10-Dec-2024

କଣ୍ଟାବାଞ୍ଜି(ପ୍ରେରଣା ଖବର): ରାଜ୍ଯ ରାଜଧାନୀ ଭୁବନେଶ୍ୱର ର ଲୋୟର ପିଏମଜି ରେ ଗତ କିଛି ଦିନ ଧରି ଚାଲିଥିବା ମିଶନ ଶକ୍ତି ର ଜିପିଏଲ ଏଫ ମହିଳାଙ୍କ ମାନେ ୧୦ ଦଫା ଦାବୀ ନେଇ ଧାରଣା ଦେଉଥିବା ବେଳେ ମଙ୍ଗଳବାର ସମର୍ଥନ ଜଣାଇ ଧାରଣା ରେ ବସି ଡବ ଇଞ୍ଜିନ ସରକାର ଙ୍କ ଉପରେ ବର୍ଷିଲେ ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ସରପଞ୍ଚ ତଥା ରାଜ୍ୟ ବିଜେଡି ଯୁବ ସମ୍ପଦକ ଅଜିତ କୁମାର ଯୋଶୀ। ଜୀବିକା ମିଶନ ଓ ମିଶନ ଶକ୍ତି ସହ ଜଡ଼ିତ କମ୍ୟୁନିଟି ସପୋର୍ଟ ଷ୍ଟାଫ୍‌ ଯଥା ଏମ୍‌ବିକେ, ସିଆର୍‌ପି, ଇସି ମେମ୍ବର, ପ୍ରାଣିମିତ୍ର, କୃଷିମିତ୍ର ଓ ବ୍ୟାଙ୍କମିତ୍ର ପରି ତୃଣମୂଳ ସ୍ତରର କର୍ମଚାରୀମାନଙ୍କୁ ଗତ ୯ ମାସ ହେଲା ଦରମା ମିଳିନି। ବାରମ୍ବାର ପ୍ରତିବାଦ କଲେ ମଧ୍ୟ ରାଜ୍ୟ ସରକାର ସେମାନଙ୍କ କଥା ଶୁଣିବାକୁ ପ୍ରସ୍ତୁତ ନାହାନ୍ତି। ଗ୍ରାମାଞ୍ଚଳରେ ମହିଳାଙ୍କ ଉତ୍‌ଥାନ, ଆତ୍ମନିର୍ଭରତା କ୍ଷେତ୍ରରେ ବଳିଷ୍ଠ ଯୋଗଦାନ ରଖିଥିବା ଏହି ସ୍ୱଳ୍ପ ବେତନଧାରୀ ମହିଳାମାନଙ୍କ ପ୍ରତି ଅବିଚାରକୁ ରାଜ୍ୟବ୍ୟାପୀ ନିନ୍ଦା କରାଯାଉଥିବା ବେଳେ ସେମାନଙ୍କ ଚାକିରି ଏବଂ ଦରମାକୁ ନେଇ ରାଜ୍ୟ ସରକାର ଅସମ୍ଭବ ନିରବତା ପ୍ରଦର୍ଶନ କରୁଛନ୍ତି। ଯାହାକୁ ନେଇ ଲୋୟର ପିଏମଜିରେ ଠୁଳ ହୋଇଛନ୍ତି ହଜାର ହଜାର କର୍ମୀ। ରାଜ୍ୟର ୭୦ ଲକ୍ଷରୁ ଅଧିକ ମହିଳାଙ୍କୁ ସଶକ୍ତ, ଆତ୍ମନିର୍ଭର ଭାବେ ଗଢ଼ିତୋଳିବା ପାଇଁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମିଶନ ଶକ୍ତି ମାଧ୍ୟମରେ ଏକାଧିକ କାର୍ଯ୍ୟକ୍ରମ, ଯୋଜନା ହାତକୁ ନେଇଥିଲେ। ଯାହାର ସୁଫଳ ମଧ୍ୟ ତୃଣମୂଳ ସ୍ତରରେ ପ୍ରତିଫଳିତ ହୋଇଥିଲା। ପ୍ରତ୍ୟେକ ଦିନ ମହିଳାମାନେ ଆତ୍ମନିର୍ଭରତାର ନୂଆ ନୂଆ କାହାଣୀ ଲେଖୁଥିବା ବେଳେ ରାଜ୍ୟର ମିଶନ ଶକ୍ତି ଆନ୍ଦୋଳନକୁ ଜାତୀୟ ସ୍ତରରେ ଭୂରି ଭୂରି ପ୍ରଶଂସା ମଧ୍ୟ ମିଳୁଥିଲା। ମାତ୍ର ରାଜ୍ୟରେ ନୂଆ ସରକାର ଆସିବା ପରଠାରୁ ଧିରେ ଧିରେ ମିଶନ ଶକ୍ତି ଶକ୍ତିହୀନ ହୋଇପଡ଼ିଲା ପରି ଲାଗୁଛି। ବିଶେଷକରି ୯ ମାସ ହେଲାଣି ସେମାନେ ଦରମା ପାଇନଥିବା ବେଳେ ଏହାର ଉତ୍ତର ଦେବାକୁ ସରକାର ପଛଘୁଞ୍ଚା ଦେଉଛନ୍ତି।