30-Jan-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ଼ ଜିଲ୍ଲା ରାଜବୋଡାସମ୍ବର ବ୍ଲକ ଶିକ୍ଷା କାର୍ଯ୍ୟାଳୟ ଅଧୀନରେ ଥିବା ବାଦିମାଲ କ୍ଲଷ୍ଟରର ନିପୁଣ ଓଡ଼ିଶା ମେଳା ଖଲିଆପାଲି ସେବାଶ୍ରମ ବିଦ୍ୟାଳୟରେ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ଶ୍ରୀଯୁକ୍ତ ଦେବାନନ୍ଦ ତୁରିଆଙ୍କ ସଂଯୋଜନାରେ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ଖଲିଆପାଲି ଗ୍ରାମ ପଞ୍ଚାୟତର ସରପଞ୍ଚ ଶ୍ରୀମତୀ ଗୀତାଞ୍ଜଳି ପୁଟେଲ, ସମ୍ମାନିତ ଅତିଥି ଅତିରିକ୍ତ ବ୍ଲକ ଶିକ୍ଷା ଅଧିକାରୀ ଶ୍ରୀଯୁକ୍ତ ରାମ ସିଂ ଭୋଇ ଏବଂ ସମାଜସେବୀ ଶ୍ରୀଯୁକ୍ତ ଦୁଷ୍ମନ୍ତ ପଟେଲ , ଖଲିଆପାଲି ସେବାଶ୍ରମର ପ୍ରଧାନ ସେବିକା ଶ୍ରୀମତୀ ତପସ୍ୱିନୀ ସା ଯୋଗଦେଇ ମେଳାକୁ ଉଦଘାଟନ କରିଥିଲେ। ଶିକ୍ଷକ ମନୋଜ କୁମାର ପଣ୍ଡା କୁନି କୁନି ଛାତ୍ରଛାତ୍ରୀମାନଙ୍କୁ ନିପୁଣ ମେଳା ବିଷୟରେ ସମ୍ୟକ ଧାରଣା ଦେଇଥିଲେ। ମୌଳିକ ସାକ୍ଷରତା ଓ ସଂଖ୍ୟା ଜ୍ଞାନ ସହିତ ସୃଜନାତ୍ମକ କାର୍ଯ୍ୟ ଉପରେ ଷ୍ଟଲ୍ ମାନ ପ୍ରଦର୍ଶନ ହୋଇଥିଲା।ବାଦିମାଲ କ୍ଲଷ୍ଟରର ୧୦୦ ଜଣ ଛାତ୍ରଛାତ୍ରୀ ଏବଂ ୯୭ ଜଣ ଅଭିଭାବକ ଯୋଗ ଦେଇଥିଲେ। ସମସ୍ତ ଛାତ୍ରଛାତ୍ରୀଙ୍କୁ ପ୍ରମାଣପତ୍ର ଓ ପୁରସ୍କାର ଦିଆଯାଇଥିଲା। ଶେଷରେ ପ୍ରଧାନ ଶିକ୍ଷକ ଶ୍ରୀଯୁକ୍ତ ଚିତ୍ତରଞ୍ଜନ ବିଶି ଧନ୍ୟବାଦ ଅର୍ପଣ କରିଥିଲେ।ଏହି ମେଳାରେ ଯୋଗଦାନ କରିଥିବା ସମସ୍ତ ଶିକ୍ଷକ ଶିକ୍ଷୟିତ୍ରୀ ସହଯୋଗ କରିଥିଲେ।