07-Apr-2025

ତରଭା- ସୋନପୁର ଜିଲ୍ଲା ତରଭା ବ୍ଲକ ପାଇକବାହାଲ ଗ୍ରାମପଞ୍ଚାୟତର ରାଜପାଲିଠାରେ ଅଞ୍ଚଳର ଅଧିଷ୍ଠାତ୍ରୀଦେବୀ ବାରପାହାଡଙ୍କ ଯାତ୍ରା ଆସନ୍ତା ଚୈତ୍ରମାସ ତୃତୀୟା,ଚତୁର୍ଦ୍ଦଶୀ ଓ ପୂର୍ଣ୍ଣମୀରେ ଅନୁଷ୍ଠିତ ହେବ ।

ଅପ୍ରେଲ ୧୦ ତାରିଖରୁ ଏହା ଆରମ୍ଭ ହୋଇ ୧୨ ତାରିଖ ପୂର୍ଣ୍ଣମୀ ପର୍ଯ୍ୟନ୍ତ ଏହା ଚାଲିବ । ଗଣ୍ଡ ଆଦିବାସୀଙ୍କ ଲିଙ୍ଗୋଦେବତା ଭାବରେ ବାରପାହାଡ ରିଜର୍ଭଜଙ୍ଗଲର ଗୁମ୍ଫାରେ ପୂଜା ପାଉଥିବା ବାରପାହାଡ ଦେବତାଙ୍କୁ ଅଞ୍ଚଳବାସୀ ମିଳିତ ଭାବରେ ପୂଜାକରିଥାନ୍ତି । ପ୍ରତିବର୍ଷ ଚେତପୂର୍ଣ୍ଣମୀ ବେଳକୁୁ ଏଠାରେ ବାରାପାହାଡ ଡଙ୍ଗରର ଗୁମ୍ଫାକୁ ଛତରଯାତ୍ରା ହୋଇଥାଏ । ସେଥିପାଇଁ ଚଳିତବର୍ଷ ଯାତ୍ରାକୁ ଧୂମଧାମରେ ପାଳନ କରିବାକୁ ପ୍ରସ୍ତୁତି ବୈଠକ ସରିଯାଇଛି । ଆସନ୍ତା ୧୦ ତାରିଖରେ ଗଣ୍ଡ ଆଦିବାସୀପୂଜକମାନଙ୍କ ମଖନାମୁଣ୍ଡାର ବାରପାହାଡଗୁଡିରେ ବାରବଇଠା ପୂଜା,୧୧ ତାରିଖରେ ରାଜପାଲି ବାରପାହାଡ ଗୁଡିରୁ ଡଙ୍ଗରକୁ ଛତରଯାତ୍ରା ଓ ୧୨ ତାରିଖରେ ଛତରଗୁଡି ଯାତ୍ରା ହେବ ବୋଲି ବାରପାହାଡପୀଠର ମୁଖ୍ୟପୂଜକ ଜିତେନ୍ଦ୍ର ଝାଙ୍କର ସୂଚନା ଦେଇଛନ୍ତି । ୧୧ ତାରିଖରେ ମେଣ୍ଡା ମଙ୍ଗଳାସରରୁ ଏକ ବିଶାଳ ଶୋଭାଯାତ୍ରାରେ  ବାହାରି ମେଣ୍ଡାଶୁଣୀଦେବୀପୀଠ ଦେଇ

ରାଜପାଲି ବାରପାହାଡପୀଠ ଓ ଏଠାରୁ ବାରାପାହାଡ ଡଙ୍ଗରର ଗୁମ୍ଫା ପର୍ଯ୍ୟନ୍ତ ପହଞ୍ଚିବ । ଏଥିରେ ଆଦିବାସୀ ଶୋଭାଯାତ୍ରା ମୁଖ୍ୟଅକର୍ଷଣ ହେବ ବୋଲି ସୂଚନା ମିଳଛିି । ସେହିପରି ୧୧ ତାରିଖ ରାତିରେ ବାରପାହାଡ ଡଙ୍ଗରର ପାଦଦେଶରେ ରାଜପାଲି/ବ୍ରାହ୍ମଣୀପାଲିଛକରେ ରସମନ୍ଦାର ମହିଳାଦଣ୍ଡନୃତ୍ୟ ଆୟୋଜିତ କରାଯାଇଥିବା ମଧ୍ୟ ସୂଚନା ମିଳିଛି । ପ୍ରକାଶ ଯେ,ବାରପାହାଡ ପୀଠରେ ପ୍ରତିବର୍ଷ ଚୌତ୍ରପୂର୍ଣ୍ଣମୀରେ ହଜାର ହଜାର ସଂଖ୍ୟାରେ ପଶୁପକ୍ଷୀବଳି ଦିଆଯାଇଥାଏ । ସୋନପୁର ଜିଲ୍ଲା ସମେତ ବଲାଙ୍ଗୀର, ବରଗଡ,ବୌଦ୍ଧ ଜିଲ୍ଲାର ମାନସିକଧାରୀମାନେ ଆସି ଏଠାରେ ସାମିଲ ହୋଇଥାନ୍ତି । ଏକ ପ୍ରାକୃତିକ ପରିବେଶ ମଧ୍ୟରେ ଅବସ୍ଥିତ ବାରପାହାଡ ପୀଠକୁ ରାଜ୍ୟସରକାର ଇକୋଟୁରିଜମ ରେ ସାମିଲ ମଧ୍ୟ କରିଛନ୍ତି । ସୋନପୁର ବନବିଭାଗ ଏଠାରେ ବିକାଶକାମ ହାତକୁ ନେଇଛି ।