15-Oct-2025

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ସହରଉପକଣ୍ଠରେ ବିଭିନ୍ନ ସମୟରେ ଗୋହତ୍ୟା କରାଯାଇ ଗୋମାଂସ ରପ୍ତାନୀ କରାଯାଉଥିବା ଅଭିଯୋଗ ହୋଇଆସୁଥିଲା । ଗତକାଲି ବିଳମ୍ବିତ ରାତିରେ ବିଜାଖମନଠାରେ ଏକ ବାଛୁରୀକୁ କାଟି ତାର ମାଂସଭର୍ତ୍ତି କରୁଥିବା ବେଳେ ପୋଲିସ ଜଣେ ଅଭିଯୁକ୍ତକୁ ଗିରଫ କରିଛି । ଏହି ଘଟଣାକୁ ନେଇ ବଜରଙ୍ଗଦଳ ଓ ହିନ୍ଦୁତ୍ୱବାଦୀ ସଂଗଠନମାନେ ଗଭୀର ଉଦବେଗ ପ୍ରକାଶ କରିଛନ୍ତି । ଏନେଇ ଥାନାରେ ଏକ ମାମଲା ମଧ୍ୟ ରୁଜୁ କରାଯାଇ ଅଭିଯୁକ୍ତକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଅଭିଯୋଗରୁ ପ୍ରକାଶ ଯେ,ବଲାଙ୍ଗୀର ସହର ଉପକଣ୍ଠରେ ପୌରାଞ୍ଚଳର ବିଜାଖମନଠାରେ ରାତି ୯ଟା ବେଳେ ଏକ ଖୋଲାପଡିଆରେ ଏକ ବାଛୁରୀକୁ କିଛିଲୋକ କାଟୁଥିଲେ । ପଡିଆ ନିକଟକୁ ଶୌଚପାଇଁ ଯାଇଥିବା ସେହି ବିଜାଖମନର ସର୍ବେଶ୍ୱର ରଣା ଏହା ଦେଖି ବଜରଙ୍ଗଦଳର କର୍ମକର୍ତ୍ତା ଓ ପୋଲିସକୁ ଖବର ଦେଇଥିଲେ । ତେବେ ସର୍ବେଶ୍ୱରକୁ ଗୋହତ୍ୟାକାରୀମାନେ ପୋଲିସ ଖବରକଲର ଜୀବନରେ ମାରିଦେବାକୁ ଧମକ ମଧ୍ୟ ଦେଇଥିବା ଅଭିଯୋଗ ହୋଇଛି । ଆଦର୍ଶଥାନାର ଆଇଆଇସି ଅବନୀ ସାହୁ ସଦଳବଳେ ପହଞ୍ଚିଲା ବେଳକୁ ବାଛୁରୀକୁ କାଟି ମାଂସକୁ ଭର୍ତ୍ତି କରାଯାଉଥିଲା । ଅନ୍ୟ କିଛିଲୋକ ସେଠାରୁ ଦୌଡି ଫେରାର ଥିବା ବେଳେ ଅବନୀ ନନ୍ଦ ନାମକ ଜଣେ ଯୁବକ ପୋଲିସ ହାତରେ ଧରାପଡିଥିôଲା । ପୋଲିସ ଅବନୀକୁ ଘଟଣା ସ୍ଥଳରୁ ଗିରଫ କରି ଆଣି ପଚରାଉଚୁରା କରି ଆଜି ଏକ ମାମଲା ରୁଜୁ କରି କୋର୍ଟକୁ ଚାଲାଣ କରିଛି । ସର୍ବେଶ୍ୱର ରଣାଙ୍କ ଲିଖିତ ଅଭିଯୋଗ ପରେ ପୋଲିସ ଅଧିକ ତଦନ୍ତ ଆରମ୍ଭ କରିବା ସହିତ ଅନ୍ୟ ଅଭିଯୁକ୍ତମାନଙ୍କୁ ଖୋଜୁଛି । ଏହି ଘଟଣାକୁ ନେଇ ବଜରଙ୍ଗଦଳର କର୍ମକର୍ତ୍ତାଙ୍କ ମଧ୍ୟରେ ଗଭୀର ଉଦବେଗ ପ୍ରକାଶ ପାଇଛି ଓ ପୂର୍ବରୁ ଗୋହତ୍ୟାନେଇ କରାଯାଉଥିବା ଅଭିଯୋଗ ସତ୍ୟ ହୋଇଛି ବୋଲି ଗୋସେବକ କାହ୍ନା ଶତପଥି ଓ ବଜରଙ୍ଗଦଳର ସୌମ୍ୟରଂଜନ ମିଶ୍ର କହିଛନ୍ତି । ନୀୟମିତ ବ୍ୟବଧାନରେ ଏହି ଅଞ୍ଚଳରେ ଗୋହତ୍ୟା କରାଯାଇ ମାଂସ ରପ୍ତାନୀ କରୁଥିବା ଅଭିଯୋଗ କରାଯାଇଛି । ବଲାଙ୍ଗୀର ଭଳି ଶାନ୍ତିପ୍ରିୟ ଅଞ୍ଚଳରେ କେହି ଗୋମାଂସ ଖାଉନଥିବା ବେଳେ ବାହାରୁ ଆସିଥିବା ରୋହିଙ୍ଗ୍ୟାମାନଙ୍କ ପାଇଁ କିଛିଲୋକ ଗୋହତ୍ୟା କରି ମାଂସ ରପ୍ତାନୀ କରୁଥିବା ଅଭିଯୋଗ ହୋଇଛି । ରାଜ୍ୟରେ ଗୋହତ୍ୟାକୁ ବେଆଇନ ବୋଲି ଧରାଯାଉଥିବା ବେଳେ ବଲାଙ୍ଗୀରରେ ମାଂସପାଇଁ ଗୋହତ୍ୟା କରାଯାଉଥିବା ଘଟଣା ସମସ୍ତଙ୍କୁ ବ୍ୟଥିତ କରିଛି । ପୋଲିସ ପ୍ରଶାସନ ତୁରନ୍ତ ଏଦିଗରେ କାର୍ଯ୍ୟାନୁଷ୍ଠାନ ନେବାକୁ ଦାବି ହେଉଛି ।