06-Jul-2025

ନୂଆପଡ଼ା(ପରମେଶ୍ଵର ମେହେର): ଥିଲା ଲୋକେ ଶଗଡ଼ ଗାଡ଼ିରେ ଯାତାୟାତ କରୁଥିଲେ। ବରଯାତ୍ରୀ ବି ଯାଉଥିଲେ। ଯୁଗ ବଦଳିବା ସହ ଲୋକଙ୍କ ଚାଲିଚଳଣିରେ ପରିବର୍ତ୍ତନ ହୋଇଛି। ବିବାହ ଭଳି ସାମାଜିକ କାର୍ଯ୍ୟକ୍ରମ ବ୍ୟୟବହୁଳ ହେଲାଣି। ବହୁ ଦାମୀ ଗାଡ଼ିରେ ବରଯାତ୍ରୀ ଯାଉଛନ୍ତି। ବାଣ ଫୁଟାଉଛନ୍ତି। ଏଭଳି ସମୟରେ ବିନା ଗାଡ଼ିମୋଟର, ବାଜାବାଣରେ ଶଗଡ଼ ଗାଡ଼ିରେ ବର ଯାଇଛନ୍ତି କନ୍ୟାଘରକୁ। ପରିବେଶ ପ୍ରଦୂଷଣ ରୋକିବା ଏବଂ ପୁରୁଣା ସଂସ୍କୃତି-ପରମ୍ପରା ବଞ୍ଚାଇବା ଉଦ୍ଦେଶ୍ୟରେ ନୂଆପଡ଼ା
ସହରର ସିରତୋଲ ବସ୍ତିର ଜୀବନ ଦଣ୍ଡସେନାଙ୍କ ଏଭଳି ପ୍ରୟାସ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ନୂଆପଡ଼ା ସହର ୱାର୍ଡ ନଂ.୧୨ ସିରତୋଲ ବସ୍ତର ବଣ୍ଡୁଲାଲ ଦଣ୍ଡସେନାଙ୍କ ପୁଅ ଜୀବନଙ୍କ ସହ ଛତିଶଗଡ଼ର ମହାସମୁନ୍ଦ ଜିଲ୍ଲା ଭାଲେଶ୍ଵର ଗାଁର ବଂଶୀଲାଲ ସିହ୍ନାଙ୍କ ଝିଅ ଛାୟାଙ୍କ ବିବାହ ଠିକ୍ ହୋଇ ଥିଲା। ଝିଅ ଘର ଦୂର ହୋଇଥିବାରୁ ନୂଆପଡ଼ାରେ ବିବାହ କରାଯିବାକୁ ନିଷ୍ପତ୍ତି ହୋଇଥିଲା । ଗତ ଗୁରୁବାର ଜୀବନ ଓ ଛାୟାଙ୍କcବିବାହ ସମ୍ପନ୍ନ ହୋଇଥିଲା। ରାତିରେ ସିରତୋଲରୁ ବରବେଶରେ ସଜେଇ ହୋଇ ବାହାରିଥିଲେ ଜୀବନ। କିନ୍ତୁ ବରଯାତ୍ରୀ ଶୋଭାଯାତ୍ରାରେ ନା ଥିଲା ଗାଡ଼ି ନା ରୋଷଣି।
ଏମିତି କି ବାଣ ବି ଫୁଟି ନ ଥିଲା। ବରଯାତ୍ରୀ ଦଳ ଜାତୀୟ ରାଜପଥ-୩୫୩ ଦେଇ କନ୍ୟା ଘରେ ପହଞ୍ଚିଥିଲେ। ଏଭଳି ସାଦାସିଧା ରୋଷଣିକୁ ଯିଏ ଦେଖୁଥିଲେ; ଘଡିଏ ଅଟକି ଯାଉଥିଲେ । ଅନେକ ଆଚମ୍ବିତ ମଧ୍ୟ ହେଉଥୁଲେ। ପରମ୍ପରା ଓ ସଂସ୍କୃତିକୁ ଉଜ୍ଜୀବିତ କରିବାକୁ ଉଚ୍ଚଶିକ୍ଷିତ ତଥା ସ୍ଵଚ୍ଛଳ ପରିବାରର ପୁଅ ଜୀବନଙ୍କ ଏଭଳି ପଦକ୍ଷେପକୁ ସବୁ ମହଲରେ ପ୍ରଶଂସା କରାଯାଇଛି।