31-Jan-2021

ଚେନ୍ନାଇ (ପ୍ରେରଣା ଖବର) ଚେନ୍ନାଇର ଜଣେ ଅଟୋ ଡ୍ରାଇଭର ସଚ୍ଚୋଟତର ପରିଚୟ ଦେଇ ଲୋକଙ୍କ ହୃଦୟ ଜିତିଛନ୍ତି। ଅଟୋ ଡ୍ରାଇଭର ଶ୍ରବଣ କୁମାର ଜଣେ ଯାତ୍ରୀଙ୍କ ବ୍ୟାଗ୍ ଫେରାଇ ଦେଇଛନ୍ତି ଯେଉଁଥିରେ ୨୦ ଲକ୍ଷ ଟଙ୍କାର ଗହଣା ଥିଲା। ଶ୍ରବଣ କୁମାରଙ୍କ ସଚ୍ଚୋଟତା ପାଇଁ ଚେନ୍ନାଇ ପୋଲିସ ତାଙ୍କୁ ସମ୍ମାନିତ କରିଛି।ପାଲ ବ୍ରାଇଟ୍ ନାମକ ଜଣେ ବ୍ୟକ୍ତି ନିଜର ଜଣେ ସମ୍ପର୍କୀୟଙ୍କ ବିବାହ ସମାରୋହରେ ସାମିଲ ହେବାକୁ ଆସିଥିଲେ। ବିବାହ ସମାରୋହ ପରେ ସେ ଅଟୋରେ ଫେରୁଥିଲେ। ତାଙ୍କ ପାଖରେ ଅନେକ ବ୍ୟାଗ୍ ଥିଲା। ଗୋଟିଏ ବ୍ୟାଗରେ ଗହଣା ଥିଲା। ଅଟୋରେ ଗଲାବେଳେ ସେ ଫୋନରେ କଥା ହେଉଥିଲେ। କଥା ବାଉଳାରେ ସେ ଅଟୋରୁ ଓହ୍ଲାଇବା ସମୟରେ ଗହଣା ବ୍ୟାଗ୍ ଛାଡି ଦେଇଥିଲେ। ଶ୍ରବଣ ପରେ ପରେ ଦେଖିଲେ ଅଟୋ ପଛପଟ ସିଟରେ ବ୍ୟାଗ୍ ରହିଯାଇଛି। ତେବେ ସେ ବ୍ୟାଗ୍ ମାଲିକଙ୍କୁ କେମିତି ଫେରାଇବ କିଛି ବୁଝି ପାରିଲେନି।ଠିକ୍ ଏତିକିବେଳେ ପାଲ ନିଜେ ଜାଣିପାରିଲେ ଯେ ତାଙ୍କ ଗହଣା ବ୍ୟାଗ୍ ହଜିଯାଇଛି। ସେ ଯାଇ ଥାନାରେ ଅଭିଯୋଗ କଲେ। ପୋଲିସ ସେ ଆସିଥିବା ସବୁ ରୁଟର ଫୁଟେଜ୍ ଚେକ୍ କରି ଅଟୋ ସମ୍ପର୍କରେ ପତା କରିବାରେ ସଫଳ ହୋଇଥିଲା। କିନ୍ତୁ ପୋଲିସ ଶ୍ରବଣ କୁମାର ପାଖକୁ ଯିବା ପୂର୍ବରୁ ସେ ନିଜେ ଗହଣା ବ୍ୟାଗ୍ ଧରି ଥାନାରେ ପହଞ୍ଚି ଯାଇଥିଲେ।ପୋଲିସ ଶ୍ରବଣ କୁମାରଙ୍କ ସଚ୍ଚୋଟତା ଦେଖି ତାଙ୍କୁ ଏକ ଫୁଲତୋଡ଼ା ଦେଇ ସମ୍ମାନିତ କରିଥିଲା ଓ ତାଙ୍କର ପ୍ରଶଂସା କରିଥିଲା। ଘଟଣା  ସୋସିଆଲ ମିଡ଼ିଆରେ ଭାଇରାଲ ହେବାପରେ ଲୋକେ ଶ୍ରବଣ କୁମାରଙ୍କୁ ଖୁବ୍ ପ୍ରଶଂସା କରିଛନ୍ତି। ଲୋକେ ତାଙ୍କର ଏହି ସଚ୍ଚୋଟତାକୁ ମାନବିକତାର ଉଦାହରଣ ବୋଲି କହିଛନ୍ତି।