08-Apr-2025

ପାଟଣାଗଡ(ପ୍ରେରଣା ଖବର): ୨୦୦୪ ମସିହାରେ ପଶ୍ଚିମ ଓଡ଼ିଶା କୌପୀନଧାରୀ ଅଲେଖ ମହିମା ସମାଜର ସଭାପତି ଚମ୍ପେଶ୍ଵର ବାବାଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ପାଟଣାଗଡ଼ର ଚନ୍ଦନଯୁରିଠାରେ ଗଢି ଉଠିଥିବା ମହିମା ଆଶ୍ରମ ପାଖ ଆଖ ଖଣ୍ଡ ମଣ୍ଡଳର ଲୋକମାନଙ୍କୁ ସତ୍ୟ ଚେତନାର ମାର୍ଗ ନିଦର୍ଶନ କରିବା ସହିତ ମହିମା ଧର୍ମାବଳମ୍ବୀ ଭକ୍ତମାନଙ୍କ ପାଇଁ ଏହି ଆଶ୍ମ ଅତ୍ୟନ୍ତ ମନୋରମ ଏବଂ ଶାନ୍ତିରେ ବଞ୍ଚିବାର ରାହା ଯୋଗାଉଛି ବୋଲି ମାନ୍ୟବର ରାଜ୍ୟସଭା ସାଂସଦ ନିରଞ୍ଜନ ବିଶି କହିଛନ୍ତି। ମାନ୍ୟବର ରାଜ୍ୟସଭା ସାଂସଦଙ୍କ ଦ୍ଵାରା ପ୍ରଦତ୍ତ ଚାରି ଲକ୍ଷ ଟଙ୍କା ବିନିମୟରେ ନିର୍ମାଣ ହୋଇଥିବା

ଧ୍ଵନି ମଣ୍ଡପ ଏବଂ ଶୁଭ ଦିଆଯାଇଥିବା ଯାତ୍ରୀ ଓ ଭକ୍ତ ବିଶ୍ରାମ ଗୃହକୁ ଚମ୍ପେଶ୍ଵର ବାବା ମାନ୍ୟବର ରାଜ୍ୟସଭା ସାଂସଦ ଏବଂ ମହିମା ଅଲେଖ ଧର୍ମର ଗବେଷକ ପଣ୍ଡିତ ଦୈତ୍ୟାରି ମହାପାତ୍ରଙ୍କୁ ବୁଲାଇ ଦେଖାଇଥିଲେ। ଏହି ଅବସରରେ ମହିମା ଧର୍ମର ଭକ୍ତ ମାନଙ୍କ ଦ୍ଵାରା ଭଜନ କୀର୍ତ୍ତନ ହେବା ସହିତ ଭାବ ଭକ୍ତି ପୂର୍ଣ୍ଣ ସମାବେଶରେ ଦିବ୍ୟ ଭୋଜନ ପୂର୍ବକ ଚନ୍ଦନ - ବକୁଳ  ଏବଂ ଏକାମ୍ର କାନନର ଘଞ୍ଚ ଅରଣ୍ୟ ମଧ୍ୟରେ ଏକ ଭାବ ପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଚଂପେଶ୍ୱର ବାବାଙ୍କ ସଭାପତିତ୍ବରେ ଆୟୋଜିତ ସଭାରେ ମୁଖ୍ୟ ଅତିଥି ଭାବେ ଯୋଗଦେଇ ମାନ୍ୟବର ରାଜ୍ୟସଭା ସାଂସଦ ଶ୍ରୀଯୁକ୍ତ ନିରଞ୍ଜନ ବିଶି ବର୍ତ୍ତମାନ ସମାଜକୁ ମହିମା ଧର୍ମର ଆବଶ୍ୟକତା ସମ୍ପର୍କରେ ବକ୍ତବ୍ୟ ପ୍ରଦାନ ପୂର୍ବକ ଆଶ୍ରମର ନବୀକରଣ ପାଇଁ ଏମ୍ ପି ଫଣ୍ଡରୁ ଆଉ ଚାରି ଲକ୍ଷ ଟଙ୍କା ଦେବେ ବୋଲି ଘୋଷଣା କରିଥିଲେ। ସନ୍ଥକବି ଭୀମଭୋଇ ଏବଂ ମହିମା ଗୋସେଇଙ୍କ ଉପରେ ଗବେଷଣା କରି ଏକାଧିକ ପୁସ୍ତକ ରଚନା କରିଥିବା ଓଡ଼ିଆ ଭାଷା ସାହିତ୍ୟ ଗବେଷକ ପଣ୍ଡିତ ଦୈତ୍ୟାରି ମହାପାତ୍ର ମୁଖ୍ୟ ବକ୍ତା ଭାବେ ଯୋଗଦେଇ ମହିମା ଧର୍ମର ତତ୍ତ୍ଵ,

ଦର୍ଶନ, ଭକ୍ତି ଓ ସତ୍ୟ ଧର୍ମ ଉପରେ  ବକ୍ତବ୍ୟ ପ୍ରଦାନ କରିବା ସହିତ ମହିମା ଧର୍ମର ପ୍ରବର୍ତ୍ତକଙ୍କ ଜୀବନାଦର୍ଶ ଉପର ଭାବ ଗର୍ଭକ ବକ୍ତବ୍ୟ ପ୍ରଦାନ କରି ଭକ୍ତ ମାନଙ୍କୁ ମୋହିତ କରିଥିଲେ। ଗାଁ ବଞ୍ଚାଅ ଆନ୍ଦୋଳନର ରାଷ୍ଟ୍ରୀୟ ଅଧ୍ୟକ୍ଷ ତୁଳସୀରାମ ଜଗତ ସମ୍ମାନିତ ଅତିଥି ଭାବେ ଯୋଗଦେଇ ମହିମା ଧର୍ମର ବିଶେଷତ୍ଵ ଉପରେ ଆଲୋଚନା କରିଥିଲେ। ଏହି ଅବସରରେ ଉପସ୍ଥିତ ଥିବା ଭକ୍ତମାନଙ୍କ " ଅଲେଖ ମହିମା ନିରଞ୍ଜନ " ଧ୍ବନିରେ ପରିବେଶ ଭାବମୟ ହୋଇ ଉଠିଥିଲା।