12-Jan-2021

ଗଣିଆ/ନୟାଗଡ,(ପ୍ରଦୀପ କୁମାର ପଣ୍ଡା)- ସରକାରଙ୍କ ପ୍ରତିଶୃତିରେ ସାଇକେଲ ଆଶାରେ ଅଭିଭାବକ, ଛାତ୍ରଛାତ୍ରୀ ମରୁଭୂମିରେ ମରୀଚିକା ଖୋଜିଲା ଭଳି ବର୍ଷ ବିତିଗଲା l ବିଦ୍ୟାର୍ଥୀ ମାନଙ୍କୁ ବିଦ୍ୟାଳୟକୁ ଯିବାର ଆଗ୍ରହ ବଢାଇବା ସହିତ ଅଭିଭାବକ ମାନଙ୍କର ବୋଝ ହାଲକା କରିବାକୁ ସରକାର ମଧ୍ୟାହ୍ନ ଭୋଜନ, ଡ୍ରେସ, ବହି, ସାଇକେଲ ଆଦି ମାଗଣା ରେ ଦେବାପାଇଁ ଯୋଜନାବଦ୍ଧ ହୋଇଥିଲେ l କିନ୍ତୁ ଏହିସବୁ ଯୋଜନାର ବ୍ୟତିକ୍ରମ ଦେଖିବାକୁ ମିଳୁଛି ଅନେକ ଅଂଚଳରେ l ନବମ ଶ୍ରେଣୀ ରୁ ଉତୀର୍ଣ୍ଣ ହୋଇ  ଦଶମରେ ପଂହଁଚିଲେ ବିଦ୍ୟାର୍ଥୀ କିନ୍ତୁ ମିଳିପାରୁନି ସାଇକେଲ l ଏଭଳି ଘଟଣା ସାମନା କୁ ଆସିଛି ଗଣିଆ ଅଂଚଳରେ l ଏବେ ଦଶମ ଶ୍ରେଣୀର ଶହେ ଦିନିଆ ପାଠ୍ୟକ୍ରମ ଦୌଡରେ ସାମିଲ ହେବାପାଇଁ ଅଭାବୀ ଅଭିଭାବକଙ୍କ ପିଲାମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେବେ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି l ଗଣିଆର କିଶୋର ଚନ୍ଦ୍ର ନୋଡାଲ ବିଦ୍ୟାପୀଠ ର ଗତ ବର୍ଷ ସାଇକେଲ ପ୍ରାପ୍ତି ରୁ ଏକୋଇଶି ଜଣ ବିଦ୍ୟାର୍ଥୀ ବଞ୍ଚିତ ଥିବାବେଳେ ବାରମ୍ବାର ଅଭିଭାବକ ମାନେ ବିଦ୍ୟାଳୟ କର୍ତ୍ତୃପକ୍ଷ ଙ୍କ ପାଖକୁ ଯାଇ ଅଭିଯୋଗ କରି ମଧ୍ୟ କୌଣସି ଫଳାଫଳ ମିଳିନାହିଁ l କିଶୋର ଚନ୍ଦ୍ର ନୋଡାଲ ବିଦ୍ୟାପୀଠର ପ୍ରଧାନ ଶିକ୍ଷୟତ୍ରୀ ବିଜୟ ଲଷ୍ମୀ ମିଶ୍ର  ଗତ କିଛିଦିନ ହେଲା ବିଦ୍ୟାଳୟର ଚାର୍ଜ ନେଇଥିବା ବେଳେ ତାଙ୍କୁ ଅଭିଭାବକ ମାନେ ପଚାରିବା ପରେ ସେ ଏ ବିଷୟରେ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇ ଖୁବ ଶୀଘ୍ର ସମାଧାନ କରିବେ ବୋଲି ପ୍ରତିଶୃତି ଦେଇଛନ୍ତି l ତେବେ ବ୍ଳକ ସ୍ତରରେ କିଶୋର ଚନ୍ଦ୍ର ନୋଡାଲ ବିଦ୍ୟାପୀଠର ପାଠ ପଢା ସାଙ୍ଗକୁ ସମସ୍ତ ପ୍ରକାର ସୁବିଧା ପାଇବାର ଆଶା ରଖି ବହୁ ଦୂରଦୂରାନ୍ତ ରୁ ଅଭିଭାବକ ମାନେ ନିଜର ପିଲାମାନଙ୍କ ନାମ ଲେଖାଇ ଥିଲେ l କିନ୍ତୁ ଏବେ ଏହି ସାଇକେଲ ଯୋଜନାରୁ ବଞ୍ଚିତ ହୋଇଥିବା ବିଦ୍ୟାର୍ଥୀ ମାନଙ୍କ ଅଭିଭାବକ ମାନେ ସରକାରଙ୍କ ଅବହେଳା ଉପରେ ଅଙ୍ଗୁଳି ନିର୍ଦେଶ କରିବା ସହିତ ନିଜ ପିଲାମାନେ ଏହି ବର୍ଷ ର ମାରାଥନ ରେସରେ ହେବାକୁ ଥିବା ପାଠ ପଢାରେ ଅସୁବିଧାର ସମ୍ମୁଖୀନ ହେବାର ଦୁଃଖକୁ ଯଥାଶୀଘ୍ର ସମାଧାନ କରିବା ପାଇଁ ଦାବି କରିଛନ୍ତି l