17-Jan-2025

କଟକ/ମଙ୍ଗରାଜପୁର(ପ୍ରେରଣା ଖବର): ସ୍ଥାନୀୟ ଅମୃତାଳୟ ଜରାନିବାସ ପରିସରରେ "ବାର୍ଦ୍ଧକ୍ୟଜନିତ ସମସ୍ୟା ଓ ତାହାର ସମାଧାନ" ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ପୂର୍ବତନ ବିଧାୟକ ଶ୍ରୀଯୁକ୍ତ ଧର୍ମାନନ୍ଦ ବେହେରାଙ୍କ ପୌରହିତ୍ୟରେ ଅନୁଷ୍ଠିତ ଆଲୋଚନାଚକ୍ରରେ ମୁଖ୍ୟବକ୍ତା ଭାବରେ ଡାକ୍ତର ପ୍ରସନ୍ନ କୁମାର ରାଠୋର ଯୋଗଦେଇ ଜରାଜନିତ ବିଭିନ୍ନ  ରୋଗ ଓ ତାହାର ଉପଚାର ସଂପର୍କରେ ଆଲୋକପାତ କରିଥିଲେ । ସମ୍ମାନୀତ ଅତିଥିରୂପେ ଶୈଳବାଳା ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷା ପ୍ରଫେସର ସୁରେକ୍ଷା ସୁନ୍ଦରୀ ସ୍ବାଇଁ ଯୋଗଦେଇ ବୃଦ୍ଧାବସ୍ଥାରେ ଦେଖାଦେଉଥିବା  ବିଭିନ୍ନ ମାନସିକ ଓ ସାମାଜିକ ସମସ୍ୟା ଏବଂ ଯୋଗ ଓ ପ୍ରାଣାୟମଦ୍ବାରା ଏହାର ସମାଧାନ ସଂପର୍କରେ ପରାମର୍ଶ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଶ୍ରୀଦିବ୍ୟଜ୍ୟୋତି ସିଂଦେଓ, ରବିନ୍ଦ୍ର କୁମାର ନାଏକ, ସ୍ଥାନୀୟ ସରପଂଚ ଦେବେନ୍ଦ୍ର କୁମାର ପାଣ୍ଡବ, ବାସୁଦେବ ବରାଳ, ଶଂକରପୁର ସରପଂଚ ବିନୋଦିନୀ ଖଟୁଆ, ଅଧ୍ୟାପିକା ଡକ୍ଟର ଅବନ୍ତିକା କର ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ । ଉକ୍ତ କାର୍ଯ୍ୟକ୍ରମରେ ଦଶଜଣ ସ୍ଥାନୀୟ ବୃଦ୍ଧବ୍ୟକ୍ତିଙ୍କୁ ସମ୍ବର୍ଦ୍ଧିତକରାଯାଇଥିଲା । ପ୍ରତିଦିନ ଦଶଜଣଙ୍କ ନିମିତ୍ତ ଭୋଜନ ବ୍ୟବସ୍ଥା ସହିତ ପାଂଚ ଜଣ ବୃଦ୍ଧଙ୍କୁ ଆଜିଠାରୁ ଅନ୍ତେବାସୀରୂପେ ଗ୍ରହଣ କରାଯାଇଥିଲା ।  ଆଶ୍ରମର ଅଧ୍ୟକ୍ଷ ଡକ୍ଟର ଲକ୍ଷ୍ମୀନାରାୟଣ ପଣ୍ଡା ସଭା ପରିଚାଳନା କରିଥିଲେ । ଅନୁଷ୍ଠାନର ଟ୍ରଷ୍ଟି ଡକ୍ଟର ସ୍ବାତୀ ପଟ୍ଟନାୟକ, ମୋନାଲିସା ପାଢୀ ଏବଂ ଶିବନାରାୟଣ ପଣ୍ଡା ସହାୟତା କରିଥିବାବେଳେ  ଶ୍ରୀମତୀ ଉର୍ମିଳା ବେଉରା ଧନ୍ୟବାଦ ଅର୍ପଣ କରିଥିଲେ ।