05-Sep-2025

ବଲାଙ୍ଗୀର-ବଲାଙ୍ଗୀର ଜିଲ୍ଲା ଦେଇ ବୌଦ୍ଧ ଜିଲ୍ଲାର କଣ୍ଟାମାଳ ଅଞ୍ଚଳରୁ ଛତିଶଗଡକୁ ଗଞ୍ଜାଇ ଚୋରାଚାଲାଣ ହେଉଛି । ଅପରେଶନ ଗଜ ମାଧ୍ୟମରେ ବଲାଙ୍ଗୀର ପୋଲିସ ବିଭିନ୍ନ ସମୟରେ ଗାଡିଗୁଡିକୁ ଯାଞ୍ଚକରି ଗଞ୍ଜାଇ ଜବତ କରୁଛି । ଆଜି ଦେଓଗାଁଥାନା ନାଇକେନସିରା ଛକରେ ଏକ କାରରୁ ୩୦କିଲୋ ଗଞ୍ଜାଇ ଜବତକରି ଛତିଶଗଡର ଦୁଇଜଣ ଗଞ୍ଜାଇ ବ୍ୟବସାୟିଙ୍କୁ ଗିରଫ କରିଛି । ଏନେଇ ସଦରଏସଡିପିଓ ସରୋଜକୁମାର ଉପାଧ୍ୟାୟ ସୂଚନା ଦେଇଛନ୍ତି ଯେ,ଆଜି ୧୦ଟା ବେଳେ ଦେଓଗାଁ ଥାନାର ଏସଆଇ ଦୀପକ ଡୁଙ୍ଗଡୁଙ୍ଗ ପେଟ୍ରୋଲିଂ କରୁଥିବା ବେଳେ ବୌଦ୍ଧପଟୁ ବଲାଙ୍ଗୀରକୁ ଆସୁଥିବା ଏକ ସ୍ୱିଫ୍ଟଡିଜାୟାର ଗାଡି(ଓଡି-୦୩-ବିୱାଇ-୭୬୮୯)କୁ ଯାଞ୍ଚ କରିଥିଲେ । ସେଥିରେ ୩୧ଟି ପଲିଥିନ ପ୍ୟାକେଟରେ ଗଞ୍ଜାଇ ଭର୍ତ୍ତିକରି ଚୋରାଚ।।ଣ ହେଉଥିବା ଜଣାପଡିଥିଲା । ପୋଲିସ ଗାଡି ସହିତ ଗଞ୍ଜାଇକୁ ଜବତ କରିବା ସହିତ ଛତିଶଗଡର କୋର୍ବା ଜିଲ୍ଲାର ପ୍ରବୀଣ ମହାପାତ୍ର(୨୭) ଓ ବିଳାଶପୁର ଜିଲ୍ଲାର ପରମେଶ୍ୱର ଦାସ((୩୪)କୁ ଗିରଫ କରିଥିଲେ । ଦେଓଗାଁ ତହସିଲଦାର  ସୌମ୍ୟରଂଜିତ ନାଏକଙ୍କ ଉପସ୍ଥିତିରେ ଗଞ୍ଜାଇର ମାପଚୁପ କରି ଜବତ କରାଯାଇଛି । ଏହା ସହିତ କାର,ଏକ ଭିଭୋ ମୋବାଇଲ,ଏକ ରେଡମି ମୋବାଇଲକୁ ମଧ୍ୟ ଜବତ କରାଯାଇଛି ବୋଲି ପୋଲିସ ସୂଚନା ଦେଇଛି । ପ୍ରକାଶ ଯେ,ଗତ ଏକମାସ ମଧ୍ୟରେ କେବଳ ବଲାଙ୍ଗୀର ପୋଲିସ ପ୍ରାୟ ୧୫କ୍ୱିଣ୍ଟାଲ ଗଞ୍ଜାଇ ଜବତ କରିସାରିଛି ।