07-Apr-2025

ବଲାଙ୍ଗୀର(ପ୍ରେରଣା ଖବର) 'ପ୍ରେରଣା ' ଆମ ଅଞ୍ଚଳର ଏକ ସତ୍ୟନିଷ୍ଠ   ଖବର ପରିବେଷଣ କରି ଆସୁଥିବା ନିରପେକ୍ଷ ସମ୍ବାଦପତ୍ର  ଓ  ୱେବ୍ ଚ୍ୟାନେଲ୍ । ଏହା ଦୀର୍ଘ ୨୦ ବର୍ଷ ଧରି ନିରବଚ୍ଛିନ୍ନ ଭାବରେ ସମାଜର ବିଭିନ୍ନ ସମସ୍ୟାର ପ୍ରତିଫଳନ କରି ଆସୁଥିବା ସହିତ ଆମ ଲୋକପ୍ରତିନିଧିଙ୍କ ବି ଦର୍ପଣ ଦେଖାଇ ଆସୁଛି ।  ଏ ଦିଗରେ ଏହାର  ଭୂମିକା ପ୍ରଶଂସନୀୟ।  ଏପରି ଗଣମାଧ୍ୟମ ଗୁଡିକ ରାଜ୍ୟର ଆଞ୍ଚଳିକ ବୈଷମ୍ଯ ଦୂର କରିବାକୁ ଗଠିତ ପଶ୍ଚିମଓଡିଶା ବିକାଶ ପରିଷଦର ଏଯାବତ୍ ପ୍ରକୃତ ଉଦ୍ଦେଶ୍ୟସାଧନ ହୋଇପାରି ନଥିବା ଇତ୍ୟାଦି ସମସ୍ୟାର ଓପିନିଅନ୍ ବିଲଡିଂ କରିବା ଦିଗରେ କାମ କରିବା ଉଚିତ୍ ବୋଲି ଏହାର ବିଂଶତମ ବାର୍ଷିକୋତ୍ସବରେ ଯୋଗଦେଇଥିବା ଅତିଥିମାନେ ମତବ୍ଯକ୍ତ କରିଛନ୍ତି ।

ଗତକାଲି ସ୍ଥାନୀୟ ଗାନ୍ଧୀଭବନ ପରିସରରେ ଅନୁଷ୍ଠିତ ବଲାଙ୍ଗୀରରୁ ପ୍ରକାଶ ପାଉଥିବା ଆଞ୍ଚଳିକ ସାପ୍ତାହିକ ସମ୍ବାଦପତ୍ର ' ପ୍ରେରଣା'ର ୨୦ତମ ବାର୍ଷିକୋତ୍ସବ ମହାସମାରୋହରେ ପାଳିତ ହୋଇଥିଲା । ସ୍କୁଲ ଓ କଲେଜ ଛାତ୍ରଛାତ୍ରୀ ଙ୍କୁ ପୁରସ୍କାର ବିତରଣ, କବିତା ପାଠୋତ୍ସବ, ସାଧାରଣ ସଭା , ସ୍ମରଣିକା ଉନ୍ମୋଚନ , ସମ୍ବର୍ଦ୍ଧନା ପ୍ରଦାନ ଇତ୍ୟାଦି ଅନୁଷ୍ଠିତ ହୋଇଥିଲା ।

