14-Dec-2024

ଆଗଲପୁର, (ବିନୋଦ ଦୀପ) ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ୍  ପ୍ରାଥମିକ କୃଷି ସେବା ସମବାୟ ସମିତି ସଭାପତି ମାନଙ୍କ ଏକ ବୈଠକ ଅନୁଷ୍ଠିତ ହୋଇଥିଲା l ଡୁଡୁକା ପ୍ରାଥମିକ କୃଷି ସେବା ସମବାୟ ସମିତି ର ସଭାପତି ଶ୍ରୀ ବଳରାମ ପଟେଲ୍ ଙ୍କ ସଭାପତିତ୍ବ ରେ ଏହି ବୈଠକ ଅନୁଷ୍ଠିତ ହୋଇଥିଲା। ବୈଠକ ରେ ସମସ୍ତ ସମବାୟ ସମିତି ର ସଭାପତି ଓ ସମ୍ପାଦକ ମାନେ ଯୋଗ ଦେଇଥିଲେ l ବିଶେଷ କରି ଧାନ ମଣ୍ଡି ରେ କିପରି ଠିକ୍ ଭାବରେ ଚାଷୀ ର ଧାନ ଉଠି ପାରିବ ସେ ବିଷୟରେ ଆଲୋଚନା କରିଥିଲେ l ଏହାସହ ଏ ବର୍ଷ ଧାନ କିଣା ରେ ବିଳମ୍ବ ହେଉଥିବାରୁ ସଭାପତି ମାନେ ଉଦବେଗ ପ୍ରକାଶ କରିଥିଲେ l ଗତ ଦୁଇ ତାରିଖ ରୁ ଧାନ ମଣ୍ଡି ଖୋଲିଥିଲେ ମଧ୍ୟ ଆଜି ପର୍ଯ୍ୟନ୍ତ କୌଣସି ଗୋଟିଏ ସମବାୟ ସମିତି ରେ ଧାନ କିଣା ଆରମ୍ଭ ହୋଇନାହିଁ l

ଚାଷୀଙ୍କୁ ଦିଆ ଯାଇଥିବା ଟୋକନ୍ ର ମଧ୍ୟ ଅବଧି ସରିବାକୁ ବସିଲାଣି ହେଲେ ଆଜି ପର୍ଯ୍ୟନ୍ତ କୌଣସି ମଣ୍ଡି ରେ ଧାନ ନାହିଁ l ଆହୁରି ସବୁଠାରୁ ବିଡମ୍ବନା ର ବିଷୟ ହେଉଛି ସରକାର ଏ ବର୍ଷ ପ୍ରଥମ କରି ଧାନ ବସ୍ତା ଦେବାକୁ ସ୍ଥିର କରିଛନ୍ତି ହେଲେ ଆଜି ପର୍ଯ୍ୟନ୍ତ ଖାଲି ବସ୍ତା ସମିତି ମାନଙ୍କ ପାଖକୁ ପହଞ୍ଚି ନାହିଁ। ଆଜି ବ୍ଲକ୍ ର ପଟୁଆପାଲି ସେବା ସମବାୟ ସମିତି କୁ କିଛି ବସ୍ତା ଆସିଥିବାର ସଭାପତି ଶ୍ରି ପ୍ରମୋଦ କୁମାର ମିଶ୍ର ସୂଚନା ଦେଇଥିଲେ l କିନ୍ତୁ ସେଥିରୁ ଅଧିକାଂଶ ଚିରା ଦଦରା ହୋଇଥିବାରୁ ସେ ଦୁଃଖ ପ୍ରକାଶ କରିଥିଲେ l ସେହି ଚିରା ଫଟା ବସ୍ତା ରେ ଚାଷୀ କେମିତି ଧାନ ଭର୍ତ୍ତି କରି ଦେବ ସେ ବିଷୟରେ ବୈଠକ ରେ ଆଲୋଚନା ହୋଇଥିଲା l ତା ସହିତ ପ୍ରତି ସମବାୟ ସମିତି କୁ ଯେତେ ଟାର୍ଗେଟ ଅଛି ସେତିକି ବସ୍ତା ଏକା ସାଙ୍ଗେ ଦିଆଯିବାକୁ ସରକାର ଙ୍କୁ ଅନୁରୋଧ କରିଥିଲେ l ସରକାର ଯଦି ଏ ବିଷୟରେ ବ୍ୟବସ୍ଥା ନ କରିବେ ତା ହେଲେ ଆଗକୁ ଆନ୍ଦୋଳନ କରାଯିବ ବୋଲି ସଂଘ ଚେତାବନୀ ଦେଇଛି l ଆଜିର ବୈଠକ ରେ ସମସ୍ତ ସମବାୟ ସମିତି ର ସଭାପତି ମାନେ ଯୋଗ ଦେଇଥିଲେ l ସେମାନେ ହେଲେ ସର୍ବ ଶ୍ରୀ ଜଗବନ୍ଧୁ ପଧାନ୍ ସଭାପତି, ଶ୍ରୀ କଳାର ସିଂ ବାଗ ସମ୍ପାଦକ, ଶ୍ରୀ ରଜନୀକାନ୍ତ ପାତ୍ର କୋଷାଧ୍ୟକ୍ଷ, ଏହାସହ ଶ୍ରୀ ଚିନ୍ତାମଣି ଭୋଇ, ଦେବେନ୍ଦ୍ର କୁମାର ମେହେର, ବଳରାମ ପଟେଲ, ଉତ୍ତମ ଭୋଇ, ପ୍ରମୋଦ କୁମାର ମିଶ୍ର, ଫକୀର ବିଶ୍ଵାଳ, ବରୁଣ ଯୁଆଡ଼ି, ମୋତି ସରାଫ୍, ଶ୍ରୀମତୀ ପଦ୍ମିନୀ ମେହେର ଓ ସଶାଙ୍କ ଶେଖର ଭୋଇ l ସରକାର ଚାଷୀଙ୍କ ସ୍ବାର୍ଥ କୁ ଦୃଷ୍ଟି ରେ ରଖି ସମସ୍ତ ପ୍ରକାର ପଦକ୍ଷେପ ନେବାକୁ ସମବାୟ ସମିତି ସଂଘ ଦାବି କରିଛନ୍ତି l