20-Jul-2025

ରାୟଗଡ(ସୁପ୍ରିୟା ଷଡଙ୍ଗୀ): ରମାନାଗୁଡା ବ୍ଲକ ଏକ ଆଦିବାସୀ ବହୁଳଅଞ୍ଚଳ ଅଟେ l ଏଠାକାର ଚାଷୀ ମାନଙ୍କର ଆୟ ବହୁତ ସ୍ୱଳ୍ପ ଅଟେ। ଏଥିପାଇଁ ଏହି ଅଞ୍ଚଳରେ ଉଚ୍ଚ ଆୟ ସମ୍ପନ୍ନ ପାଇଁ  ରାଜ୍ୟ ସରକାରଙ୍କ  ଓଡିଶା ଜୀବିକାମିଶନ (OLM) ତରଫରୁ ବିଭିନ୍ନ ପ୍ରକଳ୍ପ ହାତକୁ ନିଆଯାଇଥିଲା। ତାମଧ୍ୟରୁ ଗୋଗୁପlଡୁ ଗ୍ରାମ ପାଞ୍ଚାୟତର ଗୋଟା ଗ୍ରାମରେ ଥିବା ‘ମା ନନ୍ଦ ଗଣ୍ଡା’ ସ୍ୱୟଂ ସହାୟକ ଗୋଷ୍ଠୀ ସଭ୍ୟାମାନେ(ଓଡିଶା ଜୀବିକା ମିଶନ) ର ଅଧିକ ମୂଲ୍ୟଯୁକ୍ତ ଶସ୍ଯ  ଅଧିନରେ ଡ୍ରାଗନ ଫଳ ଚାଷ କରିବା ପାଇଁ ଇଚ୍ଛାପ୍ରକାଶ କରିଥିଲେ l

ଏହାପରେ ପଞ୍ଚାୟତ ସମିତି କାର୍ଯ୍ୟାଳୟରେ କୃଷି ବିଭାଗ, ଉଦ୍ୟାନବିଭାଗ ଓଡିଶା ଜୀବିକା ମିଶନ ଓ ବିଭିନ୍ନ ବିଭାଗକୁ ନେଇ ଏକ କମିଟି ଗଠନ କରାଯାଇଥିଲା। ସବୁ ବିଭାଗର ସହଭାଗୀତାରେ ଉକ୍ତ ଚାଷ କିପରି ଉନ୍ନତ ଧରଣର କରାଯିବ ତାହା ସ୍ଥିରୀକୃତ କରା ଯାଇଥିଲା। ଡ୍ରାଗନ ଫଳ ଚାଷ ନିମନ୍ତେ ମୃତ୍ତିକା ପରିକ୍ଷଣ କରା ଯାଇଥିଲା । ଏହାପରେ ମହାତ୍ମା ଗାନ୍ଧୀ କର୍ମ ନିଯୁକ୍ତି ଯୋଜନା  ଓ କୃଷି ବିଭାଗର ପରାମର୍ଶ ଅନୁଯାଇ ଜମିକୁ ଚାଷଉପଯୋଗୀ କରାଯାଇଥିଲା l ସ୍ୱୟଂ ସହାୟକ ଗୋଷ୍ଠୀ ସଭ୍ୟା ମାନଙ୍କୁ ଉକ୍ତ ଚାଷ ନିମନ୍ତେ ପ୍ରଶିକ୍ଷଣ ଦେବା ପାଇଁ କନ୍ଧମାଳ ଜିଲ୍ଲାର ଫିରିଙ୍ଗିଆ ବ୍ଲକକୁ ପରିଦର୍ଶନ ନିମନ୍ତେ ନିଆଯାଇଥିଲା ।  ଏହା  ପରେ ମା ମାନେ ପ୍ରାୟ ୦.୭୫ ଏକର ଜମିରେ ଚାଷ କରିବା ପାଇ ୧୫୦ ଗୋଟି ପୋଲ ଏବଂ  ଫ୍ରେମ ତିଆରି କରିଥିଲେ ପୋଲ ଏବଂ ଫ୍ରେମର ଦାମ ମୋଟ ୧୨୦୦ ଟଙ୍କା ଏବଂ ମୋଟ ୧୫୦ ସେଟ ନିମନ୍ତେ ୧,୮୦୦୦୦ ଟଙ୍କା ଖର୍ଚ ହେଇଛି । ଚାଷ ନିମନ୍ତେ ୬୦୦ ଚାରା ପାଇଁ ୩୦୦୦୦ ଟଙ୍କା ଖର୍ଚ କରାଯାଇଛି । ଉକ୍ତ ଖର୍ଚ ଓଡିଶା ଜୀବିକା ମିଶନ (ଅଧିକ ମୂଲ୍ୟଯୁକ୍ତ ଶସ୍ଯ) ସ୍କୀମ ରୁ ବହନ କରାଯାଇଛି ।ଉଦ୍ୟାନ ବିଭାଗ ତରଫରୁ  ଡ୍ରିପ ଏବଂ ଚାରା ନିମନ୍ତେ ସବସିଡିର ବ୍ୟବସ୍ତା କରାଯାଇଛି l ଉକ୍ତ ଚାଷ କରି

ମୋଟ ୧ବର୍ଷ ଅତିକ୍ରମ ହୋଇଛି । ବର୍ତମାନ ଫଳ ଅମଳ ସହିତ ବଜାରରେ ବିକ୍ରି ମଧ୍ୟ ଆରମ୍ଭ ହେଲାଣି ।

ଏହି ଚାଷରୁ ୧କେଜି କୁ ୩୦୦ଟଙ୍କା ହିସାବରେ ବର୍ଷକୁ ପ୍ରାୟ ୭ ରୁ ୮ଲକ୍ଷ ଆୟ ହେବାର ସମ୍ଭାବନା ରହିଛି। ଏହିଭଳି ଏକ ନିଆରା ଏବଂ ଉଚ୍ଚ ଜ୍ଞାନକୌଶଳ ସମ୍ପନ୍ନ ଡ୍ର୍ଯାଗନ ଫୃଟ୍ ଚାଷ  ଜିଲ୍ଲାପାଳ ତଥା CEO ଶ୍ରୀମତୀ ପାରୁଲ ପଟ୍ଟୱାରୀଙ୍କ ମାର୍ଗଦର୍ଶିକା ଅନୁଯାୟୀ ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ଜିଲ୍ଲାପରିଷଦ, ରାୟଗଡା ଅକ୍ଷୟ କୁମାର ଖେମୁଣ୍ଡୁଙ୍କ ପ୍ରତ୍ଯକ୍ଷ ତତ୍ବାବଧାନ, ବ୍ଲକ ପ୍ରଶାସନର ବୈଷୟିକ ଓ ସମୟୋପଯୋଗୀ ନିରନ୍ତର  ପ୍ରୋସାହନ ଓ  ସ୍ୱୟଂ ସହାୟକ ଗୋଷ୍ଠୀ ମାନଙ୍କ ନିରନ୍ତର ଉଦ୍ୟମରେ ସଫଳ ହେଇଅଛି ।