକ୍ତିଗତ ବର୍ଗ ଚିତ୍ରକଳାରେ ୧ ଜଣ, ଔପଚାରିକ ବକ୍ତୃତାରେ ୧ ଜଣ (ଓଡିଆ/ ହିନ୍ଦୀ /ଇଂରାଜୀ ), ପଦ୍ୟ ଲିଖନ ପ୍ରତିଯୋଗିତାରେ ୧ ଜଣ (ଓଡିଆ/ ହିନ୍ଦୀ / ଇଂରାଜୀ) ନିମନ୍ତେ ଅଂଶ ଗ୍ରହଣ କରିପାରିବେ। ପୁନଶ୍ଚ ଆୟୋଜିତ ବିଜ୍ଞାନ ମେଳା ପ୍ରତିଯୋଗିତା ନିମନ୍ତେ ସରକାରୀ ତଥା ବେସରକାରୀ ଶିକ୍ଷାନୁଷ୍ଠାନ ଉଭୟରୁ ଅଂଶ ଗ୍ରହଣର ସୁଯୋଗ ରହିଥିବା ବେଳେ  ଗଳ୍ପ ଲିଖନ ପ୍ରତିଯୋଗିତା ବ୍ୟକ୍ତିଗତ ବର୍ଗ ନିମନ୍ତେ କେବଳ ୧ ଜଣ ପ୍ରତିଯୋଗୀ ଭାଗ ନେଇପାରିବେ। ପ୍ରତିଯୋଗୀ ନିଜର ବୟସ ପ୍ରମାଣ ନିମନ୍ତେ ସାଙ୍ଗରେ ଆଧାର କାର୍ଡ ଆଣିବେ। ଯୋଗ୍ୟ ପ୍ରତିଯୋଗୀ ବାଛିବା ନିମନ୍ତେ ଜିଲ୍ଲା ସ୍ତରୀୟ ପ୍ରତିଯୋଗୀତା ଜିଲ୍ଲା ପ୍ରଶାସନ, ସୁବର୍ଣ୍ଣପୁର ଦ୍ୱାରା ଜିଲ୍ଲା ସଂସ୍କୃତି ଭବନ, ସୁବର୍ଣ୍ଣପୁର ଠାରେ ଆୟୋଜନ କରାଯିବ। ଅତ୍ୟଧିକ ବିବରଣୀ ତଥା ଆବଶ୍ୟକ ସୂଚନା ପାଇଁ ଜିଲ୍ଲା କ୍ରିଡା କାର୍ଯ୍ୟାଳୟ ଏବଂ  ଜିଲ୍ଲା ସଂସ୍କୃତି କାର୍ଯ୍ୟାଳୟ  ସୁବର୍ଣ୍ଣପୁରକୁ ଯୋଗାଯୋଗ କରିବାକୁ ଜିଲ୍ଲାପ୍ରଶାସନ ତରଫରୁ ଅନୁରୋଧ କରାଯାଇଛି।