07-May-2025

ସୋନପୁର,  (ମନୋରଞ୍ଜନ ତ୍ରିପାଠୀ):  ସୋନପୁର ଗଡ଼ଭିତର ନିବାସୀ ଶିକ୍ଷାବିତ୍ ବିଧୁ ଭୂଷଣ ପାଣିଗ୍ରାହୀଙ୍କ ଧର୍ମପତ୍ନୀ ତଥା ସାମ୍ବାଦିକ ମନୋରଞ୍ଜନ ପାଣିଗ୍ରାହୀଙ୍କ ମା‘ ଶୈବାଳିନୀ ପାଣିଗ୍ରାହୀ(୬୮)ଙ୍କ ଗତକାଲି ବିୟୋଗ ଘଟିଛି। ଦୀର୍ଘବର୍ଷ ହେଲା ସେ ମଧୁମେୟ, ହୃଦ୍ ଜନିତ ସମସ୍ୟାରେ ପୀଡ଼ିତ ଥିଲେ।  ଗତକାଲି ଅପରାହ୍ନରେ ହଠାତ୍ ଅସୁସ୍ଥତା ଅନୁଭବ କରିବାରୁ ତାଙ୍କୁ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ସନ୍ଧ୍ୟା ପ୍ରାୟ ୭ଟାରେ ତାଙ୍କ ବିୟୋଗ ଘଟିଥିଲା। ମୃତ୍ୟୁଶଯ୍ୟା ନିକଟରେ ଚାରି ପୁତ୍ର ମନୋରଞ୍ଜନ, ମାନସରଞ୍ଜନ, ସିଦ୍ଧାର୍ଥ, ବେଦପ୍ରକାଶ, ତିନି ପୁତ୍ରବଧୂ, ନାତି ଜିତାମିତ୍ର, ଶୀତିକଣ୍ଠ, ସମ୍ଭବ, ନାତୁଣୀ ସାମ୍ଭବୀ ଓ ବନ୍ଧୁବର୍ଗ ଉପସ୍ଥିତ ଥିଲେ। ସ୍ଵର୍ଗତା ପାଣିଗ୍ରାହୀ ଜଣେ ଧର୍ମପରାୟଣା, ସ୍ନେହୀ, ପରୋପକାରୀ ମହିଳା ଭାବେ ପରିଚିତ ଥିଲେ। ଆଜି ପ୍ରତ୍ୟୁଷରେ ସୋନପୁର ରାମେଶ୍ବରସ୍ଥିତ ତ୍ରିବେଣୀ ସଙ୍ଗମ ସ୍ୱର୍ଗଦ୍ୱାରରେ ତାଙ୍କ ଅନ୍ତିମ ସତ୍କାର କରାଯାଇଥିଲା। ବଡ଼ପୁଅ ମନୋରଞ୍ଜନ ମୁଖଗ୍ନି ଦେଇଥିଲେ। ଶବାଧାରରେ ସହରର ଅନେକ ବ୍ୟକ୍ତିବିଶେଷ, ବନ୍ଧୁବର୍ଗ, ଆତ୍ମୀୟ ସ୍ୱଜନ ସାମିଲ ଥିଲେ। ତାଙ୍କ ବିୟୋଗରେ ପରିଚିତ ମହଲରେ ଶୋକପ୍ରକାଶ ପାଇଛି।