06-Nov-2025

ବିନିକା(ହିମାଂଶୁ ଶେଖର ପୁଟେଲ) ସରକାର ବିଭିନ୍ନ ଯୋଜନା ମାଧ୍ୟମରେ ଲୋକଙ୍କୁ ସେବା ଯୋଗାଇ ଦେଉଥିବା ଡେଙ୍ଗୁରା ଦେଉଛନ୍ତି ।ହେଲେ କେତେକ ଦୁର୍ନିତୀଖୋର କର୍ମଚାରୀଙ୍କ ଯୋଗୁଁ  ଲୋକେ ଠିକ ଭାବେ ଉପକୃତ ହୋଇ ପାରୁନାହାନ୍ତି ।ଦୌଡ଼ି ଦୌଡ଼ି ନୟାନ୍ତ ହେବା ଭିତିରିଆ ଟଙ୍କା ଦେଲେ ଯାଇ କୁଆଡେ ତାଙ୍କ କାମ ହେଉଥିବା ସାଧାରଣ ଲୋକଙ୍କ ଠାରୁ ଶୁଣିବାକୁ ମିଳୁଛି।କିଛି ମାସ ତଳେ ଜିଲ୍ଲାରେ ଜଣେ ଦକ୍ଷ ଜିଲ୍ଲାପାଳ ଯୋଗଦାନ ପରେ ଲୋକେ ବିଭିନ୍ନ କାର୍ଯ୍ୟାଳୟରୁ ଠିକ ଭାବେ ସେବା ପାଉଛନ୍ତି କି ନାହିଁ ସେନେଇ ଜିଲ୍ଲାର ହତାକର୍ତା ଜିଲ୍ଲାପାଳ ନୃପରାଜ ସାହୁ ଅଚାନକ ବିଭିନ୍ନ କାର୍ଯ୍ୟାଳୟ ପରିଦର୍ଶନ କରି କର୍ମଚାରୀଙ୍କୁ ତାଗିଦ କରିବା ସହ ଦରକାର ପଡିଲେ କାର୍ଯ୍ୟାନୁଷ୍ଠାନ ମଧ୍ୟ ନେଉଛନ୍ତି ।ଯାହା ଫଳରେ କର୍ମଚାରୀ ମହଲରେ ଏକ ପ୍ରକାର ଛନକା ପଶିଯାଇଥିବା ବେଳେ ଜିଲ୍ଲାପାଳଙ୍କ ତ୍ୱରିତ ପଦକ୍ଷେପକୁ ଜିଲ୍ଲାର ଜନସାଧାରଣରେ ପ୍ରଶଂସା କରାଯାଉଛି ।ଯାହାକି ଆଜି ସୁବର୍ଣ୍ଣପୁର ଜିଲ୍ଲାପାଳ ଶ୍ରୀ ସାହୁ ଅଚାନକ ବିନିକା ସବରେଜିଷ୍ଟ୍ରି ଓ ତହସିଲ କାର୍ଯ୍ୟାଳୟ ପରିଦର୍ଶନ କରିଥିଲେ l ଫଳରେ ଦାୟିତ୍ୱରେ ଥିବା କର୍ମଚାରୀ ଜିଲ୍ଲାପାଳଙ୍କ ଉପସ୍ଥିତକୁ ଦେଖି ହଡବଢାଇ ଯାଇଥିଲେ। କିଏ କଣ କାମ କରୁଛି କି ନାହିଁ ସେ ସବୁକୁ ଭୁଲି କର୍ମଚାରୀ ମାନେ ଥରି ଥରି ନିଜର ଦାୟିତ୍ୟକୁ ସୁଚାରୁ ରୂପେ କରୁଥିବା ଦେଖିବାକୁ ମିଳିଥିଲା।ତେବେ ଜିଲ୍ଲାପାଳ ଶ୍ରୀ ସାହୁ ପରିଦର୍ଶନ ବେଳେ ତହସିଲ କାର୍ଯ୍ୟାଳୟ ଭିତରେ ଓ ବାହାରେ ଅପରିଷ୍କାରକୁ ନେଇ କ୍ଷୋଭ ବ୍ୟକ୍ତ କରିଥିଲେ।  କାର୍ଯ୍ୟାଳୟ କୋଠରୀରେ ପାନ ଘୁଡୁକା ଛେପ,ମକଳ୍ଳା ଜାଲ,ଏଣେତେଣେ ବିଦ୍ୟୁତ ତାର ଝୁଲୁଥିବା ଦେଖି କେମିତି କାମ କରୁଛ ଘର ତୁମର ନୁହେଁ କି ବୋଲି କର୍ମଚାରୀଙ୍କୁ ପ୍ରଶ୍ନ କରିଥିଲେ ।ଅପରିଷ୍କାର କୁ ନେଇ ଫଟୋ ମଧ୍ୟ ଉଠାଇଥିଲେ ।କାର୍ଯ୍ୟାଳୟକୁ ତୁରନ୍ତ ପରିସ୍କାର ପରିଚ୍ଛନ୍ନ ରଖିବାକୁ କହିଥିଲେ ।ବିଭିନ୍ନ କାମର ସମାଧାନ କେତେଦିନ ଭିତରେ ହେବା କଥା ସେନେଇ କୌଣସି ଠାରେ ସୂଚନା ଫଳକ ନଥିବାରୁ ଜିଲ୍ଲାପାଳ ଶ୍ରୀ ସାହୁ ଅସନ୍ତୋଷ ପ୍ରକାଶ କରିଥିଲେ।ତେଣୁ ବିଭିନ୍ନ କାମ ନେଇ ଆସୁଥିବା ଲୋକଙ୍କୁ ହଇରାଣ ହରକତ ନକରି ତାଙ୍କର କାମ ଶୀଘ୍ର କରିବାକୁ କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ।ଯେଉଁ କର୍ମଚାରୀ ଦାୟିତ୍ୱରେ ଅବହେଳା କରୁଛନ୍ତି ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲାପାଳ କହିଥିଲେ ।ସେହିପରି କର୍ତ୍ତଙ୍ଗ ଗ୍ରାମରୁ ଆସିଥିବା ଜଣେ ସାଧାରଣ ଲୋକଙ୍କ ଅଭିଯୋଗ ଶୁଣିବା ପରେ ସ୍ଥାନଟି ସରକାରୀ ହୋଇଥିବାରୁ ଆସନ୍ତାକାଲି ଡିମାରକେସନ କରିବାକୁ ନିର୍ଦ୍ଦେଶ ଦେଇଥିଲେ।ଜିଲ୍ଲାପାଳଙ୍କ ଏପରି ଅଚାନକ ଗସ୍ତକୁ ବିଭିନ୍ନ ମହଲରେ ସ୍ବାଗତ କରାଯିବା ସହ ଦୁର୍ନୀତି ଖୋର କର୍ମଚାରୀ କିଛି ମାତ୍ରାରେ ସଲଖିବେ ଓ ଲୋକେ ସରକାରୀ ସେବା ସୁବିଧା ଠିକ ଭାବେ ପାଇ ପାରିବେ ବୋଲି ସାଧାରଣରେ ଚର୍ଚ୍ଚା ହେଉଥିବା ବେଳେ ଜିଲ୍ଲାପାଳ ମଝିରେ ମଝିରେ ଅନ୍ୟ କାର୍ଯ୍ୟାଳୟକୁ ମଧ୍ୟ ଅଚାନକ ପରିଦର୍ଶନ କରି ଅବହେଳା କରୁଥିବା କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ନେବା ଆବଶ୍ୟକ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।