12-Jul-2025

ବରୀ(ରଞ୍ଜିତ ମହାନ୍ତିଙ୍କ ରିପୋର୍ଟ): ବରୀ ବ୍ଲକର ମୁଖ୍ୟ ରାସ୍ତା  ହେଉଛି  ବରୀ ବିଦୃପା ରାସ୍ତା। ଏହି ରାସ୍ତା ସାରା ଖାଲଖମାରେ ଭରପୁର,ବର୍ଷା ପାଣି ଜମିରହିବା ସାଙ୍ଗକୁ  ଯୋଗୁଁ  ରାସ୍ତାର ଅବସ୍ଥା ଅତି ଶୋଚନୀୟ ହୋଇ ପଡିଛି। ଯାତାୟତ ବେଳେ ଧୀରେ ଧୀରେ  ଯିବାକୁ  ସ୍ଥାନୀୟ ଲୋକେ  ରାସ୍ତା ଉପରେ ଠିଆ ହୋଇ କହୁଥିବା ଦେଖିବାକୁ ମିଳିଛି। ଏ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। କହୁଥିବା ଲୋକଟି  ସାଧାରଣ ଲୋକଙ୍କ  ଠାରୁ  କିଛି ଆର୍ଥିକ  ସାହାଯ୍ଯ  ମାଗୁଥିବା  ଦେଖିବାକୁ ମିଳିଛି।କିଛି ଲୋକ  ଖୁସି ହୋଇ  ଅର୍ଥ ବି ଦେଉ ଛନ୍ତି। ତେବେ  ସରକାରଙ୍କ ତ୍ରୁଟି ପାଇଁ ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି କୁହାଯାଉଛି। ଜଣାଯାଇଛି ଯେ ଏହି ରାସ୍ତାଟି ପୂର୍ତ୍ତ ଗୃହ ନିର୍ମାଣ ବିଭାଗ ଅଧିନରେ ରହିଛି। ଠିକାଦାର ଜରିଆରେ ମରାମତି ଉନ୍ନତିକରଣ କାର୍ଯ୍ୟ କରା ଯାଉଥିଲା ବେଳେ ଏବେ ବର୍ଷା  ଯୋଗୁଁ ମରାମତି କାମ ଠପ ହୋଇ ଯାଇଛି । ଠିକାଦାର ରାସ୍ତା ଖୋଳି ଦେଇଛି l ଗୋଡି,ମେଟାଲ  ପକାଇନାହିଁ।ଏହି ସମୟରେ ବର୍ଷା ଆରମ୍ଭ ହୋଇ ଯାଇଛି। ଦୈନିକ ବର୍ଷା ହେଉଥିବାରୁ  ଠିକାଦାର  ବର୍ଷା  ଆଳରେ କାମ ବନ୍ଦ କରିଦେଇଛି ବୋଲି ଅଭିଯୋଗ ହୋଇଛି।୨୪କୋଟି ଟଙ୍କା ରୁ ଉର୍ଦ୍ଧ ବ୍ୟୟ ଅଟକଳ ରେ କାମ ଚାଲିଛି। କୌଣସି ସ୍ଥାନ ରେ ସୂଚନା ଫଳକ  ରହିନାହିଁ ।ଏ ନେଇ ସାଧାରଣରେ ତୀବ୍ର ନିନ୍ଦା ପ୍ରକାଶ ପାଇଛି।ଅଲିପୁର, ଅନ୍ଯାସିପୁର, କଳାମାଟିଆ, ବାଲିବିଲି,ରାମଚନ୍ଦ୍ରପୁର,ବରୀ ଆଦି ଗ୍ରାମର ଶତାଧିକ ଲୋକ  ବିଭାଗୀୟ  ମନ୍ତ୍ରୀଙ୍କୁ  ଲିଖିତ ଅଭିଯୋଗ କରିଥିବା ଜଣାପଡିଛି। ଏହି ରାସ୍ତାର ନାମ ୧୯  ଏବିସି  ହୋଇଥିଲା ବେଳେ  ବ୍ଲକର  ଏହା ମୁଖ୍ୟ ରାସ୍ତା,ଏହି ରାସ୍ତା ଦେଇ ଦୈନିକ  ଜିଲ୍ଲା ପ୍ରଶାସନ, ବ୍ଲକ ପ୍ରଶାସନ ସ୍ଥାନୀୟ ନେତାନେତ୍ରୀ ଯାତାୟତ କରୁଥିଲେ ବି  ଗୁରୁତ୍ୱ  ବୋଲି  କେହି ମନେ କରୁନାହାଁନ୍ତି।  ତେବେ ଏ ନେଇ ଜନଆନ୍ଦୋଳନ  ହେବ ବୋଲି ସୂଚନା ମିଳିଛି। ଠିକାଦାର, ଯନ୍ତ୍ରୀ,  ସ୍ଥାନୀୟ ନେତାଙ୍କ ସଲାସୁତୁରାରେ ମରାମତି କାମ  ଚାଲିଛି  ବୋଲି ଅଭିଯୋଗ ହୋଇଛି। ତାହା ପୂଣି ଅତି ନିମ୍ନମାନର ହେଉଛି।ଯେଉଁଠାରେ ଗାଡ  କରାଯିବା କଥା କରାଯାଉନାହିଁ। କାମ ବେଳେ  ପାଣି ଛିଞ୍ଚନ କରାଯାଉନାହିଁ  ବୋଲି ଅଭିଯୋଗ  ହୋଇଛି। ତେବେ ବିଭାଗୀୟ  ଉଚ୍ଚ କର୍ତ୍ତୃପକ୍ଷ  ତଦନ୍ତ  କଲେ ସଠିକ  ବିବରଣୀ  ମିଳିପାରନ୍ତା ବୋଲି ମତପ୍ରକାଶ ପାଇଛି।