01-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ଭଟଲି ବ୍ଲକ ଗୌଡ଼ପାଲି ଠାରେ ଚବିଶ ପ୍ରହରୀ ନାମ ଯଜ୍ଞ ଶନିବାର ଉଦଯାପିତ ହୋଇ ଯାଇଛି ।ଗ୍ରାମବାସୀଙ୍କ ଦ୍ଵାରା ଆୟୋଜିତ ଏହି ନାମ ଯଜ୍ଞରେ ସମ୍ବଲପୁର ଜିଲ୍ଲା ଅନ୍ତର୍ଗତ ଧନକଉଡା,ବରଗଡ଼ ବ୍ଲକ ନୁନିଆ ଜାମପାଲି ,ଅତାବିରା ବ୍ଲକ ଲହଣ୍ଡା ଗ୍ରାମର ଉଦଣ୍ଡ ସଙ୍କୀର୍ତ୍ତନ ମଣ୍ଡଳୀ ଯୋଗ ଦେଇ ନଗର ସଙ୍କୀର୍ତ୍ତନ୍ୟ ପରିବେଷଣ କରିଥିଲେ। ତେବେ ଭାବ ଭକ୍ତିର ଉଦଣ୍ଡ ସଙ୍କୀର୍ତ୍ତନ୍ୟ ଦେଖିବା ପାଇଁ ଆଖ ପାଖ ଅଞ୍ଚଳର ପ୍ରବଳ ଜନ ସମାଗମ ପରିଲକ୍ଷିତ ହୋଇଥିଲା ।
ଗତ ବୁଧବାର ଦିନ ନାମ ଯଜ୍ଞ ଆରମ୍ଭ ହୋଇ ଶନିବାର ଉଦଯାପିତ ହୋଇ ଥିବା ବେଳେ ଏହି ଅବସରରେ ସଙ୍କୀର୍ତ୍ତନ ଗୁରୁ ପ୍ରମୋଦ ଦାଶ ସୁଶିଲ ଦାଶଙ୍କ ପ୍ରତ୍ୟକ୍ଷ ତତ୍ବାବଧାନରେ ଉଦଣ୍ଡ ସଙ୍କୀର୍ତ୍ତନ କଳାକାରଙ୍କ ଏକ ସମାବେଶ ମଧ୍ୟ ଅନୁଷ୍ଟିତ ହୋଇଥିଲା ।ଯଜ୍ଞର କର୍ତ୍ତା ଭାବେ ରାଜେନ୍ଦ୍ର ଦାଶ ଓ ତାଙ୍କ ଧର୍ମପତ୍ନୀ ନପୂର୍ ଦାଶ ଦାୟିତ୍ବ ବହନ କରିଥିଲେ । ତେବେ ସାଂପ୍ରତିକ ଅପସଂସ୍କୃତି ସମ୍ପନ୍ନ ସଙ୍କୀର୍ତ୍ତନ୍ୟର ବହୁଳ ପ୍ରଚାର ସତ୍ତ୍ବେ ଗ୍ରାମବାସୀଙ୍କ  ମିଳିତ ଉଦ୍ୟମରେ ଦୀର୍ଘ ସାତ ଦଶନ୍ଧିରୁ ଉର୍ଦ୍ଧ୍ବ ସମୟ ଧରି ଭାବଭକ୍ତିର ଉଦଣ୍ଡ ସଙ୍କୀର୍ତ୍ତନ ପରମ୍ପରାକୁ ବଞ୍ଚାଇ ଆସୁଥିବାରୁ  ଜିଲ୍ଲା ସଙ୍କୀର୍ତ୍ତନ୍ୟ ପରିଷଦ ସମେତ ଅଗଣିତ ସଙ୍କୀର୍ତ୍ତନ୍ୟ ପ୍ରେମୀ  ଗୌଡପାଲି ଗ୍ରାମବାସୀ ଙ୍କ ଏଭଳି ଉଦ୍ୟମକୁ ଭୂୟସୀ ପ୍ରଶଂସା କରିଛନ୍ତି ।ଏହି ଅବସରରେ ବରଗଡ଼ ଜିଲ୍ଲା  ସଙ୍କୀର୍ତ୍ତନ୍ୟ ସମନ୍ବୟ ପରିଷଦର ଆବାହକ ତଥା ପଶ୍ଚିମ ଓଡ଼ିଶା କଳାକାର ମହାସଂଘ ସଂପାଦକ ଗୋପବନ୍ଧୁ ପୁରୋହିତ ଏହି କାର୍ଯ୍ୟକ୍ରମରେ ଯୋଗ ଦେଇ ସଙ୍କୀର୍ତ୍ତନ୍ୟ ସଂସ୍କୃତିକୁ ବଞ୍ଚାଇ ରଖିଥିବା ଗ୍ରାମବାସୀ ଓ ଯୋଗ ଦେଇ ସଙ୍କୀର୍ତ୍ତନ୍ୟ ପରିବେଷଣ କରିଥିବା ସମସ୍ତ ସଙ୍କୀର୍ତ୍ତନ କଳାକାରଙ୍କୁ ଭୂୟସୀ ପ୍ରଶଂସା କରିଥିଲେ ।ଏହି ଅବସର ରେ ଜିଲ୍ଲା ସଙ୍କୀର୍ତ୍ତନ୍ୟ ପରିଷଦର କାର୍ଯ୍ୟକାରୀ ସଭାପତି ପ୍ରମୋଦ ଦାଶ ଉପସ୍ଥିତ ରହି  ଆଗାମୀ ଦିନରେ ଜିଲ୍ଲା ସଙ୍କୀର୍ତ୍ତନ ପରିଷଦ ଆନୁକୁଲ୍ୟରେ  ଭୁବନେଶ୍ୱର ଠାରେ ଆୟୋଜିତ ହେବାକୁ ଥିବା ରାଜ୍ୟ ସ୍ତରୀୟ ସଙ୍କୀର୍ତ୍ତନ୍ୟ ସମ୍ମିଳନୀ ରେ ଅଶ୍ଲୀଳ ଓ ଦୁଇ ଅର୍ଥ ବୋଧକ ସଙ୍କୀର୍ତ୍ତନ୍ୟକୁ ବିରୋଧ କରାଯିବାର କାର୍ଯ୍ୟକ୍ରମ ରହିଥିବା ସୂଚନା ପ୍ରଦାନ କରିଥିଲେ ।