26-Sep-2025

ବଲାଙ୍ଗିର(ଦେବାଶିଷ ବହିଦାର): ନିଃସ୍ୱାର୍ଥପର ସେବା, ଗଣତାନ୍ତ୍ରିକ ମୂଲ୍ୟବୋଧ ପ୍ରତିଷ୍ଠା ତଥା ସର୍ବବିଧ ସାମାଜିକ ଉନ୍ନତିକୁ ହିଁ ପ୍ରାଥମିକ ଦେବାର ସଂକଳ୍ପ ଜାତୀୟ ସେବା ଯୋଜନାର ଲକ୍ଷ୍ୟ ଓ ଉଦ୍ଦେଶ୍ୟ I ଏହି ଲକ୍ଷ୍ୟ ପୂରଣ ନେଇ ବଲାଙ୍ଗିର ସରକାରୀ ମହିଳା ମହାବିଦ୍ୟାଳୟର ଜାତୀୟ  ସେବା ଯୋଜନାର ସ୍ୱତନ୍ତ୍ର ଶିବିର ଉଦ୍‌ଯାପିତ ହୋଇଯାଇଛି  I
   ପ୍ରାପ୍ତ ସୂଚନା ଅନୁସାରେ ଗନ୍ଧରେଲଠାରେ ସମ୍ପୃକ୍ତ ସ୍ୱତନ୍ତ୍ର ଶିବିରଟି ଆୟୋଜିତ ହୋଇଥିଲା I  ବିଗତ ବର୍ଷରୁ ଉକ୍ତ ଅଞ୍ଚଳଟିକୁ ପୋଷ୍ୟ ଗ୍ରାମ ଭାବରେ ଗ୍ରହଣ କରାଯାଇଛି I  ଚଳିତ ବର୍ଷ ମଧ୍ୟ ଏକ  ସ୍ୱତନ୍ତ୍ର ଶିବିରର  ଆୟୋଜନ କରାଯାଇ ବୃକ୍ଷରୋପଣ, ସଡ଼କ ସୁରକ୍ଷା, ସ୍ୱଚ୍ଛତା ଅଭିଯାନ, ନାରୀଶିକ୍ଷାର ଗୁରୁତ୍ୱ, ନିଶାମୁକ୍ତି ଅଭିଯାନ  ଇତ୍ୟାଦି  ସମ୍ପର୍କରେ ଜନଜାଗରଣର ପ୍ରୟାସ କରାଯାଇଥିଲା I ଆଜି ଉକ୍ତ ସପ୍ତାହବ୍ୟାପୀ ଶିବିରର  ଉଦଯାପନୀ ଦିନ ଥିଲା I  ଏହି ସଭାରେ ମହାବିଦ୍ୟାଳୟର ଅଧ୍ୟକ୍ଷ ଡଃ ଅରବିନ୍ଦ କୁମାର ଓଝା ଅଧ୍ୟକ୍ଷତା କରିଥିଲେ I ମୁଖ୍ୟ ଅଧିକାରୀ ଭାବରେ ଜିଲ୍ଲା କାର୍ଯ୍ୟକ୍ରମ ଅଧିକାରୀ ଡଃ ଅଜିତ କୁମାର ଭୋଇ ଉପସ୍ଥିତ ରହିଥିଲେ I ଭାରପ୍ରାପ୍ତ ଅଧିକାରୀ ଡଃ ମିନତୀ ଦେବତା ଆମୂଳଚୂଳ କାର୍ଯ୍ୟକ୍ରମର ସଂଚାଳନ କରିଥିବାବେଳେ ଡଃ ଭୁବନେଶ୍ୱର ଛତ୍ରିଆ ଧନ୍ୟବାଦ ଅର୍ପଣ କରିଥିଲେ  I ଏ ଅବକାଶରେ ମହାବିଦ୍ୟାଳୟର   ସ୍ବେଚ୍ଛାସେବୀମାନେ  ‘ନିଶା ହିଁ ଦଶା’ ଶୀର୍ଷକ ଏକ ନାଟକ ପ୍ରଦର୍ଶନ କରିଥିଲେ I