15-Oct-2025

କଣ୍ଟାମାଳ(ଜୟକୁମାର ମହାରଣା): ବୌଦ୍ଧ ଜିଲ୍ଲା ଘଣ୍ଟାପଡା ଥାନା ଅଞ୍ଚଳରେ ଡକାୟତି ଉଦ୍ୟମ କରୁଥିବା ଏକ ଗ୍ୟାଙ୍ଗର ୬ ଜଣକୁ କାବୁ କରିଛି ଘଣ୍ଟାପଡା ପୁଲିସ l ସୂଚନା ପ୍ରକାରେ ସୋମବାର ରାତିରେ ସବଇନିସ୍ପେକ୍ଟର ବିଶ୍ଵାମିତ୍ର ଲୋଇଙ୍କ ନେତୃତ୍ୱରେ କନଷ୍ଟେବଳ ଏସ. କହଁର, ଏସ. ଦନ୍ତା, ଗୃହରକ୍ଷୀ ଏସ. ମଲିକ, ବି. କୁମ୍ଭାର ଏବଂ ବି. ପୁଟା ମିଶି ଏକ ଦଳ ପେଟ୍ରିଲିଂ କରୁଥିବା ପ୍ରାୟ ୧୦. ୩୫ ସମୟରେ ଏକ ବିଶ୍ୱସ୍ତ ସୂତ୍ରରୁ ଖବର ପାଇ ସୁର୍କାଭଟା ଗ୍ରାମ ନିକଟବର୍ତ୍ତୀ ରାସ୍ତା କଡ଼ରେ ଅନ୍ଧାରରେ କିଛି ଲୋକ ଏକତ୍ରିତ ହୋଇଛନ୍ତି ଏବଂ ସ୍ଥାନୀୟ ଅଞ୍ଚଳରେ ଡକାୟତି କରିବା ପାଇଁ ଉଦ୍ୟମ ଚଳାଇଛନ୍ତି । ଏହି ବିଷୟରେ ଘଣ୍ଟାପଡ଼ା ଥାନା ଅଧିକାରୀଙ୍କୁ

ଜଣାଇବାରୁ ଥାନା ଅଧିକାରୀ ମାଧବ ଚନ୍ଦ୍ର ଟାକ୍ରିଙ୍କ ନିର୍ଦ୍ଦେଶ ଅନୁଯାୟୀ ପେଟ୍ରୋଲିଂ ଗାଡ଼ିକୁ ଘଟଣାସ୍ଥଳରୁ ଏକ ଅଦୃଶ୍ୟ ସ୍ଥାନରେ ରଖି ସୂଚନାର ସତ୍ୟତା ଯାଞ୍ଚ କରିବା ପାଇଁ ପୁଲିସ ଦଳ ଘଟଣାସ୍ଥଳକୁ ଯାଇଥିଲେ । ଘଟଣାସ୍ଥଳ ନିକଟରେ ପହଞ୍ଚିବା ପରେ ସେମାନେ ଦେଖିଲେ ଯେ, ଧୂଆଁର କିଛି ଅଗ୍ନି ନିର୍ଗତ ହେଉଛି ଏବଂ ଡକାୟତି କରିବା ପାଇଁ ଫୁସ୍‌ଫୁସ୍ ଶବ୍ଦ ମଧ୍ୟ ଶୁଣାଯାଉଛି । ପୁଲିସ ଦଳ ନିକଟତର ହେବା ବେଳକୁ ସେମାନେ ଘଟଣାସ୍ଥଳରୁ ଦୌଡ଼ି ପଳାଇବାକୁ ଲାଗିଲେ । ସେମାନଙ୍କ ପିଛା କରିବା ପରେ ସମସ୍ତ ବ୍ୟକ୍ତିଙ୍କୁ ଧରିବାକୁ ସକ୍ଷମ ହୋଇଥିଲା ପୁଲିସ । ତଲାସୀ କରିବା ପରେ ସେମାନଙ୍କ ନିକଟରୁ ୫ଟି ବାଇକ, ୩ଟି ଭୁଜାଲି, ୨ଟି ହାତପଞ୍ଚ, ଗୋଟିଏ ମ୍ୟାଚିସ ବାକ୍ସ ଏବଂ ୫ଟି ମୋବାଇଲ ଫୋନ ମିଳିଥିଲା ସେସବୁକୁ ପୁଲିସ ଜବତ କରିଛି l ଅନ୍ଧାରରେ ଏପରି ଅସ୍ତ୍ରଶସ୍ତ୍ର ରଖି ଏକତ୍ରିତ ହେବାର କାରଣ ପଚାରିବାରୁ ସନ୍ତୋଷଜନକ ଉତ୍ତର ଦେଇପାରି ନ ଥିଲେ ଶେଷରେ ସେମାନେ ସ୍ଥାନୀୟ ଅଞ୍ଚଳରେ ଡକାୟତି କରିବାକୁ ଯୋଜନା କରୁଥିବା ସ୍ୱୀକାର କରିବାରୁ ପୁଲିସ ସେମାନଙ୍କୁ ଗିରଫ କରିଛି l ଗିରଫ ଅଭିଯୁକ୍ତ ମାନେ ହେଲେ ବଲାଙ୍ଗିର ଜିଲା ତୁଷୁରା ଥାନା ଅଧିନ କୁଣ୍ଡେଇମାଲ ଗ୍ରାମର ରାଧେଶ୍ୟାମ ନାଗ(୨୬), ବରାହକୁନା ଗ୍ରାମର ଯଶୋବନ୍ତ ଛତ୍ରିଆ(୨୫), ବଲାଙ୍ଗିର ଜିଲା ପୁଇଁନ୍ତଳା ଥାନା ଅଧିନ କସାବାହାଲି ଗ୍ରାମର ସୁନୀଲ କୁମାର ଷାଣ୍ଢ(୨୨), ସୋନପୁର ଜିଲା ତରଭା ଥାନା ଅଧିନ ଚାରଣିଆପାଲି ଗ୍ରାମର କୃଷ୍ଣ ସରଭଙ୍ଗ(୨୪), ଝିଲିମୁଣ୍ଡା ଗ୍ରାମର ଅର୍ଜୁନ ଷାଣ୍ଢ(୨୮), ଏବଂ ବୌଦ୍ଧ ଜିଲା ଘଣ୍ଟାପଡା ଥାନା ଅଧିନ ଗୋଡ଼ମେଣ୍ଡା ଗ୍ରାମର ସିଦ୍ଧେଶ୍ବର ଭୋଇ(୨୮) ବୋଲି ପୁଲିସ ସୂତ୍ରରୁ ଜଣା ପଡିଛି l ଆବଶ୍ୟକୀୟ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଏନେଇ ଘଣ୍ଟାପଡା ଥାନାରେ ଏକ ମାମଲା ରୁଜୁ କରାଯାଇଛି l ଅଭିଯୁକ୍ତ ମାନଙ୍କୁ ଆଜି କୋର୍ଟ ଚାଲାଣ କରାଯାଇଛି ବୋଲି ଘଣ୍ଟାପଡା ଥାନା ଅଧିକାରୀ ମାଧବ ଚନ୍ଦ୍ର ଟାକ୍ରି ସୂଚନା ଦେଇଛନ୍ତି l