24-Jun-2025

ବିନିକା(ହିମାଂଶୁ ଶେଖର ପୁଟେଲ)ବିନିକା ଏନଏଏସିରେ ବର୍ଷେ ରୁ ଅଧିକ ହେଲା କନିଷ୍ଠ ଯନ୍ତ୍ରୀ ନଥିବାରୁ ଉନ୍ନୟନ କାର୍ଯ୍ୟ ସମ୍ପୂର୍ଣ୍ଣ ଠପ।ସେଥିପାଇଁ ଗତ ଚଳିତ ମାସ ୧୬ତାରିଖରେ ଏନଏଏସି ଉପାଧ୍ୟକ୍ଷା ତପସ୍ଵିନୀ ମେହେରଙ୍କ ନେତୃତ୍ୱରେ ଏକ ଦାବିପତ୍ର ସ୍ଥାନୀୟ କାର୍ଯ୍ୟନିର୍ବାହୀ ଅଧିକାରୀଙ୍କ ଜରିଆରେ ସୁବର୍ଣ୍ଣପୁର ଜିଲ୍ଲାପାଳଙ୍କୁ ପ୍ରଦାନ କରାଯାଇ ୭ଦିନ ଭିତରେ କନିଷ୍ଠ ଯନ୍ତ୍ରୀ ନିଯୁକ୍ତି ପାଇଁ ଅନୁରୋଧ କରାଯାଇଥିଲା ।ହେଲେ ୭ଦିନ ପୂରି ଯାଇଛି।ନୂତନ କନିଷ୍ଠ ଯନ୍ତ୍ରୀଙ୍କ ଦେଖାନାହିଁ ।ତେଣୁ ବାଧ୍ୟ ହୋଇ ଯନ୍ତ୍ରୀ ନଆସିବା ଯାଏ କାର୍ଯ୍ୟାଳୟକୁ ତାଲା ପକାଇ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ବନ୍ଦ ରଖାଯିବ ବୋଲି ଜନପ୍ରତିନିଧି ମାନେ ନିଷ୍ପତି ନେଇଥିବା ଜଣାପଡିଛି ।ମିଳିଥିବା ସୂଚନା ଅନୁସାରେ ୭ଦିନ ବିତିଯିବା ପରେ ସମସ୍ୟାର ସମାଧାନ ନହେବାରୁ ଉପାଧ୍ୟକ୍ଷା ତପସ୍ଵିନୀ ମେହେର, କାଉନସିଲର ଆଶାରାଣୀ ପଣ୍ଡା,ରେଣୁକା ବରାଇ,ବୈଜୟନ୍ତୀ କଟୁଆଳ,କଳ୍ପନା ଦୀପ,କୁନି ଚିରଗୁନି,ବୈରାଗୀ ପ୍ରଧାନ,ଗୋପାଳ କୃଷ୍ଣ ମହାଳିଂ,ବିଜୟ ବରାଇ,ପ୍ରଦୀପ ସେଠୀ,ଜିତେନ୍ଦ୍ର ମଲ୍ଲିକ ପ୍ରମୁଖ ୱାର୍ଡ ପ୍ରତିନିଧି ମାନେ ପୁନର୍ବାର ଏକ ଦାବିପତ୍ର ପ୍ରଦାନ କରି ୨୬ତାରିଖରୁ କାର୍ଯ୍ୟାଳୟ ସମ୍ଭୂଖ ମୁଖ୍ୟ ଫାଟକ ତାଲା ପକାଇ ଧାରଣା ଦେବେ ବୋଲି ପ୍ରଶାସନକୁ ଜଣାଇଛନ୍ତି। ସେମାନେ କହିଛନ୍ତି ଯେ କନିଷ୍ଠ ଯନ୍ତ୍ରୀ ନଥିବାରୁ ଦୀର୍ଘ ବର୍ଷ ହେଲା ବିନିକା ବିଜ୍ଞାପିତ ଅଞ୍ଚଳ ପରିଷଦ ଅଧିନସ୍ତ ବିଭିନ୍ନ ୱାର୍ଡରେ ଉନ୍ନୟନ କାର୍ଯ୍ୟ ସମ୍ପୂର୍ଣ୍ଣ ବନ୍ଦ ରହିଛି।ଏପରିକି କେତେକ କାର୍ଯ୍ୟର ଟେଣ୍ଡର ଓପନ ହୋଇଥିଲେ ମଧ୍ୟ ତାହା ବି ହୋଇପାରୁନାହିଁ ।ଯାହା ଫଳରେ ଜନସାଧାରଣଙ୍କ ଠାରୁ ଲୋକହସା ହେବାକୁ ପଡୁଛି ।ତେଣୁ କନିଷ୍ଠ ଯନ୍ତ୍ରୀ ପଦବୀ ତୁରନ୍ତ ପୂରଣ ନହେବା ପର୍ଯ୍ୟନ୍ତ ପରିଷଦ ବାସୀଙ୍କ ସାମୁହିକ ସ୍ବାର୍ଥ ସକାଶେ ୨୬ତାରିଖରୁ ତାଲା ପକାଇ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ବିକ୍ଷୋଭ ପ୍ରଦର୍ଶନ ଜାରି ରହିବ ବୋଲି ଚେତାବନୀ ଦେଇଛନ୍ତି।ଯଦି କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହୁଏ ତେବେ ପ୍ରଶାସନ ସମ୍ପୂର୍ଣ୍ଣ ଦାୟୀ ରହିବେ ବୋଲି ସେମାନେ କହିଛନ୍ତି।