03-Sep-2025

ବଲାଙ୍ଗୀର(ପ୍ରେରଣା ଖବର): ରାଜବୈଦ୍ୟ ଚିନ୍ତାମଣି ବେହେରା ସ୍ମୃତି ପରିଷଦ ଭାରତୀ ନୀଡ଼ ଆଦର୍ଶ ପଡା, ବଲାଙ୍ଗୀର ପାଳନ କରିବ ରାଜ୍ୟସ୍ତରୀୟ ଚତୁର୍ଥ ବାର୍ଷିକ ଉତ୍ସବ, ଗୁରୁ ପୂଜନ,ପ୍ରତିଭା ସମ୍ମାନ ଓ ନୂଆଖାଇ ଭେଟଘାଟ-୨୦୨୫। ଏହି ଅବସରରେ ବଲାଙ୍ଗୀର ଜିଲ୍ଲା ବେଲପଡ଼ା ଦୀନ ରଘୁ ମେହେର ହାଇ ସ୍କୁଲର ପ୍ରାକ୍ତନ ପ୍ରଧାନ ଶିକ୍ଷକ ବିଶିଷ୍ଟ ଶିକ୍ଷାବିତ୍ ତ୍ରିବିକ୍ରମ ମହାକୁଡ଼ ପାଇବେ ଅନୁଷ୍ଠାନର ମର୍ଯ୍ୟାଦାଜନକ "ଶିକ୍ଷକ ରତ୍ନ" ଉପାଧି। ପ୍ରକାଶ ଥାଉ କି ପୂର୍ବ ବର୍ଷ ମାନଙ୍କରେ ରାଜ୍ୟ, ଜାତୀୟ ଓ ଅନ୍ତର୍ଜାତୀୟ ଖ୍ୟାତିସମ୍ପନ୍ନ ପ୍ରତିଭା ମାନଙ୍କୁ ସମ୍ବର୍ଦ୍ଧିତ କରାଯାଇଛି। ସେ ଭିତରେ ପାଟଣାଗଡ଼ ନିକଟ ଭଇଁଷା ଗ୍ରାମର ବିଶିଷ୍ଟ ସ୍ବାଧୀନତା ସଂଗ୍ରାମୀ କବିଶ୍ରୀ ଗୋବର୍ଦ୍ଧନ ଦାସଙ୍କ ପୁତ୍ର ସୀତାର ଗବେଷକ ଜୀବନ ପ୍ରକାଶ ଦାସ ଅନ୍ୟତମ। ଚଳିତ ବର୍ଷ ପାଞ୍ଚଟା ପୀଢିର ପୂଜ୍ୟ ଗୁରୁ ଶ୍ରୀ ମହାକୁଡ଼ଙ୍କୁ ଶିକ୍ଷା କ୍ଷେତ୍ରରେ ତାଙ୍କର ଜୀବନ ବ୍ୟାପି ସାଧନା ପାଇଁ ଏହି ଉପାଧି ସହିତ ସମ୍ମାନିତ କରାଯିବ। ଏତଦ୍ ଭିନ୍ନ ବେଲପଡ଼ା ଅଞ୍ଚଳର ପ୍ରାଥମିକ ଠାରୁ କଲେଜ ପର୍ଯ୍ୟନ୍ତ ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ସଫଳତା ପାଇଁ ମଧ୍ୟ ବିଶିଷ୍ଟ ଶିକ୍ଷାବିତ୍ ମାନଙ୍କୁ ସମ୍ବର୍ଦ୍ଧିତ କରାଯିବ। ସେମାନଙ୍କ ମଧ୍ୟରେ ଶିକ୍ଷାବିତ୍ କୃଷ୍ଣଚନ୍ଦ୍ର ପାଣିଗ୍ରାହୀ, ବନମାଳୀ ପାଣିଗ୍ରାହୀ, ପଣ୍ଡିତ ମୋହନଦାସ ଠାକୁର, ସଦାଶିବ ମେହେର, ନିରଞ୍ଜନ ବେହେରା, କୁଞ୍ଜମଣି ମେହେର, ଚାଣକ୍ୟ ସାହୁ, ନବୀନ କୁମାର ମେହେର, ସୁରେଶ ଚନ୍ଦ୍ର ମେହେର ଅନ୍ୟତମ। ଏହା ବ୍ୟତୀତ ଶିକ୍ଷା, ସାହିତ୍ୟ, କଳା, ସାମ୍ବାଦିକତା ଚିକିତ୍ସା କ୍ଷେତ୍ରରେ ଉଲ୍ଲେଖନୀୟ ଅବଦାନ ଥିବା ବ୍ୟକ୍ତିବିଶେଷଙ୍କୁ ସମ୍ବର୍ଦ୍ଧିତ କରାଯିବ। ଏକ ଗୁରୁଗମ୍ଭୀର ପରିବେଶରେ ପବିତ୍ର ଗଙ୍ଗା ଜଳରେ ପାଦ ପ୍ରଖାଳନ ପୂର୍ବକ ଗୁରୁ ମନ୍ତ୍ରରେ ପରିବେଶ ପ୍ରତିଧ୍ବନିତ୍ବ ହୋଇ କାର୍ଯ୍ୟକ୍ରମ ଶୁଭାରମ୍ଭ କରାଯିବ ବୋଲି ସମ୍ପାଦକ ତଥା ମୁଖ୍ୟ ସଂଯୋଜକ ନବକିଶୋର ବେହେରା ଏକ ବିଜ୍ଞାପ୍ତିରେ କହିଛନ୍ତି।