18-Jan-2025

ବଲାଙ୍ଗିର (ପ୍ରେରଣା ଖବର): ଆସନ୍ତା ଜାନୁୟାରୀ ୨୦ ରୁ ୨୩ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଯାଉଥିବା ଦ୍ଵାବିଂଶତମ ବଲାଙ୍ଗୀର ଲୋକ ଉତ୍ସବ ଆୟୋଜନ ହେବାକୁ ଯାଉଥିବା ଅବସରରେ ଆଜି ବଲାଙ୍ଗିର ଜିଲ୍ଲାପାଳ  ତଥା ଲୋକ ଉତ୍ସବ ସମିତିର ଅଧ୍ୟକ୍ଷ ଗୌରବ ଶିୱାଜୀ ଇଶଲୱାର୍ ଙ୍କ  ପୌରହିତ୍ୟରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା l ସ୍ଥାନୀୟ କୋଶଳ କଳା ମଣ୍ଡଳ ପଡିଆ ଠାରେ ଆୟୋଜିତ ହେବାକୁ ଥିବା ୨୨ତମ ଲୋକ ଉତ୍ସବ  ନିମନ୍ତେ ଜାନୁୟାରୀ ୨୦ ପୁର୍ବାହ୍ନ ୯ ଟା ସମୟରେ ମଞ୍ଚ ପୂଜା,ପତାକା ଉତ୍ତୋଳନ ଓ ସାଂସ୍କୃତିକ ଶୋଭାଯାତ୍ରା ଆରମ୍ଭ ହେବ l ଅପରାହ୍ନ ୨ଟା ସମୟରେ କବିତା ଓ ମିନି ଗଳ୍ପ ପାଠୋତ୍ସବ (ପୁରୁଣା ମଞ୍ଚ) ଅନୁଷ୍ଠିତ ହେବ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି l ଏହାପରେ ସନ୍ଧ୍ୟା ୬ ଟା ସମୟରେ ଉଦଘାଟନୀ ସଭା ଓ ସନ୍ଧ୍ଯା ୭ଟା ସମୟରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହେବ l ଲୋକ ଉତ୍ସବକୁ ସରସ ସୁନ୍ଦର କରିବା ପାଇଁ ଏଥର ବିଭିନ୍ନ ଜିଲ୍ଲାର ସଂସ୍କୃତି ପରିଷଦର କଳାକାର ମାନଙ୍କ ଦ୍ଵାରା ପ୍ରଚେଷ୍ଟା କରାଯିବ ବୋଲି ଜିଲ୍ଲାପାଳ କହିଛନ୍ତି l ବଲାଙ୍ଗିର ଲୋକ ଉତ୍ସବର ପ୍ରଦର୍ଶନୀ ଓ ରାଜ୍ୟସ୍ତରୀୟ ପଲ୍ଲୀଶ୍ରୀ ମେଳାରେ ବରେଣ୍ୟ ଅତିଥି ମାନେ ମଞ୍ଚର ଶୋଭାବର୍ଦ୍ଧନ କରିବେ ବୋଲି ଜିଲ୍ଲା ପ୍ରଶାସନ ପକ୍ଷରୁ ଅନୁଷ୍ଠିତ ଆଜିର ପ୍ରେସ୍ ମିଟ୍ ରେ ସୂଚନା ଦିଆଯାଇଛି l ରାଜ୍ୟ ତଥା ରାଜ୍ୟ ବାହାରର ବହୁ ଅନୁଷ୍ଠାନ ନିଜର ଲୋକ ଗୀତ ଓ ଲୋକନୃତ୍ୟ ପରିବେଷଣ କରିବାର କାର୍ଯ୍ୟକ୍ରମ ରହିଥିବା ବେଳେ ୨୧ ତାରିଖ ସକlଳ ୧୦ ଟା ରେ ଟାଉନ୍ ବାଳିକା ଉଚ୍ଚବିଦ୍ୟାଳୟ ରେ ସମ୍ପାନ କାର୍ଯ୍ୟକ୍ରମ  ଓ ୨୩ ତାରିଖ ଦିନ

୧୦ ଟା ସମୟରେ ଜିଲ୍ଲାସ୍ତରୀୟ ଲୋକ ନୃତ୍ୟ ଓ ଲୋକସଙ୍ଗୀତ କାର୍ଯ୍ୟକ୍ରମ ଦେଖଣାହାରୀଙ୍କ ମନ ମୋହିବ l ଆଜିର ସାମ୍ବାଦିକ ସମ୍ମିଳନୀରେ ଜିଲ୍ଲାପାଳ ଗୌରବ ଶିୱାଜୀ ଇଶଲୱାର୍ ଙ୍କ  ସମେତ ଅତିରିକ୍ତ ଜିଲ୍ଲାପାଳ ବିଜୟାନନ୍ଦ ସେଠୀ, ଜିଲ୍ଲା ସଂସ୍କୃତି ଅଧିକାରୀ ରଶ୍ମୀ ରଞ୍ଜନ ମିଶ୍ର ପ୍ରମୁଖ ଉପସ୍ଥିତ ଥିଲେ l ଏହି ସମସ୍ତ କାର୍ଯ୍ୟକ୍ରମରେ ଜନସାଧାରଣ ବହୁ ସଂଖ୍ୟାରେ ଯୋଗ ଦେବାକୁ ଜିଲ୍ଲା ପ୍ରଶାସନ ପକ୍ଷରୁ ଅନୁରୋଧ କରାଯାଇଛି l