01-Jun-2025

ଭବାନୀପାଟଣା(ପ୍ରେରଣା ଖବର): ଏସୟୁଜେ କଳାହାଣ୍ଡି ଜିଲ୍ଲା ଶାଖାର ଏକ ଗୁରୁତ୍ୱପୂର୍ଣ ବୈଠକ ଭବାନୀପାଟଣା ସ୍ଥିତ ହୋଟେଲ ମିଡ଼ଟାଉନ କନଫରେନ୍ସ ହଲ ଠାରେ ଅନୁଷ୍ଠିତ ହୋଇଯାଇଛି। ଉକ୍ତ କାର୍ଯ୍ୟକ୍ରମରେ ଏସୟୁଜେ ରାଜ୍ୟ ଶାଖାର ଉପସଭାପତି ତଥା କଳାହାଣ୍ଡି ଜିଲ୍ଲା ଅବଜାରଭର ମହେନ୍ଦ୍ର କୁମାର ଦର୍ଜୀ ମୁଖ୍ୟ ଅତିଥି ଭାବେ ଯୋଗଦେଇ ସାମ୍ବାଦିକ ସମୂହଙ୍କ ମୌଳିକ ତଥା ସାମଗ୍ରିକ ସମସ୍ୟା ଏବଂ ତାର ସ୍ଥାୟୀ ସମାଧାନ ନିମନ୍ତେ ଆବଶ୍ୟକୀୟ ପଦକ୍ଷେପ ସମ୍ବନ୍ଧୀୟ ଗୁରୁତ୍ୱପୂର୍ଣ ପ୍ରସଙ୍ଗ ଉପରେ ଉପସ୍ଥିତ ସଭ୍ୟ ମାନଙ୍କ ସହ ଆଲୋଚନା କରିଥିଲେ। ସମୂହ ନିଷ୍ପତ୍ତି ଅନୁଯାୟୀ ନିକଟ ଭବିଷ୍ୟତରେ କଳାହାଣ୍ଡି ଜିଲ୍ଲା ଭବାନୀପାଟଣା ଠାରେ ଏସୟୁଜେ ରାଜ୍ୟ କାର୍ଯ୍ୟକରିଣୀ ବୈଠକ କରିବା ପାଇଁ ନିଷ୍ପତ୍ତି ହୋଇଥିଲା।ଏହି କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଏସୟୁଜେ ବଲାଙ୍ଗିର ଜିଲ୍ଲା ଶାଖାର କାର୍ଯ୍ୟନିର୍ବାହି ସଭ୍ୟ ବାଳକୃଷ୍ଣ ଷଡ଼ଙ୍ଗୀ ଉପସ୍ଥିତ ରହି ସଂଘର ସଂଗଠନ ଜିଲ୍ଲାରେ କିଭଳି ବଳିଷ୍ଠ ଏବଂ ବ୍ୟାପକ ହେବାସହ ସଂଗଠିତ ହୋଇ ରହିବାପାଇଁ ପରାମର୍ଶ ଦେବା ସହ ଉପସ୍ଥିତ ସଭ୍ୟ ମାନଙ୍କୁ ଉତ୍ସାହିତ କରିଥିଲେ।ପ୍ରଥମେ ମୁଖ୍ୟ ଅତିଥି ଶ୍ରୀ ଦର୍ଜୀ ଏବଂ ସମ୍ମାନିତ ଅତିଥି ଶ୍ରୀ ଷଡ଼ଙ୍ଗୀ ଉଭୟଙ୍କୁ  ଜିଲ୍ଲା ଶାଖାର ସଭାପତ ନାରାୟଣପ୍ରସାଦ ନାୟକ ଏବଂ କୋଷାଧ୍ଯକ୍ଷ  ନାରାୟଣ ଯୋଶୀ ପୁଷ୍ପଗୁଚ୍ଛ ଦେଇ ଅଭିନନ୍ଦନ ଜଣାଇବା ସହ ଜିଲ୍ଲାକୁ ସ୍ୱାଗତ କରିଥିଲେ। ପରେ ପରେ ସଂଘର ଜିଲ୍ଲାଶାଖା ସମ୍ପାଦକ ସାରଦା ପ୍ରସାଦ ମହାନ୍ତିଙ୍କ ସମେତ  ୧୫ରୁ ଅଧିକ ସଭ୍ୟ ଉପସ୍ଥିତ ରହି ଆଲୋଚନାରେ ସକ୍ରିୟ ଅଂଶଗ୍ରହଣ କରିଥିଲେ।