14-Aug-2025

ବଲାଙ୍ଗୀର(ଦେବାଶିଷ ବହିଦାର): ସରକାରୀ ମହିଳା ମହାବିଦ୍ୟାଲୟ ଓ ସଂସ୍କୃତଭାରତୀ, ବଲାଙ୍ଗିରର ମିଳିତ ଆନୁକୁଲ୍ୟରେ ବିଶ୍ୱ ସଂସ୍କୃତ ସପ୍ତାହ ପାଳିତ ହୋଇଯାଇଛି। ଏହି ସମ୍ମିଳନୀରେ ମହାବିଦ୍ୟାଲୟର ଅଧ୍ୟକ୍ଷ ଡଃ. ଅରବିନ୍ଦ କୁମାର ଓଝା ସଭାପତିତ୍ୱ କରିଥିବା ବେଳେ ମୁଖ୍ୟବକ୍ତା ଭାବେ ଦଧିବାମନ ମହାବିଦ୍ୟାଳୟ, ଭଟଲୀର ଅବସରପ୍ରାପ୍ତ ସଂସ୍କୃତ ପ୍ରାଧ୍ୟାପକ ଆୟୁଷ୍ମନ୍ତ ଷଡଙ୍ଗୀ ଯୋଗଦାନ କରି ସଂସ୍କୃତ ଭାଷାର ବହୁବିଧ ଦିଗ ଉପରେ ଛାତ୍ରୀମାନଙ୍କୁ ଉପଦେଶ ଦେଇ ଥିଲେ । ଏହି ଉଦ୍ଯାପନୀ ଉତ୍ସବରେ ବିଭାଗୀୟ ମୁଖ୍ୟ ଡଃ. ସଦାଶିବ ମଲ୍ଲିକ ଅତିଥି ମାନଙ୍କର ପରିଚୟ ପ୍ରଦାନ କରିଥିବାବେଳେ ଅଧ୍ୟାପକ ଆଦର୍ଶ ମହାପାତ୍ର ବେଦମନ୍ତ୍ର ପାଠ କରିଥିଲେ। ସପ୍ତଦିବସବ୍ୟାପୀ କରାଯାଇ ଥିବା ସମସ୍ତ କାର୍ଯ୍ୟକ୍ରମର ବିବରଣୀ  ଡଃ. ସମୀର କୁମାର ବିଶ୍ୱାଲ ପ୍ରଦାନ କରିଥିଲେ। ଯଥା - ଉକ୍ତ ସପ୍ତାହର  ପ୍ରଥମ ଦିବସରେ ଆଭାସୀୟ ମାଧ୍ୟମରେ ଛାତ୍ରୀମାନଙ୍କ ଦ୍ୱାରା ଅଭିନନ୍ଦନ ପତ୍ର ନିର୍ମାଣ, ଦ୍ବିତୀୟ ଦିବସରେ ମହାବିଦ୍ୟାଳୟ ପରିସରରେ ଚନ୍ଦନ,ତିଳକ ଅର୍ପଣ, ତୃତୀୟରେ ବଲାଙ୍ଗୀର ସ୍ଥିତ ଶ୍ରୀ ଗୋପାଳଜୀ ମନ୍ଦିର ପ୍ରାଙ୍ଗଣରେ ଶ୍ରୀମଦ୍ଭାଗବଦ୍ ଗୀତା ର ଶ୍ଲୋକ ପଠନ, ଚତୁର୍ଥରେ ପଥରଚେପା ସ୍ଥିତ ପାର୍ବତୀ ଗିରି ବାଳ ନିକେତନରେ ରକ୍ଷାବନ୍ଧନ, ପଞ୍ଚମରେ ସ୍ବଗୃହେ ସଂସ୍କୃତ ଦିବସ ପାଳନ, ଷଷ୍ଠରେ ବିଦ୍ୟାଭୂଷଣ ସଂସ୍କୃତ ମହାବିଦ୍ୟାଳୟ ରେ ସଂସ୍କୃତ ପୁସ୍ତକ ବିକ୍ରୟ ଏବଂ ସପ୍ତମ ଦିବସରେ କଲେଜର ଛାତ୍ରୀମାନଙ୍କ ମଧ୍ୟରେ ଅନେକ ପ୍ରତିଯୋଗିତା ଆୟୋଜନ କରାଯାଇଥିଲା ଓ ଏଥିରେ ବହୁସଂଖ୍ୟକ ଛାତ୍ରୀ ଅଂଶଗ୍ରହଣ କରିଥିଲେ। ଉକ୍ତ କାର୍ଯ୍ୟକ୍ରମରେ କୃତୀ ପ୍ରତିଯୋଗୀ ମାନଙ୍କୁ ପୁରଷ୍କାର ପ୍ରଦାନ କରାଯାଇଥିଲା। ଏହି ପୁରଷ୍କାର ପ୍ରଦାନ ଉତ୍ସବରେ ଅଧ୍ୟାପକ ରଂଜିତ କୁମାର ପାତ୍ର ସହଯୋଗ କରିଥିଲେ। 
ଉଦ୍ଯାପନୀ ଉତ୍ସବକୁ ଅଧ୍ୟାପକ ଶ୍ରୀ ଅଜିତ କୁମାର ପଣ୍ଡା ସଂଚାଳନ କରିଥିବା ବେଳେ ଛାତ୍ରୀ ଫଗୁନୀ ମାଝୀ ସଂଯୋଜିକା ଭାବରେ କାର୍ଯ୍ୟନିର୍ବାହ କରିଥିଲେ। ଉକ୍ତ କାର୍ଯ୍ୟକ୍ରମରେ ମହାବିଦ୍ୟାଳୟର ସମସ୍ତ ଅଧ୍ୟାପକ, ଅଧ୍ୟାପିକା ଏବଂ କର୍ମଚାରୀମାନେ ସକ୍ରିୟ ଅଂଶଗ୍ରହଣ କରିଥିଲେ । ଶେଷରେ ଅଧ୍ୟାପିକା ସରସ୍ୱତୀ ଭୋଇ ଧନ୍ୟବାଦ ଅର୍ପଣ କରିଥିଲେ।