05-Jul-2025

ବଲାଙ୍ଗୀର(ପ୍ରେରଣା ଖବର)- ବଲାଙ୍ଗୀର ଓ ସୁବର୍ଣ୍ଣପୁର ଜିଲ୍ଲାର ଚାଷୀଙ୍କର ଜୀବନରେଖା କୁହାଯାଉଥିବା ବଲାଙ୍ଗୀର କେନ୍ଦ୍ରସମବାୟ ବ୍ୟାଙ୍କରେ ବ୍ୟାପକ ମାତ୍ରାରେ ଅନୀୟମିତତା କରାଯାଉଥିବା ଅଭିଯୋଗ ଉଠିଛି । ବ୍ୟାଙ୍କ ପରିଚାଳନାରେ ତୃଟିଯୋଗୁଁ ବ୍ୟାଙ୍କରେ ବହୁତ ପରିମାଣରେ କ୍ଷତିହେଉଛି। ବ୍ୟାଙ୍କର ଏନପିଏ ୧୦% ଉପରକୁ ଯାଇସାରିଥିବା ବେଳେ ବ୍ୟାଙ୍କ ସି ଗ୍ରେଡକୁ ଖସିଯାଇ ସାରିଛି । ଏପରିକି ବିଡିସିସି ବ୍ୟାଙ୍କର ୱାର୍କିଂ କ୍ୟାପିଟାଲ ୨୫୦୦ କୋଟିରୁ ୬୨୩ କୋଟି ଟଙ୍କାର ଇମବାଲାନ୍ସ ବାହାରୁଛି । ଏହାର କୌଣସି ହିସାବ ମିଳୁନାହିଁ । ତଥାପି ବ୍ୟାଙ୍କ ପକ୍ଷରୁ କର୍ମଚାରୀଙ୍କୁ ପଦୋନ୍ନତି ଦିଆଯାଇ ଦରମା ବଢାଯାଇଛି । ଏପରିକି ବ୍ୟାଙ୍କରେ ହୋଇଥିବା ପଦୋନ୍ନତିରେ ବ୍ୟାପକ ଅନୀୟମିତତା କରାଯାଇଥିବା ଅଭିଯୋଗ ଉଠିଛି । ଖୋଦ ଏପଣ୍ଟମେଣ୍ଟ କମିଟିରେ ଥିବା ଜଣେ ନିର୍ଦ୍ଦେଶକ ନୀହାର ସ୍ୱାଇଁ ବୋର୍ଡ ବୈଠକରେ ପଦୋନ୍ନତିରେ ଅନୀୟମିତତା କରାଯାଇଥିବା ଅଭିଯୋଗ ଉଠାଇଥିଲେ ଓ ଏହାକୁ ନେଇ ଶୁକ୍ରବାର ଦିନ ହୋଇଥିବା ବୋର୍ଡବୈଠକରେ ହୋହଲ୍ଲା ହୋଇ ୬ଜଣ ନିର୍ଦ୍ଦେଶକ ବୈଠକରୁ ଉଠିଚାଲିଯାଇଥିବା ସୂଚନା ମିଳିଛି । ଖବର ନେବାରୁ ଜଣାଯାଇଛି ଯେ,ବିଡିସିସି ବ୍ୟାଙ୍କରେ ଗତ କିଛିଦିନ ତଳେ ୪୪ଜଣ କର୍ମଚାରୀଙ୍କୁ ପଦୋନ୍ନତି ଦିଆଯାଇଛି । ସେଥିପାଇଁ ବ୍ୟାଙ୍କର ଏପଣ୍ଟମେଣ୍ଟ କମିଟିର ବୈଠକ ବସି ଥିଲା । ସେଥିରେ ଯିଏ ପଦୋନ୍ନତି ପାଉଥିଲେ ସେ ନିଜେ ସ୍କୃଟିନି କମିଟିରେ ରହିଥିଲେ । ଯାହାକୁ ନେଇ ସେହି କମିଟିର ସଭ୍ୟ ନୀହାର ସ୍ୱାଇଁ ଆପତ୍ତି ଉଠାଇଥିଲେ । କିନ୍ତୁ ସଂପାଦକ ଖାତିର କରିନଥିଲେ । ପଦୋନ୍ନତି ଦେଲା ବେଳେ ସବୁ ନୀୟମକାନୁନକୁ ଉଲଂଘନ କରାଯାଇଛି  ଓ ସେ ନିଜେ କମିଟରେ ଥାଇ ସୁଦ୍ଧା କିଏ କିଏ କିଭଳି ପଦୋନ୍ନତି ପାଇଲେ ଜାଣିପାରିଲେ ନାହିଁ ବୋଲି ଅଭିଯୋଗ କରି ନିର୍ଦ୍ଦେଶକ ନୀହାର ସ୍ୱାଇଁ ଅଭିଯୋଗ ଉଠାଇଥିଲେ । କମିଟିର ବୈଠକ ଦିନ କେବଳ ଉପସ୍ଥାନ ଖାତାରେ ଦସ୍ତଖତ ନେଇ ପଦୋନ୍ନତି ତାଲିକା ଅନୁମୋଦନରେ ତାଙ୍କର ଦସ୍ତଖତ ନିଆଯାଇ ନାହିଁ ବୋଲି ଶ୍ରୀ ସ୍ୱାଇଁ କହିଥିଲେ। ତେବେ ନୀୟମ ଅନୁଯାୟୀ ଯେଉଁ କର୍ମଚାରୀମାନଙ୍କର ୫ବର୍ଷରୁ ଅଧିକ ସମୟ ଚାକିରି ହୋଇଥିବ ଓ ତାଙ୍କର ୱାର୍କପରଫର୍ମମାନ୍ସକୁ ନେଇ ପଦୋନ୍ନତି ଦିଆଯାଇ ଥାଏ । ଗ୍ରେଡେସନ,ସିନିଅରିଟି ଓ ଓଆରଭି ଏକ୍ଟ ଅନୁଯାୟୀ ପଦୋନ୍ନତିର ବିଚାର କରାଯାଇଥାଏ । କିନ୍ତୁ କେତେକ କର୍ମଚାରୀଙ୍କ ଚାକିରି ୫ବର୍ଷ ପୂରଣ କରିନଥିଲେ ହେଁ ସେମାନଙ୍କୁ ପଦୋନ୍ନତି ଦିଆଯାଇଛି । ଠିକ ସେହିପରି ୬ଜଣ ସବ-ଷ୍ଟାଫ ଇଲିଜିବୁଲ ଥିବା ବେଳେ ୧୨ଜଣଙ୍କୁ ବେଆଇନ ଭାବରେ ପଦୋନ୍ନତି ଦିଆଯାଇଥିବା ତଥା ଓଆରଭି ଏକ୍ଟକୁ ଖୋଲାଖୋଲି ଉଲଂଘନ କରାଯାଇଥିବା ଅଭିଯୋଗ ହୋଇଛି । ଏହା ସହିତ ସୁବର୍ଣ୍ଣପୁର ଜିଲ୍ଲାର ବିନିକା, ଡୁଙ୍ଗୁରିପାଲି, ରାମପୁର ଭଳି ଗୁରୁତ୍ୱପୂର୍ଣ୍ଣ ଅଞ୍ଚଳରେ ସୁପରଭାଇଜର ନିଯୁକ୍ତି ଦିଆଯାଇନାହିଁ । ବ୍ୟାଙ୍କର ବ୍ରାଞ୍ଚମାନଙ୍କରେ ଠିକ ହିସାବରେ ନଗତରାଶି ରହିନଥିବାରୁ ଚାଷୀମାନେ ବ୍ୟାଙ୍କରୁ ଟଙ୍କା ଉଠାଣ ରେ ଅସୁବିଧା ହେଉଛି । ଗତ ଏକମାସ ତଳେ ବୋର୍ଡର ନିର୍ଦ୍ଦେଶକ ମାନେ ବିଭିନ୍ନ ବ୍ରାଞ୍ଚକୁ ଯାଇ ସେଠିକାର ସମସ୍ୟାଗୁଡିକୁ ସମାଧାନ ପାଇଁ ନିର୍ଦ୍ଦେଶ କରିଥିଲେ । କିନ୍ତୁ ବ୍ୟାଙ୍କର ସଂପାଦକ ସେହି ନିର୍ଦ୍ଦେଶକୁ ପାଳନ କରିନାହାଁନ୍ତି । ସେଥିପାଇଁ ବ୍ୟାଙ୍କର ଅବସ୍ଥା ଅହୁରି ବିଗୁଡୁଛି । ବ୍ୟାଙ୍କ ମୁଖ୍ୟାଳୟରେ ଅନେକ ସିନିୟର