05-Sep-2025

ଅତାବିରା(ଆକାଶ ମିଶ୍ର): ଆଧୁନିକ ସଭ୍ୟତା ଠାରୁ ଅନେକ ଦୂରରେ ରହି ଜଣେ ଶିକ୍ଷୟିତ୍ରୀ  ପାଳନ କରୁଛନ୍ତି ତାଙ୍କର ଜନ୍ମଦିନ।  ସହରର ଚାକଚକ୍ୟକୁ ଭୁଲି  ନିଆରା  ଢଙ୍ଗରେ  ଆଜି ଜନ୍ମଦିନ ପାଳିଲେ  ବରଗଡ଼ ଜିଲ୍ଲା ଅତାବିରା ବ୍ଲକ ଅନ୍ତର୍ଗତ  ଟୋପ ହାଇସ୍କୁଲ ର ବିଜ୍ଞାନ ଶିକ୍ଷୟିତ୍ରୀ ,କବୟିତ୍ରୀ ତଥା ସମାଜ ସେବୀ ଅନୁସୂୟା ଦେବତା । ନା କାଟିଲେ କେକ୍ ନା ହେଲା ହୋଟେଲ ଭୋଜିଭାତ, କିଛି ଅଲଗା ପ୍ରକାରରେ ପାଳନ ହେଲା ଜନ୍ମଦିନ।  ଆଧୁନିକ ଦୁନିଆରେ ନିଜ  ଜନ୍ମ ଦିନ ପାଳନ କରିବା ପାଇଁ  ଲୋକେ ଲକ୍ଷାଧିକ ଟଙ୍କା ଖର୍ଚ୍ଚ କରି ବାର୍ଥଡେ ପାର୍ଟି ଆୟୋଜନ କରୁଛନ୍ତି। ନୂଆଁ ପୋଷାକ ,ଗହଣା ଆଦି କିଣି  ନିଜ  ବନ୍ଧୁ ବାନ୍ଧବ ବା ସାଙ୍ଗ ସାଥି ମାନଙ୍କ ସହ ଜନ୍ମଦିନ  ପାଳନ କରାଯାଉଛି । ବାର୍ଥଡେ ପାର୍ଟିରେ ଆଧୁନିକତାର ଛାପରେ ଅଗ୍ରସର ହୋଇ ବିଦେଶୀ ସଭ୍ୟତା ଢାଞ୍ଚାରେ ଭୋଜି ଭାତ,ନାଚ ଗୀତ ଭଳି ମଉଜ ମସ୍ତିର ଆସର କରାଯାଇ ଜନ୍ମଦିନକୁ ପାଳନ କରାଯାଉଛି , ଯେଉଁଥିରେ ସେମାନଙ୍କର ଷ୍ଟାଟସ ବା ଖାନଦାନିର ଉତ୍କଟ ବାସ୍ନା ପରିଲକ୍ଷିତ ହୋଇଥାଏ। ହେଲେ ଏକ ନିଆରା ଢଙ୍ଗରେ ଆଧୁନିକତା ,ଷ୍ଟାଟସ ,ପାଶ୍ଚାତ୍ୟ ସଭ୍ୟତା ଠାରୁ ଅନେକ ଦୂରରେ ରହି   ଶିକ୍ଷୟିତ୍ରୀ ପାଳନ କରିଛନ୍ତି ତାଙ୍କର  ଜନ୍ମ ଦିନ।  ଅତି ନିରାଡମ୍ବର ଭାବରେ ଏକ ଭିନ୍ନ ଚିନ୍ତାଧାରା ନେଇ ସେ  ଅତାବିରା ଝାଉଁ ନଦୀ କୂଳରେ ଥିବା କୁଷ୍ଠାଶ୍ରମ ର  ଅନ୍ତେବାସୀ ଙ୍କ ସହ   କିଛି ଅନ୍ତରଙ୍ଗ ମୁହୂର୍ତ୍ତ  ବିତାଇ ସାଉଁଟି ଥାଆନ୍ତି ତାଙ୍କର ଅମୂଲ୍ୟ ଆଶୀର୍ବାଦ , ବାଣ୍ଟିଥାନ୍ତି ଖୁସି।  ଅସାଧ୍ୟ କୁଷ୍ଠ ରୋଗରେ ଆକ୍ରାନ୍ତ ହୋଇ ନିଜ ଜନ୍ମ ମାଟି, ଗାଆଁ , ପରିବାର ଠାରୁ ବାସନ୍ଦ ହୋଇ  ଅଭିଶପ୍ତ ଜୀବନ ଯାପନ କରୁଥିବା 

ସେଇ ନାରାୟଣ ମାନଙ୍କ ମୁହଁ ରେ ହସ ଟିକିଏ ଦେବା ତ ଦୂରର କଥା ତାଙ୍କ ପାଖକୁ ଯିବାକୁ ଲୋକେ ଘୃଣା କରିଥାନ୍ତି ।ସେଇ ନିରସ ମୁହଁ ରେ ଟିକିଏ ହସ ଦେଇ , ତାଙ୍କର ଦୁଃଖ ସୁଖର  ସାଥୀ ହୋଇ ରହିବା ପାଇଁ ସେ ଅନେକ ବର୍ଷ ହେଲା ଆପ୍ରାଣ ଚେଷ୍ଟା କରି ଆସୁଛନ୍ତି । ଆଜି  ସେଇ  ନାରାୟଣ ମାନଙ୍କୁ ନୂତନ ବସ୍ତ୍ର , ଶୁଖିଲା ଖାଦ୍ୟ ବଣ୍ଟନ କରି ତାଙ୍କ ସହ ସମୟ ବିତାଇ ଥିଲେ । ଏଥିରେ ସେ ଖୁବ ଆନନ୍ଦ ପାଆନ୍ତି ବୋଲି ଶିକ୍ଷୟିତ୍ରୀ ଜଣକ ପ୍ରକାଶ କରିଛନ୍ତି । ତେବେ ଏମିତି ନିଆରା ଢଙ୍ଗରେ ନିଜ ଜନ୍ମ ଦିବସ  ପାଳନ କରି ସେ ସମାଜ କୁ ଏକ ନୂତନ ବାର୍ତ୍ତା ପ୍ରଦାନ କରୁଛନ୍ତି ।