29-Jan-2021

ନୂଆଦିଲ୍ଲୀ(ପ୍ରେରଣା ଖବର)   ଅଷ୍ଟ୍ରେଲିଆ ବିପକ୍ଷରେ ଆକର୍ଷଣୀୟ ଟେଷ୍ଟ୍ ସିରିଜ ବିଜୟରେ ପ୍ରମୁଖ ଭୁମିକା ଗ୍ରହଣ କରିଥିଲେ ଆଜିଙ୍କ୍ୟ ରାହାଣେ । ନିୟମିତ ଅଧିନାୟକ ବିରାଟ କୋହଲିଙ୍କ ଅନୁପସ୍ଥିତିରେ ସେ ଦଳର ନେତୃତ୍ୱ ନେବା ସହ ଦଳକୁ ଐତିହାସିକ ସିରିଜ୍ ଜିତାଇଥିଲେ । ଏବେ ଭାରତ ଓ ଇଂଲଣ୍ଡ ମଧ୍ୟରେ ଫେବ୍ରୁଆରୀ ୫ରୁ ଟେଷ୍ଟ୍ ସିରିଜ୍ ଖେଳାଯିବ । ଏହି ସିରିଜରେ ରାହାଣେ ମହେନ୍ଦ୍ର ସିଂ ଧୋନୀଙ୍କ ଏକ ବଡ ରେକର୍ଡ ଭାଙ୍ଗିପାରନ୍ତି । ସବୁଠାରୁ ଅଧିକ ରନ୍ କରିବାରେ ସେ ଧୋନୀଙ୍କଠୁ ଆଗକୁ ଯାଇପାରିବେ ।୩୨ ବର୍ଷୀୟ ରାହାଣେ ଏବେସୁଦ୍ଧା ୬୯ଟି ଟେଷ୍ଟ୍ ମ୍ୟାଚ୍ ଖେଳିଛନ୍ତି । ସେ ୪୨.୫୮ ଆଭରେଜରେ ୪୪୭୧ ରନ୍ କରିଥିବା ବେଳେ ଏଥିରେ ୧୨ଟି ଶତକ ରହିଛି । ଯଦି ସେ ଇଂଲଣ୍ଡ ବିପକ୍ଷ ସିରିଜରେ ୪୦୬ ରନ୍ କରନ୍ତି ତେବେ ସେ ଧୋନୀଙ୍କୁ ପଛରେ ପକାଇବେ । ଧୋନୀ ୯୦ଟି ଟେଷ୍ଟରେ ୩୮.୦୯ ଆଭରେଜରେ ୪୮୭୬ ରନ୍ କରିଛନ୍ତି । ଏହାସହ ୬ଟି ଶତକ ଲଗାଇଛନ୍ତି ।ରାହାଣେ ଯଦି ଇଂଲଣ୍ଡ ବିପକ୍ଷ ସିରିଜରେ ଗୋଟିଏ ଶତକ ଲଗାନ୍ତି ତେବେ ପୋଲି ଉମରିଗର୍ ଓ ମୁରଲି ବିଜୟଙ୍କୁ ପଛରେ ପକାଇ ଦେବେ । ଏହି ଦୁଇ ଖେଳାଳିଙ୍କ ନାଁରେ ୧୨ଟି ଲେଖାଏଁ ଶତକ ରହିଛି । ଯଦି ସେ ଦୁଇଟି ଶତକ ଲଗାନ୍ତି ତେବେ ଗୁଣ୍ଡପ୍ପା ବିଶ୍ୱନାଥଙ୍କ ସହ ସମାନ ହୋଇଯିବେ ।ନିକଟରେ ସମାପ୍ତ ହୋଇଥିବା ଅଷ୍ଟ୍ରେଲିଆ ବିପକ୍ଷ ସିରିଜରେ ରାହାଣେ ଏକମାତ୍ର ଖେଳାଳି ଭାବେ ସିରିଜରେ ଶତକ ଲଗାଇଥିଲେ । ଏହି ଶତକ ସାହାଯ୍ୟରେ ଭାରତ ମେଲବର୍ଣ୍ଣ ଟେଷ୍ଟ୍ ଜିତି ସିରିଜ୍ ବରାବର କରିଥିଲା । ଶେଷରେ ଭାରତ ୨-୧ରେ ଅଷ୍ଟ୍ରେଲିଆକୁ ପରାସ୍ତ କରିଥିଲା