29-Jan-2021

ନୂଆଦିଲ୍ଲୀ(ପ୍ରେରଣା ଖବର)  ସିଙ୍ଘୁ ସୀମାରେ କୃଷକ ଓ ସ୍ଥାନୀୟ ଲୋକଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିବା ସୂଚନା ମିଳିଛି । ଏପରିକି ସ୍ଥିତି ନିୟନ୍ତ୍ରଣ ପାଇଁ ପୋଲିସ କୃଷକ ଓ ସ୍ଥାନୀୟ ଲୋକଙ୍କ ଉପରେ ଲାଠିଚାର୍ଜ କରିଥିବା ସୂଚନା ମିଳିଛି । ସ୍ଥାନୀୟ ଲୋକେ କୃଷକଙ୍କୁ ଆନ୍ଦୋଳନରୁ ଓହରିବା ପାଇଁ ପ୍ରଦର୍ଶନ କରୁଥିବା ବେଳେ ଏହି ପରିସ୍ଥିତି ଉପୁଜିଥିଲା । ଉଭୟ ପରସ୍ପର ଉପରକୁ ପଥର ମାଡ କରିଥିଲେ ପରିସ୍ଥିତି ଏତେ ବିଗିଡିଯାଇଥିଲା ଯେ ପୋଲିସକୁ ବଳ ପ୍ରୟୋଗ କରିବାକୁ ପଡିଥିଲା । ଉଭୟ ସ୍ଥାନୀୟ ଲୋକେ ଓ କୃଷକଙ୍କ ଉପରେ ଲାଠିଚାର୍ଜ ହୋଇଥିଲା ।ଏବେ ବି ସେଠାରେ ପରିସ୍ଥିତି ଉତ୍ତେଜନା ମୂଳକ ରହିଛି । ଅଧିକ ସଂଖ୍ୟାରେ ସୁରକ୍ଷାକର୍ମୀ ନିୟୋଜିତ ଅଛନ୍ତି ସୂଚନାଯୋଗ୍ୟ,କୃଷକମାନଙ୍କ ଆନ୍ଦୋଳନ ଏବେ ପୁଣି ଜୋର୍ ଧରିବାରେ ଲାଗିଛି । ଗଣତନ୍ତ୍ର ଦିବସରେ ଘଟିଥିବା ହିଂସାକାଣ୍ଡ ପରେ ଆନ୍ଦୋଳନ କିଛି ମାତ୍ରାରେ ଥଣ୍ଡା ହୋଇଯାଇଥିଲା । ରାକେଶ ଟିକୈତଙ୍କ ଭାଷଣ ପରେ କୃଷକମାନେ ଜୋସରେ ଆସିଛନ୍ତି । ପଶ୍ଚିମ ଉତ୍ତର ପ୍ରଦେଶ ଓ ହରିୟାଣାର ଭିନ୍ନ ଭିନ୍ନ ସ୍ଥାନରୁ ଆସି କୃଷକମାନେ ଗାଜିପୁର ସୀମାରେ ଏକାଠି ହେଉଛନ୍ତି । ଏହାକୁ ନଜରରେ ରଖି ଦିଲ୍ଲୀର ଯେଉଁ ସବୁସ୍ଥାନରେ ଆନ୍ଦୋଳନ ହେଉଥିଲେ ସେଠାରେ ସୁରକ୍ଷା ବ୍ୟବସ୍ଥାକୁ କଡ଼ାକଡି କରାଯାଇଛି । ଆହୁରି ମଧ୍ୟ ମୁଜଫରନଗରରେ କୃଷକମାନେ ମହାପଞ୍ଚୟତର ଆୟୋଜନ କରିବେ ବୋଲି ଜଣାପଡିଛି ।