ସନ୍ଧ୍ୟାରେ ସାହିତ୍ୟିକ  ମଳୟ ମିଶ୍ରଙ୍କ ସଭାପତିତ୍ବରେ ଅନୁଷ୍ଠିତ କବିତା ପାଠୋତ୍ସବରେ କବି ରତ୍ନମୟ ତ୍ରିପାଠୀ ଓ କବୟତ୍ରୀ ଶ୍ରୀମତୀ ଚୁମକୀ ଦାଶଙ୍କ ସଂଯୋଜନାରେ ବଲାଙ୍ଗୀର,  ସୁବର୍ଣ୍ଣପୁର, ରାଉରକେଲା ଇତ୍ୟାଦି ଅଞ୍ଚଳରୁ ଆସିଥିବା କବି/ କବୟତ୍ରୀମାନେ ସ୍ବରଚିତ କବିତାମାନ ପାଠ କରିଥିଲେ । ଏହାପରେ ଅନୁଷ୍ଠାନର ଉପଦେଷ୍ଟା  ଶିକ୍ଷାବିତ୍ ମନୋରଞ୍ଜନ ସାହୁଙ୍କ ସଭାପତିତ୍ବରେ ଅନୁଷ୍ଠିତ ମୁଖ୍ଯସଭାରେ ମୁଖ୍ଯଅତିଥି ଭାବରେ ବଲାଙ୍ଗୀର ରାଜ୍ୟସଭା ସାଂସଦ ନିରଞ୍ଜନ ବିଶି , ସମ୍ମାନିତ ଅତିଥି ଭାବରେ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂହଦେଓ, ମୁଖ୍ଯବକ୍ତା  ଭାବରେ ଢେଙ୍କାନାଳ ସ୍ଥିତ ଏ ଆଇ ଏମ୍ ସି ର ଆଞ୍ଚଳିକ ନିର୍ଦ୍ଦେଶକ ଡ ମୃଣାଳ ଚାଟାର୍ଜୀ  , ସମ୍ମାନିତା ଅତିଥି ଭାବରେ ବଲାଙ୍ଗୀର ପୌରାଧ୍ୟକ୍ଷା ଶ୍ରୀମତୀ ଲିକା ସାହୁ ଓ ଅନ୍ୟତମ ସମ୍ମାନିତ ବକ୍ତା ଭାବରେ ବହୁ ପୁସ୍ତକର ରଚୟିତା ପଣ୍ଡିତ  ଦୈତ୍ଯାରୀ ମହାପାତ୍ର ପ୍ରମୁଖ ବକ୍ତବ୍ଯ ପ୍ରଦାନ କରିଥିଲେ ।  ମୁଖ୍ଯ ବକ୍ତା ସାହିତ୍ୟ ଓ ସାମ୍ବାଦିକତା ଉପରେ ଆଲୋକପାତ ପୂର୍ବକ ସମ୍ବାଦପତ୍ରରୁ ଆଧୁନିକ ୱେବ୍ ପୋର୍ଟାଲ କୁ ଉନ୍ନୀତ ହୋଇ ଦୀର୍ଘ ୨୦ ବର୍ଷ କାଳ ପ୍ରକାଶ ପାଉଥିବାର ନିଷ୍ଠା ଓ ପରାକାଷ୍ଠାର ନିରବଚ୍ଛିନ୍ନ ଉଦ୍ୟମକୁ ଉଲ୍ଲେଖ କରି ପ୍ରକୃତ ସାମ୍ବାଦିକତାର ଭୂମିକା ସମ୍ପର୍କରେ ପରାମର୍ଶ ଦେଇଥିଲେ ।  ମୁଖ୍ଯ ଅତିଥି ମଧ୍ଯ ' ପ୍ରେରଣା 'ର ଏହି ଐକାନ୍ତିକ ଉଦ୍ୟମକୁ ପ୍ରଶଂସା କରି ଏହା 

ସକାରାତ୍ମକ ସମ୍ବାଦ ପରିବେଷଣ କରୁଥିବା କହିଥିବା ସହ ଏହାର ସ୍ମରଣିକାର ପ୍ରକାଶିତ ଆଲେଖ୍ଯ ପଢି ତାଙ୍କୁ ପ୍ରଭାବିତ କରିଥିବା ପ୍ରକାଶ କରିଥିଲେ । ସମ୍ମାନିତା ଅତିଥି ଶ୍ରୀମତୀ ସାହୁ ପତ୍ରିକା ପ୍ରତି ତାଙ୍କର ସମର୍ଥନ ରହିଆସିଥିବା ପ୍ରକାଶ କରି ଥିଲେ । ବିଧାୟକ ଶ୍ରୀ ସିଂହଦେଓ ସମ୍ବାଦପତ୍ରଟିର  ଆଭିମୁଖ୍ଯ ପ୍ରତି ତାଙ୍କର ସପକ୍ଷ ଥିବା ସହ ଆଞ୍ଚଳିକ ବୈଷମ୍ଯର ଦୂରୀକରଣ ଦିଗରେ ପଶ୍ଚିମଓଡିଶା ବିକାଶ ପରିଷଦର ଉଦ୍ଦେଶ୍ଯ ଓ ଅନ୍ଯାନ୍ଯ ସମସ୍ୟାର ସମାଧାନ ନିମନ୍ତେ ଜନମତ ଗଠନର ଭୂମିକା ସମ୍ପର୍କରେ କହିଥିବା ବେଳେ ପଣ୍ଡିତ ମହାପାତ୍ର ସାହିତ୍ୟ, ସମ୍ବାଦପତ୍ର ଓ ସମ୍ପାଦକଙ୍କ  ଦାୟିତ୍ବ ପାଇଁ ଉଦବୋଧନ ଦେଇଥିଲେ । 

