12-Sep-2025

 ବିନିକା(ହିମାଂଶୁ ଶେଖର ପୁଟେଲ)ବିନିକା ବ୍ଲକ ଅନ୍ତର୍ଗତ ମହାଦେବପାଲି ରଘୁନାଥ ଯୁବକ ସଂଘ ଆନୁକୂଲ୍ୟରେ ପାଳିତ ହୋଇ ଆସୁଥିବା ମାଁ ଜଗତ ଜନନୀ ମୃଣ୍ମୟୀ ଦେବୀ ଦୁର୍ଗାଙ୍କ ଶାରଦୀୟ ପୂଜା ମହୋତ୍ସବ ଏଥର ୫୩ବର୍ଷରେ ପଦାର୍ପଣ କରିଛି ।ପୂଜା ଉତ୍ସବକୁ ଆକର୍ଷଣୀୟ କରିବା ସାଙ୍ଗକୁ ବିଭିନ୍ନ ପ୍ରକାରର ସାଂସ୍କୃତିକ କାର୍ଯ୍ୟକ୍ରମ ଏବଂ ଦର୍ଶକଙ୍କ ମନୋରଂଜନ ସକାଶେ  ରାବଣରାଜ ଆସନ୍ତା ଅକ୍ଟୋବର ୨୯ରୁ ଚାରିଦିନ ଧରି ଅନୁଷ୍ଠିତ ହେବ । ଏଥିପାଇଁ ଆଜି ସଂଘ ପକ୍ଷରୁ ରାବଣ ବରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଦୁର୍ଗା ପୂଜା କୋର କମିଟି ସଭାପତି ସଂଗ୍ରାମ କେଶରୀ ନାୟକଙ୍କ ନେତୃତ୍ବରେ ୭୦ ଜଣିଆ ପ୍ରତିନିଧି ଦଳ ମାଁ ଦୁର୍ଗାଙ୍କ ପୀଠରେ ପୁଜାର୍ଚ୍ଚନା କରି ମଟରସାଇକଲ ଶୋଭାଯାତ୍ରାରେ ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ସାରସମାଲ ଗ୍ରାମକୁ ଯାଇଥିଲେ ।ରାବଣ ଭୂମିକାରେ ଅଭିନୟ କରୁଥିବା ମନୋରଞ୍ଜନ ଚିରଗୁନଙ୍କ   ସହ ଅଭିନେତା ଦଳ ଶୋଭାଯାତ୍ରାକାରୀଙ୍କୁ ସ୍ବାଗତ ସମ୍ବର୍ଦ୍ଧନା ଦେଇ ପାଛୋଟି ନେବା ପରେ ଯଥାବିଧି ପୁଜାର୍ଚ୍ଚନା କରାଯାଇ ରାବଣ ବରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା

ଅଭିନେତା ଶ୍ରୀ ଚିରଗୁନଙ୍କୁ ଉପଢୌକନ ଦେଇ ସମ୍ବର୍ଦ୍ଧିତ କରିବା ସହିତ ବରଣ କରାଯାଇଥିଲା ।ଯୁବକ ସଂଘ ସଭାପତି ସଂଗ୍ରାମକେଶରୀ ନାୟକ,ବରିଷ୍ଠ ସଦସ୍ୟ ଅଶ୍ବିନୀ କୁମାର ନାୟକ,ଶ୍ରୀନିବାସ ପୂଜାହାରୀ,ପବିତ୍ର ମୋହନ ନାୟକ,ଆସାମ ରାଇଫଲର ଭାରତୀୟ ତଟବାହିନୀ ଯବାନ ସତ୍ୟନାରାୟଣ ଥାଟି,ବିନିକା ସାମ୍ବାଦିକ ସଂଘ କାର୍ଯ୍ୟକାରୀ ସଭାପତି ଅଶୋକ କୁମାର ପଣ୍ଡା, ଭାଗିରଥି ବଗର୍ତ୍ତୀ,ଗୌରିଶଙ୍କର ନାଏକ ପ୍ରମୁଖଙ୍କ ସମେତ ଦୁର୍ଗା ପୂଜା କୋର କମିଟି ଏବଂ ଯୁବକ ସଂଘର ସମସ୍ତ ସଦସ୍ୟ ଏଥିରେ ସାମିଲ ହୋଇଥିଲେ ।