22-Dec-2024

କଣ୍ଟାମାଳ(ଜୟ କୁମାର ମହାରଣା): ଚାଷ ଜମିର ଉନ୍ନତିକରଣ ପାଇଁ ସରକାର ମନରେଗା ଯୋଜନାରେ ଚାଷୀମାନଙ୍କୁ ଆର୍ଥିକ ରାଶି ଯୋଗାଇ ଦେଉଛନ୍ତି, କିନ୍ତୁ କାର୍ଯ୍ୟାଦେଶ ପାଇଥିଲେ ହେଁ କଣ୍ଟାମାଳ ବ୍ଲକ ଖମନମୁଣ୍ଡା ପଞ୍ଚାୟତର ଚାଷୀମାନେ ନିଜ ଜମିର ଉନ୍ନତିକରଣ କାର୍ଯ୍ୟ କରିପାରୁ ନଥିବା ନେଇ ବୌଦ୍ଧ ଜିଲାପାଳଙ୍କ ନିକଟରେ ଅଭିଯୋଗ ହୋଇଛି l ସୂଚନା ପ୍ରକାରେ ବୌଦ୍ଧ ଜିଲ୍ଲାପାଳଙ୍କ ଆଦେଶ କ୍ରମେ କାର୍ଯ୍ୟାଦେଶ ପତ୍ର ସଂଖ୍ୟା ୨୨୫ ତାରିଖ ୧.୩.୨୦୨୪ ଅନୁଯାୟୀ ଖମନମୁଣ୍ଡା ପଞ୍ଚାୟତ ଅନ୍ତର୍ଗତ ମୁଚେଲପଦର ଗ୍ରାମର ଗୋବର୍ଦ୍ଧନ ଭୋଇ ଏବଂ ୧୮ ଜଣ ହିତାଧିକାରୀଙ୍କ ନାମରେ ଜମି ଉନ୍ନତିକରଣ ନିମନ୍ତେ ମନରେଗା ଯୋଜନାରେ କାର୍ଯ୍ୟ ସଂପାଦନ ପାଇଁ ୯ଲକ୍ଷ ୫୦ ହଜାର ଟଙ୍କା ମଞ୍ଜୁର ହୋଇଛି l ସେହିପରି ପତ୍ର ସଂଖ୍ୟା ୨୨୬ ତା ୧.୪.୨୦୨୪ ଅନୁଯାୟୀ ଖମାନମୁଣ୍ଡା ଗ୍ରାମର ଅନିରୁଦ୍ଧ ଭୋଇ ଏବଂ ୧୮ ଜଣ ହିତାଧିକାରୀଙ୍କ ଜମି ଉନ୍ନତିକରଣ ପାଇଁ ୯ଲକ୍ଷ ୫୦ ହଜାର ଟଙ୍କା ଏବଂ ପତ୍ର ସଂଖ୍ୟା ୨୨୭ ତାରିଖ ୧.୩.୨୦୨୪ ଅନୁଯାୟୀ ଦେଓଗାଁ ଗ୍ରାମର ରବିନ୍ଦ୍ର କଅଁର ଏବଂ ୧୮ଜଣ ହିତାଧିକାରୀଙ୍କ ଜମି ଉନ୍ନତିକରଣ ପାଇଁ ୯ଲକ୍ଷ ୫୦ ହଜାର ଟଙ୍କା ମଞ୍ଜୁର ହୋଇଛି l ଏହା ସମ୍ପୂର୍ଣ୍ଣ ଭାବରେ ଗ୍ରାମ ଦିବସ ସୃଷ୍ଟି କରିବାର ଉଦ୍ଦେଶ୍ୟ ରହିଛି l ଏହି କାର୍ଯ୍ୟରେ ହିତାଧିକାରୀ ନିଜେ ଶ୍ରମିକ କାର୍ଯ୍ୟ କରି ପ୍ରାପ୍ୟ ପାଇ ପାରିବେ l ଏହାଦ୍ୱାରା ମୋଟ ୩ଟି ପ୍ରକଳ୍ପରେ ୫୭ଜଣ ହିତାଧିକାରୀ ଉପକୃତ ହୋଇ ପାରିବେ l କିନ୍ତୁ ଖମନମୁଣ୍ଡା ପଞ୍ଚାୟତର ସରପଞ୍ଚ ରାଜନୈତିକ ମନ୍ଦ ଉଦ୍ଦେଶ୍ୟ ରଖି ଏହି କାର୍ଯ୍ୟକୁ ତୁଲାଇ ନେବାରେ ଟାଳଟୁଳ ନୀତି ଅବଲମ୍ବନ କରୁଛନ୍ତି l ଏଥିରେ ବିଶେଷ ଭାବରେ ତାଙ୍କ ସ୍ୱାମୀ ଗୋବର୍ଦ୍ଧନ ପ୍ରଧାନ ବାଧକ ସାଜୁଛନ୍ତି l ଯାହା ଫଳରେ ଶ୍ରମିକମାନେ କାର୍ଯ୍ୟ କରିବା ପାଇଁ ଡିମାଣ୍ଡ କରିପାରୁ ନାହାନ୍ତି l ଏହାଦ୍ୱାରା ହିତାଧିକାରୀ ମାନେ ଅସୁବିଧାର ସମ୍ମୁଖୀନ ହେଉଛନ୍ତି ବୋଲି ହିତାଧିକାରୀ ମାନେ ଡିସେମ୍ବର ୯ତାରିଖ କଣ୍ଟାମାଳ ବ୍ଲକରେ ଅନୁଷ୍ଠିତ ଜଣ ଶୁଣାଣୀ ଶିବିରରେ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି l ଅଭିଯୋଗ ପାଇବାପରେ ୧୫ଦିନ ଭିତରେ ସମସ୍ୟା ସମାଧାନ କରିବା ପାଇଁ ଜିଲାପାଳ କଣ୍ଟାମାଳ ବିଡ଼ିଓଙ୍କୁ ନିର୍ଦ୍ଦେଶ ଦେଇଥିବା ବେଳେ ଆଜିକୁ ୧୨ଦିନ ବିତିଯାଇଥିଲେ ହେଁ ଏଥିପ୍ରତି ପ୍ରଶାସନ ଗୁରୁତ୍ୱ ଦେଉନଥିବା ହିତାଧିକାରୀ ଅଭିଯୋଗ କରିଛନ୍ତି l