 ବିଭିନ୍ନ କ୍ଷେତ୍ରରେ ଉତ୍କର୍ଷ  ପ୍ରତିପାଦନ କରିଥିବା ବିଭିନ୍ନ ଅଞ୍ଚଳର   ବ୍ୟକ୍ତିବିଶେଷଙ୍କୁ ମାନପତ୍ର ଦିଆଯାଇ ସମ୍ବର୍ଦ୍ଧିତ ଜଣାଯାଇଥିଲା l ସାମ୍ବାଦିକ ଅଞ୍ଜନ ପ୍ରଧାନ,ସାମାଜିକ କର୍ମୀ ହୀରାଲାଲ ମିଶ୍ର,  କବି ଓ ସାହିତ୍ୟିକ ଡ. ସଞ୍ଜୟ ମିଶ୍ର, ଅଧ୍ୟାପକ କବିରାଜ ଭୋଇ, ବରିଷ୍ଠ କବି ବଂଶୀଧର କର୍ମୀ,  ଅବସରପ୍ରାପ୍ତ ପୋଲିସ ଅଧିକାରୀ ହେମସାଗର  ନନ୍ଦ, ମଡେଲ ତଥା ଡ୍ୟାନ୍ସର  ପ୍ରାଚୀ ପାଣିଗ୍ରାହୀ,ସୀମରନ୍ ସାହୁ,  ଡୁଡୁକା ସରପଞ୍ଚ ଅଶୋକ ପଟେଲ ଓ ବୁଢ଼ୀପଦର ସରପଞ୍ଚ ଲକ୍ଷ୍ମୀ ପ୍ରଧାନ  ଙ୍କୁ ପ୍ରେରଣା ତରଫରୁ ମାନପତ୍ର ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରାଯାଇଥିଲା l ବିଭିନ୍ନ ପ୍ରତିଯୋଗିତାର କୃତୀ ଛାତ୍ରଛାତ୍ରୀଙ୍କୁ ଟ୍ରଫି ପ୍ରଦାନ କରାଯାଇ ପୁରସ୍କୃତ କରାଯାଇଥିଲା । ଏଇ ଅବସରରେ ପ୍ରେରଣାର ବିଂଶତମ ବାର୍ଷିକ ବିଶେଷାଙ୍କ ଉନ୍ମୋଚିତ ହୋଇଥିଲା ।  ସମ୍ପାଦକ ରଘୁନନ୍ଦନ ସିଂ  ସମ୍ପାଦକୀୟ ବିବରଣୀ ପାଠ  କରିଥିଲେ। କବି  ଓ ଅଧ୍ୟାପକ ସନ୍ଦୀପ କୁଅଁର ଧନ୍ୟବାଦ ଦେଇଥିଲେ । ଏହି ଉତ୍ସବରେ ଶତାଧିକ ସାମ୍ବାଦିକ,  କବି ଲେଖକ, ବିଶିଷ୍ଟ ନାଗରିକ, ବୁଦ୍ଧିଜିବୀ ଓ ଛାତ୍ରଛାତ୍ରୀଙ୍କ ସମାବେଶ ହୋଇଥିଲା ।