25-Feb-2025

ବରୀ ବ୍ଲକ ବାଲିବିଲି ସ୍ଥିତ ବାଲୁଙ୍କେଶ୍ୱର ମହାଦେବ ପୀଠରେ ପଞ୍ଚଦଶ ବାର୍ଷିକ ବିଶ୍ୱଶାନ୍ତି ମହାଯଜ୍ଞ ଆୟୋଜିତ ହେଉଛି । ୨୩ ତାରିଖରୁ ଆରମ୍ଭ ହୋଇଥିବା ଏହି ମହାଯଜ୍ଞର ଆସନ୍ତା ୨୫ ତାରିଖ ଦିନ ପୂର୍ଣ୍ଣାହୁତି ହେବ। ଗତକାଲି ଗ୍ରାମର ୧୩୨ ଜଣ ମହିଳା ନିକଟସ୍ଥ ବ୍ରାହ୍ମଣୀ ନଦୀରୁ ଜଳ ଆଣି ଏକ କଳସ ଶୋଭାଯାତ୍ରାରେ ବାଲିବିଲି ଓ ଅଲିପୁର ଗ୍ରାମ ପରିକ୍ରମା କରି ଯଜ୍ଞ ମଣ୍ଡପରେ ସ୍ଥାପନ କରିଥିଲେ । ଯଜ୍ଞରେ କର୍ତ୍ତା ଭାବେ ଡାକ୍ତର ଅରୁଣ କୁମାର ପତି ଦାୟିତ୍ୱ ନିର୍ବାହ କରୁଥିଲା ବେଳେ  ପଣ୍ଡିତ ବାବାଜି ଚରଣ ମିଶ୍ରଙ୍କ ତତ୍ୱାବିଧାନରେ ୧୧ ଜଣ ପଣ୍ଡିତ ଯଜ୍ଞ କାର୍ଯ୍ୟ ସମ୍ପାଦନ କରୁଛନ୍ତି । ପଣ୍ଡିତଙ୍କ ମନ୍ତ୍ର ଉଚ୍ଚାରଣରେ ଗ୍ରାମରେ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି। ଦୈନିକ ସ୍ଥାନୀୟ ଅଞ୍ଚଳରୁ ଶତାଧିକ ଶ୍ରଦ୍ଧାଳୁ ମନ୍ଦିରରେ ମହାଦେବ ଦର୍ଶନ କରିବା ସହିତ ଯଜ୍ଞ ମଣ୍ଡପରେ ପହଞ୍ଚି ଆଶିଷ କାମନା କରୁଛନ୍ତି । ମଧ୍ୟାହ୍ନରେ ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହୋଇଛି । ପଣ୍ଡିତ ଗୋକୁଳାନନ୍ଦ ପତି, ବୈକୁଣ୍ଠ ନାଥ ସାମଲ, ଅବସର ପ୍ରାପ୍ତ ଶିକ୍ଷା ଅଧିକାରୀ ଶୁରେଶ ଚନ୍ଦ୍ର ସାମଲ, ବନୋଜ କୁମାର ସାମଲ, କାଶୀନାଥ ସାମଲ, ରାମଚନ୍ଦ୍ର ଦାସ, ଅକ୍ରୁର ଚରଣ ସାମଲଙ୍କ ନେତୃତ୍ବରେ ଗ୍ରାମବାସୀମାନେ ଯଜ୍ଞ କାର୍ଯ୍ୟକ୍ରମକୁ ପରିଚାଳନା କରୁଛନ୍ତି ।

(ରଞ୍ଜିତ ମହାନ୍ତିଙ୍କ ରିପୋର୍ଟ)