ମ୍ୟାନେଜର ରହିଥିବା ବେଳେ ଅନେକଗୁଡିଏ ବ୍ରାଞ୍ଚରେ ଇନଚାର୍ଜ ବ୍ରାଞ୍ଚମ୍ୟାନେଜର ରଖାଯାଇଛି କାହିଁକିଁ ବୋଲି ନିର୍ଦ୍ଦେଶକମାନେ ପ୍ରଶ୍ନ କରିଥିଲେ । କିନ୍ତୁ ସଂପାଦକଙ୍କଠାରୁ କୌଣସି ସନ୍ତୋଷ ଜନକ ଉତ୍ତର ନମିଳିବାରୁ ଅସନ୍ତୋଷ ପ୍ରକାଶ କରିଥିଲେ । ଶେଷରେ ବ୍ୟାଙ୍କର ଅନୀୟମିତତାକୁ ନେଇ ହୋହଲ୍ଲା ହୋଇଥିଲା ଓ ୬ଜଣ ନିର୍ଦ୍ଦେଶକ ବୈଠକଛାଡି ଉଠିଯାଇଥିଲେ ବୋଲି ଜଣାପଡିଛି । ଏନେଇ ବ୍ୟାଙ୍କ ନିର୍ଦ୍ଦେଶକ ନୀହାର ସ୍ୱାଇଁଙ୍କୁ ପଚାରିବାରୁ ସେ ବୋର୍ଡବୈଠକରେ ପଦୋନ୍ନତି ଅନୀୟମିତତା ନେଇ କଥା ଉଠିଥିଲା ଓ ସନ୍ତୋଷଜନକ ଉତ୍ତର ନମିଳିବାରି ଆମେ ୱାକଆଉଟ କରି ବୈଠକଛାଡି ଚାଲିଆସିଥିଲୁ ବୋଲି କହିଛନ୍ତି । ଠିକ ସେହିପରି ଅନ୍ୟତମ ନିର୍ଦ୍ଦେଶକ ସୁଶିଳ ଚାନ୍ଦଙ୍କୁ ମଧ୍ୟ ପଚରାଯିବାରୁ ବୈଠକଛାଡି ଚାଲିଆସିଥିବା କଥାକୁ ସ୍ୱୀକାର କରିଥିଲେ । ବୈଠକରେ ନିର୍ଦ୍ଦେଶକ ଲକ୍ଷ୍ମଣକୁୁମାର ମେହେର,ରାଜକିଶୋର ଡାଙ୍ଗ,ନୀହାର ସ୍ୱାଇଁ,ଶୁଶିଳ ଚାନ୍ଦ,ବନମାଳି ମେହେର ଓ କୃତ୍ତିବାସ ବାଘ ପ୍ରମୁଖ ବୈଠକ ଛାଡି ଚାଲିଯାଇଥିଲେ ବୋଲି ସୂଚନା ମିଳିଛି । ତେବେ ଏହି ଅଭିଯୋଗ ବିଷୟରେ ବଲାଙ୍ଗୀର କେନ୍ଦ୍ରସମବାୟ ବ୍ୟାଙ୍କର ମୁଖ୍ୟନିର୍ବାହୀଅଧିକାରୀ(ସିଇଓ) ହରିଶ୍ଚନ୍ଦ୍ର ଦାସଙ୍କୁ ପଚାରିବାରୁ ବୈଠକରେ ପଦୋନ୍ନତିନେଇ ଆଲୋଚନା ହୋଇଥିଲା ବୋଲି କହିଛନ୍ତି । କିନ୍ତୁ ଅନୀୟମିତତାକୁ ଅସ୍ୱୀକାର କରି କମିଟି ବୈଠକରେ ଡିଆରସିଏସଙ୍କ ପ୍ରତ୍ୟକ୍ଷ ତତ୍ୱାବଧାନରେ ସେହି କମିଟି ବୈଠକ ହୋଇଥିଲା ଓ ପଦୋନ୍ନତିର ତାଲିକା ଫାଇନାଲ ହୋଇଥିଲା ବୋଲି କହିଛନ୍ତି । ବ୍ୟାଙ୍କର ଅବସ୍ଥା ବିଷୟରେ ପଚାରିବାରୁ ରାଜ୍ୟର ସବୁ ବ୍ୟାଙ୍କରେ ସେହି ସମାନ ସମସ୍ୟା ରହିଛି ବୋଲି ଶ୍ରୀ ଦାସ କହିଥିଲେ ।