26-Nov-2025

ବଲାଙ୍ଗିର(ପ୍ରେରଣା ଖବର):  ବଲାଙ୍ଗିର ଲୋକନାଥ ମନ୍ଦିର ପାର୍ଶ୍ଵରେ ଥିବା କଲ୍ୟାଣ ମଣ୍ଡପ ଭଙ୍ଗାବସ୍ଥାରେ ପ୍ରାୟ ୧୦ ବର୍ଷ ହେବ ପଡ଼ି ରହିଛି। ଆଜି ତା.୨୬.୧୧.୨୦୨୫ ରାତ୍ର ୮ଘଣ୍ଟା ସମୟରେ ହଠାତ୍ ଲାଇଟ୍ ଜଳୁଥିବା ଏବଂ କିଛି ଲୋକ ସେଠାରେ ଠୁଳ ହୋଇଥିବା ଦେଖିବାକୁ ମିଳିଥିଲା।ସେଠାରେ ଥିବା ଜଗୁଆଳିକୁ ପଚାରିବାରୁ ବରଯାତ୍ରୀ ଦଳକୁ ରହିବା ପାଇଁ ଦିଆଯାଇଛି ବୋଲି କହିଥିଲେ। ଭଗ୍ନାବସ୍ଥାରେ ଥିବା ଏହି କଲ୍ୟାଣ ମଣ୍ଡପ ବ୍ୟବହାର ଉପଯୋଗୀ ନ ଥିବା ବେଳେ କିଏ କେଉଁ କାରଣରୁ କେତେ ଟଙ୍କାରେ ଏହି ସ୍ଥାନ ଭଡ଼ାରେ କାହାର ଆଦେଶ ବଳରେ ଦେଲେ ତଦନ୍ତ ସାପେକ୍ଷ। ଉପରୋକ୍ତ ବିଷୟ କୁ ନେଇ ବଲାଙ୍ଗିର ଉପଜିଲ୍ଲାପାଳଙ୍କୁ 

ପଚାରିବାରୁ,ଏହି କଲ୍ୟାଣ ମଣ୍ଡପ ନୂତନ ଭାବେ ନିର୍ମାଣ ପାଇଁ ଯୋଜନା ଅଛି।କାହିଁକି ବରଯାତ୍ରୀ ଦଳକୁ ଦିଆଗଲା ପଚାରି ବୁଝୁଛି ବୋଲି କହିଥିଲେ।ତେବେ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଥିବା କଲ୍ୟାଣ ମଣ୍ଡପରୁ ଆୟ କରିବା ପାଇଁ ଏହାର ତତ୍ତ୍ଵାବଧାନରେ ଥିବା କର୍ମଚାରୀ ପଛାଉ ନାହାନ୍ତି ବୋଲି ଚର୍ଚ୍ଚା ହେଉଛି। ଜରାଜୀର୍ଣ୍ଣ କଲ୍ୟାଣ ମଣ୍ଡପ ଭଡ଼ା ଦେଇ ଲୋକଙ୍କ ଜୀବନକୁ ବିପଦକୁ ଠେଲି ଦେଉଥିବା ପରିଲକ୍ଷିତ ହେଉଛି।କିଛି ଟଙ୍କା ଲୋଭରେ ଏଭଳି କାର୍ଯ୍ୟ କରୁଥିବା କର୍ମଚାରୀଙ୍କ ଉପରେ ଉଚ୍ଚ କର୍ତୃପକ୍ଷ କିଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ଦେଖିବାକୁ ବାକି ରହିଲା।