28-Jan-2021

ବଲାଙ୍ଗୀର, (ପ୍ରେରଣା ଖବର)-ଗତ ୧୭ ତାରିଖରେ ବିଶିଷ୍ଟ ସମାଜସେବୀ ଲଳିତ କୁମାର ନାୟକଙ୍କ ପରଲୋକ ହେଇଥିବା ବେଳେ ଆଜି ଥିଲା ଦ୍ୱାଦଶହ କ୍ରିୟା । ଗତ କାଲି ମହାରାଣୀ ବନ୍ଧ ଠାରେ ଦଶାହ କାର୍ଯ୍ୟକ୍ରମ ହୋଇଥିବା ବେଳେ ଆଜି ଦ୍ୱାଦଶ ଦିନରେ ସ୍ଥାନୀୟ କୋସଳ କଳାମଣ୍ଡଳ ପଡିଆ ଠାରେ ସର୍ବଧର୍ମ ପ୍ରାର୍ଥନା ଓ ପ୍ରସାଦ ସେବନ କାର୍ଯ୍ୟକ୍ରମରେ ପଶ୍ଚିମ ଓଡ଼ିଶାର ପୁରପଲ୍ଲୀରୁ ଶତାଧିକ ଲଳିତ ପ୍ରେମୀ, ବିଭିନ୍ନ ସଂଗଠନର କର୍ମକର୍ତ୍ତା ତଥା ସାମାଜିକ କର୍ମୀ ମାନଙ୍କ ସମାବେଶ ହୋଇଥିଲା । ପ୍ରଥମେ ଗାୟକ ବୁବୁ ଉଦ୍‌ଗାତା ଲଳିତ ନାୟକଙ୍କ ସ୍ମୃତି ଉଦ୍ଦେଶରେ ‘ନା ଚିଠି ନା ସନ୍ଦେଶ, ଜାନୈ କୌନ ସା ଦେଶ, ଜହାଁ ତୁମ୍ ଚଲୈ ଗୟେ’,  ଗୀତରେ ଦର୍ଶକଙ୍କୁ ଭାବବିହ୍ୱଳ କରି ଦେଇଥିଲେ ।  କୋସଳ କଳାମଣ୍ଡଳ ପଡିଆର ନୁଆ ମଂଚ ଠାରେ ଅନୁଷ୍ଠିତ ଏହି ଶ୍ରଦ୍ଧାଞ୍ଜଳି ସଭାରେ ଜିଲ୍ଲାର ବହୁ ମାନ୍ୟଗଣ୍ୟ ବ୍ୟକ୍ତିଙ୍କ ସମେତ ଟିଟିଲାଗଡ଼ ବିଧାୟିକା ଟୁକୁନି ସାହୁ, କଂଟାମାଲ ବିଧାୟକ ମହୀଧର ରଣା, ବଲାଙ୍ଗୀର ବିଧାୟକ ନରସିଂହ ମିଶ୍ର, ପଶ୍ଚିମ ଓଡ଼ିଶା ବିକାଶ ପରିଷଦର ଅଧ୍ୟକ୍ଷ ଅଶିତ ତ୍ରିପାଠୀ ପ୍ରମୁଖ ଶ୍ରଦ୍ଧାଞ୍ଜଳି ଜ୍ଞାପନ କରିବା ସହ ଲଳିତ ନାୟକଙ୍କ ସ୍ମତିଚାରଣ କରିଥିଲେ । ସର୍ବହରାର ସାଥୀ ଲଳିତ ନାୟକ ପ୍ରକୃତରେ ଜଣେ ଶତପ୍ରତିଶତ ସମାଜସେବୀ ଥିଲେ । ତାଙ୍କ ଆଦର୍ଶରେ ଯୁବ ସମାଜ ଅନୁପ୍ରେରିତ ହେବା ଉଚିତ । ତାଙ୍କ ସ୍ମୃତି ଉଦ୍ଦେଶ୍ୟରେ ବଲାଙ୍ଗୀରରେ ଲଳିତ ନାୟକଙ୍କ ଏକ ପୂର୍ଣ୍ଣ ଅବୟବ ପ୍ରତିମୂର୍ତ୍ତି ସ୍ଥାପନ ହେବା ଉଚିତ ବୋଲି ସ୍ମୃତି ଚାରଣ ବେଳେ କିଛି ବକ୍ତା ପ୍ରସ୍ତାବ ଦେଇଥିଲେ । ସମ୍ବାଦର ବାର୍ତ୍ତା ସଂପାଦକ ଅରବିନ୍ଦ ଦାସଙ୍କ ପରିଚାଳନାରେ ଆୟୋଜିତ ଏହି ଶ୍ରଦ୍ଧାଞ୍ଜଳି ସଭାରେ ଅନ୍ୟ ମାନଙ୍କ ମଧ୍ୟରେ ସମାଜସେବୀ ବିକ୍ରମ ବହିଦାର, ଅରୁନ୍ଧତୀ ଜ୍ୱେଲର୍ସର ବ୍ରହ୍ମାନନ୍ଦ ମେହେର, ବିଙ୍ଗ ହ୍ୟୁମେନର ସୋମନାଥ ମିଶ୍ର, ସରସ୍ୱତୀ ନନ୍ଦ, ସୁଧୀର ପଣ୍ଡା, ସାମ୍ବାଦିକ ମନୋରଂଜନ ଯୋଶୀ, ଜିଲ୍ଲା ସାମ୍ବାଦିକ ସଂଘର ସଭାପତି ହରିନାରାୟଣ ପୂଜାରୀ, ପୂର୍ଣ୍ଣ ଚନ୍ଦ୍ର ପଂଡା, କ୍ରିଡା ସଂଗଠକ ଶତୃଘ୍ନ ସିଂହ, ଶଶିଭୂଷଣ ପୁରୋହିତ, ପ୍ରଭାସ ପାଣିଗାହି, କଂଗ୍ରେସ ନେତା ବିଧୂଭୂଷଣ ତ୍ରିପାଠୀ, ବିକ୍ରମ ବହିଦାର, ଡ. ବେଣୁଧର ପାଣ୍ଡେ,  ଓ ଅନ୍ୟମାନେ ସ୍ମୃତିଚାରଣ କରିଥିଲେ । ଏହି ଶ୍ରଦ୍ଧାଞ୍ଜଳି ସଭାରେ ପ୍ରାୟ ୩ ହଜାରରୁ ଅଧିକ ଲୋକଙ୍କ ସମାଗମ ହୋଇଛି । ସ୍ଵର୍ଗତ ଲଳିତ ନାୟକ ଙ୍କ ପରିବାର ର ସୁରେଶ ନାୟକ, ଜ୍ୟୋତିରଞ୍ଜନ ନାୟକ. ଦୀପକ ରଞ୍ଜନ ନାୟକ ପ୍ରମୁଖ ଶ୍ରଦ୍ଧାଞ୍ଜଳି ସଭାରେ ସହଯୋଗ କରିଥିଲେ l