14-Jan-2025

ସିନାପାଲି ବ୍ଲକ ଅନ୍ତର୍ଗତ ହାତିବନ୍ଧା ସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିର ର ରଜତ ଜୟନ୍ତୀ ପାଳନ ଅବସରରେ ନବକୁଣ୍ଡିୟ ଗାୟତ୍ରୀ ମହାଯଜ୍ଞ ନେଇ ସୋମବାର ଏକ ଭବ୍ୟ କଳସ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ଏହି ଅବସରରେ ସ୍ଥାନୀୟ ଶତାଧିକ ମହିଳା ଏକ କଳସ ଶୋଭାଯାତ୍ରାରେ ସାମିଲ ହୋଇଥିଲେ। ସ୍ଥାନୀୟ ଯମୁନା ସାଗର ଠାରେ ପାରମ୍ପରିକ ରୀତିରେ ପୂଜାର୍ଚ୍ଚନା କରି ପବିତ୍ର ଜଳ ସଂଗ୍ରହ କରିଥିଲେ। ପାରମ୍ପରିକ ବାଜା ଓ ଘଣ୍ଟଦଲ ରେ ନଗର ପରିକ୍ରମା କରି ଯଜ୍ଞ ମଣ୍ଡପରେ   ପବିତ୍ର କଳସ ସ୍ଥାପନ କରାଯାଇଛି। ରଜତ ଜୟନ୍ତୀ ମହୋତ୍ସବ ଉଦଘାଟନୀ ସମାରୋହର ପ୍ରଥମ ପର୍ଯ୍ୟାୟରେ ସୋମବାର ପ୍ରାତଃରେ ନବ କୁଣ୍ଡିୟ ଗାୟତ୍ରୀ ମହାଯଜ୍ଞ ଅନୁଷ୍ଠିତ ହେବ। ଟୋଲି ନାୟକ ସଦାନନ୍ଦ ନାମଦେବଙ୍କ ନେତୃତ୍ୱରେ ଉକ୍ତ ଯଜ୍ଞ କାର୍ଯ୍ୟକ୍ରମ ପରିଚାଳିତ ହେଉଥିବା ବେଳେ ସବୁପ୍ରକାର ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ସେହିଭଳି ପୂର୍ବାହ୍ନରେ ରଜତ ଜୟନ୍ତୀ ମହୋତ୍ସବ ର ଶୁଭ ଉଦଘାଟନ ହେବ। ଆସନ୍ତା ମଙ୍ଗଳବାର ଠାରୁ ଗୁରୁବାର ପର୍ଯ୍ୟନ୍ତ ଦୀର୍ଘ ତିନିଦିନ ବ୍ୟାପି ଅନୁଷ୍ଠାନ ପରିସରସ୍ଥ ଭବ୍ୟ ପରିବେଶ ମଧ୍ୟରେ ଅନୁଷ୍ଠିତ ହେବ। ଏହି ଅବସରରେ ବୌଦ୍ଧିକ,ଅଧ୍ୟାତ୍ମିକ, ସେବା ଓ ସାଂସ୍କୃତିକ କାର୍ଯ୍ୟକ୍ରମ ମହାସମାରୋହରେ ଆୟୋଜିତ ହେବ। ଏଥି ସହ ମହୋତ୍ସବରେ ତିନିଦିନ ଧରି ଦିବା ଓ ସାନ୍ଧ୍ୟ ଅଧିବେଶନ ଅନୁଷ୍ଠିତ ହେବ। ପ୍ରତ୍ୟହ କାର୍ଯ୍ୟକ୍ରମ ରେ ବରେଣ୍ୟ ଅତିଥିମାନେ ଉପସ୍ଥିତ ରହିବାକୁ ସଦୟ ସ୍ୱୀକୃତି ପ୍ରଦାନ କରିଥିବା ଜଣାପଡ଼ିଛି।   ଉକ୍ତ ରଜତ ଜୟନ୍ତୀ ମହୋତ୍ସବ ଆୟୋଜନରେ ମହୋତ୍ସବ ପାଳନ କମିଟି ସଭାପତି ପ୍ରମୋଦ ପଣ୍ଡା , ସମ୍ପାଦକ ସୁରେଶ୍ୱର ମେହେର  ଓ ପ୍ରଧାନ ଆଚାର୍ଯ୍ୟ ଖଗେଶ୍ୱର ଦାସ ଙ୍କ ସମେତ ଶିଶୁ ମନ୍ଦିର ପରିଚାଳନା କମିଟିର ସଭାପତି ହୁକୁମ ଚନ୍ଦ ଅଗ୍ରୱାଲ,ଉପସଭାପତି ପ୍ରଫୁଲ୍ଲ ଦଣ୍ଡସେନା,ସମ୍ପାଦକ କନ୍ଦର୍ପ ମେହେର,ଯୁଗ୍ମ ସମ୍ପାଦକ ଗୁଣନିଧି ବେହେରା, କୋଷାଧ୍ୟକ୍ଷ ରମେଶ ମେହେର  ପ୍ରମୁଖ ସକ୍ରିୟ ଭାବେ ଦାୟିତ୍ୱ ନିର୍ବାହ କରୁଥିବା ଜଣାପଡ଼ିଛି।  ସେହିଭଳି ପରିଚାଳନା ସମିତି,ରଜତ ଜୟନ୍ତୀ ଆୟୋଜକ କମିଟି , ପୂର୍ବତନ ଛାତ୍ର ପରିଷଦ ଏବଂ ସମସ୍ତ ଆଚାର୍ଯ୍ୟ ଆଚାର୍ଯ୍ୟଆ ସକ୍ରିୟ ଭାବେ ସାମିଲ ହୋଇ ସହଯୋଗ କରୁଥିବା ଜଣାପଡ଼ିଛି।

(ପରମେଶ୍ୱର ମେହେରଙ୍କ ରିପୋର୍ଟ)