16-Jul-2025

ସିନ୍ଧେକେଲା (ଅନୀଲ କୁମାର ତ୍ରିପାଠୀ): ବଲାଙ୍ଗୀର ଜିଲ୍ଲା ସିନ୍ଧେକେଲା ଏକ ପଞ୍ଚାୟତ ମୁଖ୍ୟାଳୟ ହୋଇଥିଲେ ହେଁ ଗାଁ ର ଅବସ୍ଥିତି ପ୍ରାକୃତିକ ଶୋଭାରେ ପରିପୂର୍ଣ୍ଣ ବୃକ୍ଷଲତା, ପାହାଡ ତିନୋଟି ଦିଗରେ ଦଣ୍ଡାୟମାନ ଥିବାବେଳେ ଦକ୍ଷିଣ ଦିଗରେ ବହି ଯାଇଛି ବିସ୍ତିଣ୍ଣ ଉନ୍ଦେର ନଦୀ। ଆଉ ଉନ୍ଦେର ନଦୀର ଅନତୀ ଦୁରରେ ରହିଛି ଶ୍ରୀ ଶ୍ରୀ ପାତାଳେଶ୍ବର ମହାଦେବଙ୍କ ମନ୍ଦିର। ଲୋକକଥା ରହିଛି ଉକ୍ତ ମନ୍ଦିରରେ ପୂଜା ପାଉଥିବା ଶିବଲିଙ୍ଗ ପ୍ରାକୃତିକ ଭାବେ ପାତାଳ ଫାଟି ଶିବଲିଙ୍ଗ ଆବିର୍ଭାବ ହୋଇଥିବାରୁ ମହାଦେବଙ୍କ ନାମ ପାତାଳେଶ୍ବର ରହିଛି। ଦଶନ୍ଧି ଦଶନ୍ଧି ଧରି ସିନ୍ଧେକେଲା ଅଞ୍ଚଳବାସୀଙ୍କ ଆସ୍ଥା ଓ ବିଶ୍ବାସ ସହ ଜଡ଼ିତ ଥିବା ଏହି ମନ୍ଦିର ରେ ଭକ୍ତ ଓ ଶ୍ରଦ୍ଧାଳୁ ମାନଙ୍କ ମତକୁ ନେଇ ଶ୍ରାବଣ ମାସର ପ୍ରତ୍ୟେକ ଦିନ ଶ୍ରୀଙ୍ଗାର ବେଶରେ ସୁସଜ୍ଜିତ କରିବାପାଇଁ ପୂଜକ ମାନଙ୍କ ନିର୍ଣ୍ଣୟ ହୋଇଥିଲା। ପୂଜକ ନିତ୍ୟାନନ୍ଦ ତ୍ରିପାଠୀ, ମୁରଲି ତ୍ରିପାଠୀ, ସଦାନନ୍ଦ ତ୍ରିପାଠୀଙ୍କ ତତ୍ବାବଧାନରେ ଯୁବ ପୂଜକ ଶିବାନନ୍ଦ ତ୍ରିପାଠୀ ଓ ଜନ୍ମେଜୟ ତ୍ରିପାଠୀ ପ୍ରତ୍ୟେକ ଦିନ ବିଭିନ୍ନ ବେଶରେ ସୁସଜ୍ଜିତ କରୁଛନ୍ତି। ତେବେ ମଙ୍ଗଳବାର ଶ୍ରାବଣର ପଞ୍ଚମ ଦିନ ଉପଲକ୍ଷେ ବହୁତ ସୁନ୍ଦର ଭାବେ ସୁସଜ୍ଜିତ ହୋଇଥିବା ମହାଦେବଙ୍କ ଶ୍ରୀଙ୍ଗାର ବେଶକୁ ବହୁ ଭକ୍ତ ଓ ଶ୍ରଦ୍ଧାଳୁ ଦର୍ଶନ କରିଥିଲେ।