28-Feb-2025

ବଲାଙ୍ଗୀର- ପୁଇଁତଳା ବ୍ଲକ ଅନ୍ତର୍ଗତ ବିଲେଇସର୍ଡା ସ୍ଥିତ ଜବାହାରଲାଲ ସରକାରୀ ହାଇସ୍କୁଲରେ ଜାତୀୟ ବିଜ୍ଞାନ ଦିବସ ପାଳିତ ହୋଇଯାଇଛି। ପ୍ରଧାନ ଶିକ୍ଷକ ସ୍ବାଧିନ ସାହୁ ନିଜ ସଭାପତିତ୍ବ ଅଭିଭାଷଣରେ  ପ୍ରତିବର୍ଷ ଜାତୀୟ ବିଜ୍ଞାନ ଦିବସ ପାଳନ ହେଉଥିବା ଯୋଗୁଁ ସାଧାରଣ ଲୋକଙ୍କ ମଧ୍ଯରେ ବିଜ୍ଞାନ ଏବଂ ବୈଜ୍ଞାନିକ ଚିନ୍ତାଧାରାକୁ ପ୍ରୋତ୍ସାହିତ କରୁଛି ବୋଲି କହିଥିଲେ। ବରିଷ୍ଠ ବିଜ୍ଞାନ ଶିକ୍ଷକ ସୁଧାଂଶୁ ଶେଖର ପ୍ରଧାନ ନିଜ ବକ୍ତବ୍ଯରେ ଦେଶରେ ବିଜ୍ଞାନର ପ୍ରଚାର  ଓ ପ୍ରସାର କରି ଲୋକଙ୍କ ମନରୁ ଅନ୍ଧବିଶ୍ବାସ ତଥା କୁସଂସ୍କାର ଦୂର କରିବା ସହ ଛାତ୍ର ଛାତ୍ରୀମାନଙ୍କୁ ବିଜ୍ଞାନ ବିଷୟ ପ୍ରତି ଆକୃଷ୍ଟ କରିବା ଏହି ଦିବସ ପାଳନର ଲକ୍ଷ୍ଯ ବୋଲି କହିଥିଲେ। ବିଜ୍ଞାନ ଶିକ୍ଷକ ପଂକଜ ମେହେର ଚଳିତ ବର୍ଷ ବିଜ୍ଞାନ ଦିବସର ବିଷୟ ବସ୍ତୁ "ବିକଶିତ ଭାରତ ନିମନ୍ତେ ବିଜ୍ଞାନ ଓ ନୂତନ ଉଦ୍ଭାବନ ଦ୍ବାରା ବିଶ୍ବ ନେତୃତ୍ବ ପାଇଁ ଯୁବ ସମାଜକୁ ସଶକ୍ତ କରିବା" ସଂପର୍କରେ କହିବା ସହ ସାର୍ ସି.ଭି.ରମଣଙ୍କର ଆବିଷ୍କାର 'ରମଣ ପ୍ରଭାବ' ଭାରତୀୟ ବିଜ୍ଞାନ ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲ ଖୁଣ୍ଟ ହେବା ସହ ଭାରତକୁ ବିଶ୍ବ ବୈଜ୍ଞାନିକ ମାନଚିତ୍ରରେ ସ୍ଥାନୀତ କରିପାରିଛି ବୋଲି କହିଥିଲେ। ବିଜ୍ଞାନ ଶିକ୍ଷୟିତ୍ରୀ ପ୍ରତୀଷା ମିଶ୍ର ନିଜ ବକ୍ତବ୍ଯରେ ଆମ ଦେଶର ବିକାଶରେ ବୈଜ୍ଞାନିକ ମାନଙ୍କ ଅବଦାନକୁ ପ୍ରଶଂସା କରିବା ସହ ସମସ୍ତଙ୍କ ମନରେ ବିଜ୍ଞାନ ପ୍ରତି ରୁଚି ଓ ଅନୁରାଗ ସୃଷ୍ଟି କରିବା ହିଁ ଏହି ଦିବସ ପାଳନର ଉଦ୍ଦେଶ୍ଯ ବୋଲି କହିଥିଲେ। ଏହି ଅବସରରେ 'ବିଜ୍ଞାନ ବନାମ

ଅନ୍ଧବିଶ୍ବାସ' ବିଷୟ ଉପରେ ଆୟୋଜିତ ବକ୍ତୃତା ପ୍ରତିଯୋଗିତା ରେ କପିଳାସ ସାହୁ ପ୍ରଥମ,ବିଜ୍ଞାତା ଭରାସାଗର ଦ୍ବିତୀୟ ଓ ଆଦ୍ଯାଶା ପାଣିଗ୍ରାହୀ ତୃତୀୟ ସ୍ଥାନ ଅଧିକାର କରି ପୁରସ୍କୃତ ହୋଇଥିଲେ। ସେହିପରି ବିଜ୍ଞାନ ସେମିନାରରେ ପ୍ରଜ୍ଞାମୟୀ କଲତା,ପ୍ରତୀକ ଭୋଇ ପୁରସ୍କୃତ ହୋଇଥିଲେ। ଗଣିତ ସେମିନାର, ବିଜ୍ଞାନ ଓ ଗଣିତ କୁଇଜ,ଗଣିତ ଦୌଡ  ପ୍ରତିଯୋଗିତା ଆୟୋଜନ କରାଯାଇ କୃତୀ ପ୍ରତିଯୋଗୀ ମାନଙ୍କୁ ପୁରସ୍କୃତ କରାଯାଇଥିଲା । କାର୍ଯ୍ଯକ୍ରମରେ ବିଦ୍ୟାଳୟର ଶିକ୍ଷକ ପ୍ରଦୀପ ଦଣ୍ଡସେନା,କାହ୍ନୁଚରଣ ଧରୁଆ,ସଂଜୀବ କୁମାର ମିଶ୍ର, ସୁଜିତ ଦେହୁରୀ,ମୁରାରି ମୋହନ ପର୍ଡିଆ,ସୁଷମା ମେହେର,ରଶ୍ମିତା ବିଶ୍ବାଳ, ପ୍ରଜ୍ଞା ପରମିତା ଖୁଆସ ପ୍ରମୁଖ ମଂଚାସୀନ ଥିଲେ। ଶିକ୍ଷକ ରଞ୍ଜିତ ମିଶ୍ର ଧନ୍ୟବାଦ ଦେଇଥିଲେ।